Daniele

3 Kgoši Nebukadinetsara o ile a dira seswantšho sa gauta sa botelele bja dimithara tše 27* go ya godimo le bophara bja dimithara tše tharo.* A se hloma molaleng wa Dura profenseng ya Babilona. 2 Ke moka Nebukadinetsara a romela molaetša wa gore go kgoboketšwe balaodi, bathuši ba balaodi, babuši, baeletši, boramatlotlo, baahlodi, bommaseterata le balaodi ka moka ba diprofense, gore ba tle ge go tla be go neelwa seswantšho seo Kgoši Nebukadinetsara a se hlomilego.

3 Ka gona balaodi, bathuši ba balaodi, babuši, baeletši, boramatlotlo, baahlodi, bommaseterata le balaodi ka moka ba diprofense, ba kgobokana gore ba tle ge go neelwa seswantšho seo Kgoši Nebukadinetsara a se hlomilego. Ke moka ba ema pele ga seswantšho seo. 4 Moromiwa* wa kgoši a goeletša a re: “Lena batho ba ditšhaba ka moka le maleme ka moka, le laelwa gore, 5 ge le ekwa modumo wa naka, phaephe, seletšo se senyenyane sa metato, harepa ya dikhona tše tharo, seletšo sa metato, dinaka tšeo di kgomagantšwego le mokotla le modumo wa diletšo tše dingwe ka moka tša mmino, le swanetše go khunama gomme le rapele seswantšho sa gauta seo Kgoši Nebukadinetsara a se hlomilego. 6 Motho yo mongwe le yo mongwe yo a sa khunamego gomme a rapela seswantšho seo, o tla lahlelwa kapelapela sebešong sa mollo wo o tukago.” 7 Ka gona, ge batho ba ditšhaba ka moka le maleme ka moka ba ekwa modumo wa naka, phaephe, seletšo se senyenyane sa metato, harepa ya dikhona tše tharo, seletšo sa metato le wa diletšo tše dingwe ka moka tša mmino, ba ile ba khunama gomme ba rapela seswantšho sa gauta seo Kgoši Nebukadinetsara a bego a se hlomile.

8 Bjale ka yona nako yeo, Bakaladea ba bangwe ba ya go kgoši gomme ba latofatša Bajuda. 9 Ba re go Kgoši Nebukadinetsara: “Anke wena kgoši o phele go ya go ile. 10 Wena kgoši o laetše gore motho yo mongwe le yo mongwe yo a kwago modumo wa naka, phaephe, seletšo se senyenyane sa metato, harepa ya dikhona tše tharo, seletšo sa metato, dinaka tšeo di kgomagantšwego le mokotla le modumo wa diletšo tše dingwe ka moka tša mmino, o swanetše go khunama gomme a rapele seswantšho sa gauta, 11 le gore motho yo mongwe le yo mongwe yo a sa khunamego gomme a rapela seswantšho seo, o tla lahlelwa sebešong sa mollo wo o tukago. 12 Eupša go na le Bajuda ba bangwe bao o ba beilego gore ba buše profense ya Babilona, e lego Shaderaka, Meshaka le Abedinego. Wena kgoši, banna ba ga ba go hlomphe, ga ba hlankele medimo ya gago, e bile ba gana go rapela seswantšho sa gauta seo o se hlomilego.”

13 Ke moka Nebukadinetsara a galefa kudu, gomme a laela gore Shaderaka, Meshaka le Abedinego ba tlišwe go yena. Ka gona banna bao ba tlišwa pele ga kgoši. 14 Nebukadinetsara a re go bona: “Shaderaka, Meshaka le Abedinego, na ke nnete gore ga le hlankele medimo ya ka le gore le gana go rapela seswantšho sa gauta seo ke se hlomilego? 15 Nakong e tlago ge le ekwa modumo wa naka, phaephe, seletšo se senyenyane sa metato, harepa ya dikhona tše tharo, seletšo sa metato, dinaka tšeo di kgomagantšwego le mokotla le modumo wa diletšo tše dingwe ka moka tša mmino, ke moka la ikemišetša go khunama gomme la rapela seswantšho seo ke se dirilego, gona ga go na bothata. Eupša ge e ba le gana go se rapela, gona le tla lahlelwa kapelapela sebešong sa mollo wo o tukago. Na go na le modimo yo a ka le phološago diatleng tša ka?”

16 Shaderaka, Meshaka le Abedinego ba araba kgoši ba re: “Wena Kgoši Nebukadinetsara, ga go hlokege gore re go arabe. 17 Wena kgoši, ge e ba go ka nyakega gore re lahlelwe sebešong se se tukago sa mollo, gona Modimo wa rena yo re mo hlankelago o tla re phološa, e bile o tla re phološa seatleng sa gago. 18 Eupša le ge Modimo a ka se re phološe, wena kgoši, o tsebe gore re ka se hlankele medimo ya gago goba ra rapela seswantšho sa gauta seo o se hlomilego.”

19 Ke moka Nebukadinetsara a galefela Shaderaka, Meshaka le Abedinego kudu, moo mmala wa sefahlego sa gagwe o ilego wa fetoga.* A laela gore sebešo se bešeletšwe ka makga a šupago go feta ka mo go tlwaelegilego. 20 Ke moka a laela a mangwe a mašole a gagwe a matla gore a tleme Shaderaka, Meshaka le Abedinego, gomme a ba lahlela sebešong sa mollo o tukago.

21 Ka gona, banna bao ba ile ba tlengwa ba sa apere diaparo tša bona tša ka ntle, dikatiba tša hlogo le diaparo tša bona tše dingwe ka moka gomme ba lahlelwa ka sebešong sa mollo wo o tukago. 22 Ka ge kgoši e be e ntšhitše taelo yeo e tiišitše ka ganong e bile sebešo se fiša kudu ka tsela e sa tlwaelegago, banna bao ba ilego ba lahlela Shaderaka, Meshaka le Abedinego mollong, ke bona ba ilego ba bolawa ke kgabo ya mollo. 23 Eupša Shaderaka, Meshaka le Abedinego, ba wela sebešong sa mollo wo o tukago ba tlemilwe.

24 Ke moka Kgoši Nebukadinetsara a napa a tšhoga gomme a emelela kapelapela. Ke moka a re go bahlankedi ba gagwe ba bagolo: “Na ga se ra tlema banna ba bararo gomme ra ba lahlela mollong?” Bahlankedi ba gagwe ba bagolo ba re: “Go bjalo wena kgoši.” 25 Yena a re: “Bjale nna ke bona banna ba bane ba sepela gare ga mollo ba sa tlengwa. Ga se ba swa e bile ga se ba gobala, le gona monna wa bone o bonagala eka ke morwa wa medimo.”

26 Nebukadinetsara a batamela lebati la sebešo se se tukago mollo. A re: “Shaderaka, Meshaka le Abedinego, lena bahlanka ba Modimo yo Godimodimo, etšwang gomme le tle mo!” Ke moka Shaderaka, Meshaka le Abedinego ba tšwa ka gare ga mollo. 27 Ke moka balaodi, bathuši ba balaodi, babuši le bahlankedi ba kgoši ba bagolo bao ba bego ba le moo, ba ile ba bona gore mollo ga se wa fiša mebele ya banna bao, meriri ya dihlogo tša bona ga se ya swa, diaparo tša bona di sa le kamoo di bego di le ka gona le gore ga ba nkge muši.

28 Ke moka Nebukadinetsara a re: “A go retwe Modimo wa Shaderaka, Meshaka le Abedinego, yo a rometšego morongwa wa gagwe gomme a phološa bahlanka ba gagwe. Ba ile ba ithekga ka yena gomme ba se theetše taelo ya kgoši e bile ba be ba ikemišeditše go hwa, go e na le gore ba hlankele medimo e mengwe goba go e rapela ka ntle le Modimo wa bona. 29 Ka gona ke ntšha taelo ya gore motho wa go tšwa setšhabeng le ge e le sefe goba lelemeng le ge e le lefe yoo a bolelago gampe ka Modimo wa Shaderaka, Meshaka le Abedinego, o swanetše go ripelelwa gomme ntlo ya gagwe e fetošwe lefelo la boithomelo la batho bohle,* ka gobane ga go na modimo yo mongwe yo a kgonago go phološa batho go swana le yo.”

30 Ke moka kgoši ya dira gore Shaderaka, Meshaka le Abedinego ba boele ba be le maemo a godimo profenseng ya Babilona.