Psalme
Ditaelo tšeo di yago go mohlahli: Diriša modumo wa koša yeo e rego: “O se ke wa Senya.” Miktame.* Koša ya Dafida. Ge Saulo a be a romela banna gore ba lete ntlo ya Dafida e le gore ba mmolaye.
59 Mphološe go manaba a ka, hle Modimo.
Ntšhireletše go bao ba lwago le nna.
2 Mphološe go bao ba tlwaetšego go dira dilo tše mpe,
O be o ntšhireletše go banna bao ba ratago bošoro.
3 Ba ntaletše.
Banna ba matla ba a ntlhasela,
Eupša e sego ka gobane ke go hlanogetše goba ke go diretše sebe, wena Jehofa.
4 Ba kitimela go ntlhasela le ge ke se na molato.
Ge ke kgopela gore o nthuše, etla o nthuše gomme o bone gore ba dira eng.
5 Ka gobane wena Jehofa Modimo wa madira, o Modimo wa Isiraele.
Ema o bone gore ditšhaba di dira eng.
O se kwele bohloko baradia ba bašoro. (Selah)
6 Mantšiboa a mangwe le a mangwe,
Batho bao ba babe ba a boa gomme ba nyaka go ntlhasela,
Ba goba bjalo ka dimpša gomme ba rarela motse ka moka.
7 Ba dula ba bolela dilo tše mpe ka melomo ya bona.
Melomo ya bona e swana le ditšhoša,
Ka gobane ba re: “Ke mang a tlago go tseba gore ke rena re boletšego dilo tše?”
8 Eupša wena Jehofa, o tla ba sega.
O tla kwera ditšhaba ka moka.
9 Wena Modimo o Matla a ka, ke tla dula ke go letetše
Ka gobane o lefelo leo ke tšhabelago go lona.
10 Modimo yo a mpontšhago lerato la gagwe le le botegago o tla tla go nna gomme a nthuša.
Modimo o tla dira gore ke bone ge bao e lego manaba a ka ba fenywa.
11 O se ke wa ba bolaya gore batho ba gešo ba se lebale seo o ba dirilego sona.
Ba dire gore ba sepelasepele le lefase,
Dira gore ba felelwe ke matla wena Jehofa ka gobane o a re šireletša,
12 Anke ba tanywe ke boikgantšho bja bona,
Ka gobane ba dira sebe ka dilo tšeo ba di bolelago ka melomo ya bona,
E bile ba roga batho le go bolela maaka.
13 Ba fediše ka kgalefo ya gago.
Ba fediše gore ba se sa hlwa ba eba gona.
Dira gore ba tsebe gore Modimo o buša ditlogolo tša Jakobo le go fihla mafelelong a lefase. (Selah)
14 Anke ba boe mantšiboa.
Ba gobe bjalo ka dimpša gomme ba dikologe motse ka moka.
15 Anke ba ralale ba nyakana le sa go ja.
O se ba dumelele ba khora le go hwetša moo ba ka robalago gona.
16 Eupša nna ke tla opela mabapi le matla a gago,
Mesong ke tla bolela ka lerato la gago le le botegago ke thabile.
Ka gobane o setšhabelo sa ka
Le lefelo leo ke tšhabelago go lona ge ke tlaletšwe.
17 Wena Modimo, Matla a ka, ke tla go opelela ka ba ka go leletša mmino,
Ka gobane o lefelo leo ke tšhabelago go lona e bile o dula o mpontšha lerato la gago le le botegago.