Ekisodo

7 Ke moka Jehofa a bolela le Moshe a re: “Ke tla go nea matla a gore o nkemele legato pele ga Farao, gomme Arone butiago o tla go bolelela go swana le moporofeta. 2 O tla botša Arone dilo ka moka tšeo ke tlago go go botša tšona, gomme yena o tla di botša Farao, ke moka Farao o tla lokolla Baisiraele gore ba tloge nageng ya gagwe. 3 Ke tla dira gore Farao a thatafiše hlogo, gomme ka dira dilo tše dintšhi tšeo di tlago go go bontšha matla a ka, ka dira le mehlolo e mentšhi nageng ya Egepeta. 4 Eupša Farao a ka se go theetše. Ke tla diriša matla a ka go otla batho ba Egepeta o šoro, gomme ka ntšha setšhaba sa ka se segolo sa Baisiraele nageng ya Egepeta. 5 Baegepeta ba tla tseba gore ke nna Jehofa ge ke diriša matla a ka go otla naga ya bona gomme ka lokolla Baisiraele.” 6 Moshe le Arone ba ile ba dira dilo ka moka ka tsela yeo Jehofa a ba laetšego ka yona. 7 Moshe o be a na le mengwaga e 80 gomme Arone a na le mengwaga e 83 ge ba be ba bolela le Farao.

8 Bjale Jehofa a bolela le Moshe le Arone a re: 9 “Ge Farao a ka bolela le lena a re: ‘Dirang mohlolo,’ wena Moshe o botše Arone gore a lahlele lepara la gagwe fase pele ga Farao, gomme lona le tla fetoga noga e kgolo.” 10 Ka gona Moshe le Arone ba ya go Farao, gomme ba dira sona seo Jehofa a ba laetšego sona. Arone a lahlela lepara la gagwe fase pele ga Farao le bahlanka ba gagwe, gomme lona la fetoga noga e kgolo. 11 Eupša Farao a bitša banna ba bohlale, baloi le baperisita ba Egepeta bao ba dirago dilo tša botemona gore le bona ba tle ba dire mohlolo o swanago. 12 Ka gona yo mongwe le yo mongwe a lahlela lepara la gagwe fase gomme la fetoga noga e kgolo, eupša lepara la Arone la metša mapara a bona. 13 Eupša Farao a no dula a thatafaditše hlogo, gomme a se ke a ba theetša, feela bjalo ka ge Jehofa a boletše.

14 Ke moka Jehofa a bolela le Moshe a re: “Farao o thatafaditše hlogo. O ganne go lokolla batho ba ka gore ba sepele. 15 Gosasa mesong o dire se, ge Farao a eya Nokeng ya Nile o ye go yena gomme o eme kgauswi le Noka yeo. O sepele le lepara lela le ilego la fetoga noga gomme o le sware ka seatla. 16 O mmotše o re: ‘Jehofa Modimo yo Baheberu ba mo hlankelago o ile a nthoma go wena a re: “Lokolla batho ba ka gore ba sepele gore ba yo ntlhankela lešokeng,” eupša le go fihla gona bjale ga se wa kwa. 17 Bjale Jehofa o re: “Seo o tlago go tseba ka sona gore ke nna Jehofa se se: Ke tlo itia meetse ao a lego ka Nokeng ya Nile ka lepara leo ke le swerego ka seatleng sa ka, gomme ona a tlo fetoga madi. 18 Dihlapi tše di lego ka Nokeng ya Nile di tla hwa, gomme Noka yeo ya nkga. Baegepeta ba ka se kgone go nwa meetse a Noka yeo.”’”

19 Ka gona Jehofa a re go Moshe: “Botša Arone gore a sware lepara la gagwe ka seatla gomme a šupe meetse a Baegepeta ka lona, a šupe dinoka tša bona, mekero ya bona, moo go nago le meetse le mahlakanoka le gohle moo ba beilego meetse gore meetse ao a fetoge madi. Madi a tlo tlala gohle nageng ya Egepeta, le ka gare ga dibjana tša go dirwa ka kota le leswika.” 20 Kapejana Moshe le Arone ba dira ka mokgwa woo Jehofa a ba laetšego ka gona. Arone a emiša lepara la gagwe a itia meetse a ka gare ga Noka ya Nile Farao le bahlanka ba gagwe ba mo lebeletše, gomme meetse ka moka a nokeng yeo a fetoga madi. 21 Dihlapi tšeo di bego di le ka Nokeng ya Nile tša hwa, ke moka noka yeo ya thoma go nkga. Baegepeta ba be ba sa kgone go nwa meetse a noka yeo, e bile meetse ka moka a nageng ya Egepeta a be a fetogile madi.

22 Eupša baperisita ba Egepeta bao ba dirago dilo tša botemona le bona ba dira se se swanago ba diriša matla a bona ao a sa tsebjego. Ge e le Farao yena a no dula a thatafaditše hlogo, gomme a se theetše Moshe le Arone feela bjalo ka ge Jehofa a boletše. 23 Ke moka Farao a boela ntlong ya gagwe, gomme a se be le taba le seo se diregilego. 24 Baegepeta ka moka ba yo epa didiba kgauswi le Noka ya Nile gore ba hwetše meetse a go nwa ka gobane ba be ba sa kgone go nwa meetse a noka yeo. 25 Jehofa a dira gore go fete matšatši a šupago meetse a Nokeng ya Nile e le madi.