Ekisodo

19 Ka kgwedi ya boraro Baisiraele ba šetše ba tlogile nageng ya Egepeta, ba ile ba fihla lešokeng la Sinai. Ba fihlile lešokeng leo ka lona letšatši leo. 2 Ba fihla lešokeng la Sinai ba etšwa Rafidima gomme ba hloma ditente gona. Baisiraele ba hloma ditente gona moo pele ga thaba.

3 Ke moka Moshe a ya thabeng go Modimo wa nnete gomme Jehofa a bolela le yena a le thabeng yeo a re: “O botše ditlogolo tša Jakobo, e lego bona Baisiraele, o re: 4 ‘Lena le bone seo ke se dirilego Baegepeta, le kamoo ke le tlišitšego go nna go no swana le ge ntšhu e rwala mafotwana a yona ka diphego tša yona. 5 Bjale ge e ba le ka kwa seo ke se bolelago gomme la tshepagalela kgwerano ya ka, gona le tla ba bjalo ka thoto e bohlokwa go nna gare ga merafo e mengwe ka moka ka gobane lefase ka moka ke la ka. 6 Go nna le tla ba mmušo wo o bušwago ke baperisita le setšhaba se sekgethwa.’ Ao ke mantšu a o tlago go a botša Baisiraele.”

7 Ka gona Moshe a ya a bitša banna ba bagolo ba setšhaba gomme a ba botša dilo ka moka tšeo Jehofa a mo laetšego tšona. 8 Ka morago ga moo setšhaba ka moka sa araba ka lentšu letee sa re: “Re ikemišeditše go dira dilo ka moka tšeo Jehofa a di boletšego.” Gateetee Moshe a boela go Jehofa gomme a mmotša kamoo setšhaba se arabetšego ka gona. 9 Ke moka Jehofa a re go Moshe: “Theetša! Ke tla tla go wena ka bolela le wena ke le lerung le leso, e le gore batho ba nkwe ge ke bolela le wena le gore ba dule ba go tshepa.” Ka gona Moshe a botša Jehofa kamoo setšhaba se arabetšego ka gona.

10 Ke moka Jehofa a tšwela pele a re go Moshe: “Eya go setšhaba o se botše gore se ikgethagatše lehono le gosasa gomme se hlatswe diaparo tša sona. 11 Le gona se itokišeletše letšatši la boraro, ka gobane ka letšatši la boraro nna Jehofa ke tlo theogela Thabeng ya Sinai setšhaba ka moka se ntebeletše. 12 O beele setšhaba melao mabapi le thaba ye gomme o se botše o re: ‘Itlhokomeleng gore le se rotogele thabeng gomme le se gate mo e thomago gona. Mang le mang yo a ka beago leoto thabeng ye, ruri o tla bolawa. 13 Go se be le motho yo a kgwathago motho yo a ka beago leoto thabeng, ka gobane motho yoo o tla kgatlwa ka maswika goba a betšwa ka mosebe.* Motho le ge e le ofe goba phoofolo le ge e le efe yeo e ka mo kgwathago e tla hwa.’ Eupša ge setšhaba se ekwa modumo wa lenaka la nku e tona, se ka ya thabeng.”

14 Moshe a theoga thabeng a ya go setšhaba gomme a se botša gore se ikgethagatše e bile se hlatswe diaparo tša sona. 15 Ka gona a botša setšhaba a re: “Itokišeletšeng letšatši la boraro. Lena banna le se ke la robala le basadi ba lena.”

16 Mesong ya letšatši la boraro gwa ba le medumo ya magadima le magadima, le leru le lesoleso thabeng gotee le modumo o mogolo kudu wa lenaka, gomme batho ka moka bao ba bego ba le ka ditenteng ba thoma go thothomela. 17 Bjale Moshe a ntšha setšhaba ka ditenteng gore se tle se kgobokane pele ga Modimo wa nnete gomme sa ema pele ga thaba. 18 Thaba ya Sinai ya thunya muši mo gohle, ka ge Jehofa a be a theogetše go yona ka mollo. Ke moka muši wa yona wa ya godimo go swana le muši wa sebešo, e bile thaba ka moka ya šikinyega o šoro. 19 Ge modumo wa lenaka o dutše o eya godimo, Moshe o be a bolela gomme Modimo wa nnete a mo araba ka go ntšha lentšu.

20 Ka gona Jehofa a theogela ntlheng ya Thaba ya Sinai. Ke moka Jehofa a biletša Moshe ntlheng yeo ya thaba gomme Moshe a rotogela moo. 21 Bjale Jehofa a re go Moshe: “Theoga o lemoše setšhaba o se botše gore se se ke sa leka go gapeletša go lebelela nna Jehofa, ka gobane ge se ka dira bjalo ba bantšhi mo setšhabeng ba tlo hwa. 22 Le gona nna Jehofa, ke nyaka gore o botše baperisita bao ba ntlhankelago ka mehla gore ba ikgethagatše, e le gore nna Jehofa ke se ke ka ba bolaya.” 23 Ka gona Moshe a re go Jehofa: “Setšhaba ga se kgone go rotogela Thabeng ya Sinai, ka gobane wena o šetše o re lemošitše wa re: ‘Le beele setšhaba melao mabapi le thaba ye gomme le e dire e kgethwa.’” 24 Eupša Jehofa a re go yena: “Sepela o ye go sona ke moka o boe o na le Arone. Eupša baperisita le setšhaba ba se ke ba leka go gapeletša go rotogela mo go nna Jehofa, gore ke se tlo ba bolaya.” 25 Ka gona Moshe a ya go setšhaba gomme a se botša seo Modimo a se boletšego.