Psalme

17 Ekwa thapelo ya ka gomme o mpontšhe toka hle Jehofa.

Ekwa ge ke go llela gore o nthuše,

Gomme o kwe thapelo ya ka yeo e tšwago pelong.

 2 Anke o dire phetho yeo e ntoketšego.

Eka o ka bona seo se lokilego go nna.

 3 O hlahlobile pelo ya ka gomme bošego wa e lebeledišiša,

O ntlhwekišitše,

Gomme wa hwetša gore ga se ka loga maanomabe.

E bile ga se ka senya ka molomo wa ka.

 4 Ga ke swane le batho ba bangwe ka moka,

Bao ba latelago batho bao ba swarago ba bangwe poo, ka gobane ke theetša mantšu a gago.

 5 Ke kgopela gore o nthuše gore ke dule ke sepela mehlaleng ya gago,

E le gore ke se ke ka kgaotša go go latela.

 7 Wena yo a phološago bao ba tšhabelago go wena,

Ge ba tšhaba bao ba go hlanogetšego,

Bontšha lerato la gago le le botegago ka go dira dilo tše di makatšago.

 8 Ke kgopela o ntlhokomele go etša leihlo la gago,

Nkute ka tlase ga maphego a gago.

 9 Ntšhireletše go ba babe bao ba ntlhaselago,

Le go manaba a ntikologilego ao a nyakago go mpolaya.

10 Ga ba na taba le maikwelo a batho ba bangwe,*

Ba bolela ka boikgogomošo.

11 Ba re dikologile,

Ba nyakana le sebaka sa gore ba re wiše.

12 Ba babe ba swana le tau yeo e nyakago go rathaganya phoofolo,

Ba swana le tawana yeo e laletšego diphoofolo.

13 Ema hle Jehofa, mphološe go bona gomme o ba fenye.

Mphološe go ba babe ka tšhoša ya gago.

14 Hle Jehofa, ntšhireletše ka seatla sa gago se matla.

Ntšhireletše go batho ba lefase le bao ba sa naganego ka bokamoso,

Bao o ba kgotsofatšago ka dilo tše dibotse tšeo o ba fago tšona,

Le bao ba tlogelelago barwa ba bona ba bantšhi bohwa.

15 Ge e le nna, ke dira dilo tše dibotse, ke ka baka leo o nkamogelago.

Ka mehla ge ke tsoga ke a tseba gore o na le nna, ke ka baka leo ke kgotsofetšego.