Puku ya Bobedi ya Samuele

7 Ge Kgoši Dafida a be a dutše ka ntlong ya gagwe gomme Jehofa a mo šireleditše go manaba a gagwe ka moka, 2 o ile a botša moporofeta Nathane a re: “Nna ke dutše ka ntlong ya go dirwa ka dikota tša metsedara, mola areka ya Modimo wa nnete e dutše ka tenteng.” 3 Nathane a re go Kgoši Dafida: “Dira se sengwe le se sengwe seo pelo ya gago e nyakago go se dira, ka gobane Jehofa o a go thekga.”

4 Bošegong bjoo Jehofa a botša Nathane a re: 5 “Sepela o yo botša Dafida mohlanka wa ka o re: ‘Jehofa o re: “Na ke wena o swanetšego go nkagela ntlo yeo ke tlago go dula ka go yona? 6 Ka gobane ga sa nka ka dula ka ntlong go tloga ge ke ntšha Baisiraele nageng ya Egepeta go ba go fihla le lehono, eupša ke be ke dutše ke sepela ke le ka tenteng le ka taberenakeleng. 7 Nako ye ka moka ge ke be ke ralala le Baisiraele ka moka, na nkile ka botša yo mongwe wa baetapele ba meloko ya Isiraele, yoo ke mo kgethilego gore a diše setšhaba sa ka sa Isiraele, ka re: ‘Ke ka baka la’ng le se la ka la nkagela ntlo ya go dirwa ka dikota tša metsedara?’”’ 8 O botše Dafida mohlanka wa ka o re: ‘Jehofa wa madira o re: “Ke go tšere o diša mehlape madišong gore o tle o be moetapele wa setšhaba sa ka sa Isiraele. 9 Ke tla ba le wena kae le kae moo o yago gona, ka fediša manaba a gago ka moka pele ga gago. Ke tla dira gore leina la gago le tume kudu go swana le maina a batho bao ba tumilego mo lefaseng. 10 Ke tla kgethela setšhaba sa ka sa Isiraele lefelo leo se tlago go dula go lona, gomme se tla dula moo sa se sa tshwenywa ke motho. Batho ba babe ba ka se sa se gatelela go etša ge ba ile ba dira bjalo peleng, 11 go tloga ge ke be ke kgethela setšhaba sa ka sa Isiraele baahlodi. Ke tla dira gore manaba a gago ka moka a se sa go hlasela.

“‘“Le gona Jehofa o go boditše gore Jehofa o tla go agela ntlo. 12 Ge o hlokofala gomme o eya go robala le borakgolokhukhu ba gago, ke tla kgetha setlogolo sa gago yena morwa wa gago gore e be kgoši, gomme ka tiiša mmušo wa gagwe. 13 Ke yena a tlago go nkagela ntlo ya go dira gore leina la ka le hlomphiwe, gomme ke tla tiiša mmušo* wa gagwe go ya go ile. 14 Nna ke tla ba tatagwe gomme yena ya ba morwa wa ka. Ge a dira phošo ke tla mo phošolla, ka mo itia ka kgati go etša ge batho* ba dira bjalo.* 15 Nka se kgaotše go mmontšha botho* go etša ge ke ile ka kgaotša go bo bontšha Saulo yo ke mo tlošitšego pele ga gago. 16 Ntlo ya gago le mmušo wa gago di tla šireletšega go ya go ile pele ga gago. Pušo ya gago e tla dula e le gona go ya go ile.”’”

17 Nathane o ile a botša Dafida dilo ka moka tšeo Modimo a mmoditšego tšona le go mmontšha tšona.

18 Ka morago ga moo Kgoši Dafida a tla a dula pele ga Jehofa, a re: “Wena Mmuši Morena Jehofa, ke nna mang? Le gona ntlo ya ka ke eng ge o bile o mphihlišitše kgole ka mokgwa wo? 19 Wena Mmuši Morena Jehofa, ka morago ga dilo tšeo o ntiretšego tšona, ebile o re ntlo ya mohlanka wa gago e tla dula e le gona ka nako e telele. Wena Mmuši Morena Jehofa, ga go na motho yo a ka fetolago molao woo. 20 Bjale nna Dafida mohlanka wa gago nka oketša ka go re’ng, mola wena Mmuši Morena Jehofa e le wena o ntsebago gabotse? 21 O dirile dilo tše tše dikgolo gomme wa di utollela mohlanka wa gago ka baka la lentšu la gago le ka go dumelelana le thato ya gago. 22 Ke ka baka leo o lego yo mogolo kudu wena Mmuši Morena Jehofa. Ga go na yo a swanago le wena, ebile ga go na Modimo yo mongwe ka ntle le wena, gomme dilo ka moka tšeo re di kwelego di tiišetša seo. 23 Ke setšhaba sefe se sengwe lefaseng seo se swanago le setšhaba sa gago sa Isiraele? Wena Modimo o ile wa se lopolla gore e be setšhaba sa gago, wa itirela leina ka go se direla dilo tše dikgolo le tšeo di boifišago. O ile wa raka ditšhaba le medimo ya tšona ka baka la batho ba gago bao o ba lopolotšego Egepeta. 24 O dirile gore Isiraele e be setšhaba sa gago go ya go ile, gomme wena Jehofa wa ba Modimo wa sona.

25 “Bjale hle Jehofa Modimo, anke o phethe seo o se boletšego ka mohlanka wa gago le ntlo ya gagwe go ya go ile gomme o dire feela bjalo ka ge o tshepišitše. 26 Anke leina la gago le hlomphiwe go ya go ile, gore batho ba tle ba re: ‘Jehofa wa madira ke Modimo wa Isiraele,’ le gona anke pušo ya Dafida mohlanka wa gago e dule e tiile pele ga gago. 27 Ka ge wena Jehofa wa madira, Modimo wa Isiraele, o utolletše mohlanka wa gago wa re: ‘Ke tla go agela ntlo.’* Ke ka baka leo mohlanka wa gago a nago le sebete sa go rapela thapelo ye. 28 Wena Mmuši Morena Jehofa, o Modimo wa nnete, gomme mantšu a gago ke a nnete. Le gona o tshepišitše mohlanka wa gago dilo tše tše dibotse. 29 Bjale anke o kgahlišwe ke go šegofatša ntlo ya mohlanka wa gago gore e dule e le gona go ya go ile, ka gobane wena Mmuši Morena Jehofa o tshepišitše, gomme ka baka la tšhegofatšo ya gago anke ntlo ya mohlanka wa gago e šegofatšwe go ya go ile.”