Psalme
Ditaelo tšeo di yago go mohlahli. Koša ya barwa ba Kora. E opelwe ka mokgwa wa Alamothe.*
46 Modimo o a re šireletša e bile o re fa matla,
O tla dula a re thuša nakong ya ge re tlaletšwe.
2 Ke ka baka leo re ka se boifego, le ge lefase le ka fetoga,
Le ge dithaba di ka šišinyega gomme tša nwelela ka fasefase ga lewatle.
3 Le ge meetse a lona a ka hlaba lešata le go dira mahulo,
Le ge dithaba di ka šišinyega ka gobane lewatle le huduega. (Selah)
4 Go na le noka yeo dinokana tša yona di thabišago badudi ba motse wa Modimo,
E lego taberenakele e kgolo e kgethwa ya yo Godimodimo.
5 Modimo o gare ga motse woo, ke ka baka leo o ka se phušolwego.
Modimo o tla thuša badudi ba motse woo ge go esa.
6 Ditšhaba di be di hlaba lešata gomme mebušo e ewa.
Eupša ge a bolela, lefase le ile la thothomela.
7 Jehofa wa madira o na le rena,
Modimo wa Jakobo o swana le lefelo leo le šireletšegilego leo re tšhabelago go lona. (Selah)
8 Etlang le boneng dilo tšeo Jehofa a di dirilego,
Le bone dilo tšeo di makatšago kudu tšeo a di dirilego lefaseng.
9 O fediša dintwa lefaseng ka moka.
O robaganya bora le lerumo,
O tšhuma dikariki* tša ntwa ka mollo.
10 O itše: “Tlogelang go lwa gomme le tsebe gore ke nna Modimo.
Ke tla hlompšha gare ga ditšhaba,
Ke tla hlompšha lefaseng.”
11 Jehofa wa madira o na le rena,
Modimo wa Jakobo o swana le lefelo leo le šireletšegilego leo re tšhabelago go lona. (Selah)