Puku ya Pele ya Samuele
10 Samuele a tšea legapana la makhura gomme a tšhela makhura ao hlogong ya Saulo a mo khisa* a re: “Jehofa o go kgethile gore o be moetapele wa batho ba gagwe.* 2 Ge o tloga mo go nna lehono o tla hwetša banna ba babedi kgauswi le lebitla la Ragele tikologong ya Benjamini kua Tselitsa, gomme ba tla go botša ba re: ‘Ditonki tšeo o bego o ile go di nyaka di hweditšwe, eupša ga bjale tatago ga a sa na taba le ditonki tšeo, o tshwenyegile ka wena. O re: “Go diregile’ng ka morwa wa ka ka gore šo ga a boe?”’ 3 O fete moo go ba go fihla o fihla mohlareng o mogolo wa Thabora moo o tlago go kopana le banna ba bararo ba rotogela Bethele go yo rapela Modimo wa nnete, yo mongwe a kukile diputšanyana tše tharo, yo mongwe a swere dinkgwa tše tharo gomme yo mongwe a rwele sebjana se segolo sa beine. 4 Ba tla go dumediša ke moka ba go nea dinkgwa tše pedi. O di tšee. 5 Ka morago ga moo o ye mmotong wa Modimo wa nnete, moo go nago le mašole a Bafilisita. Ge o fihla motseng o tla gahlana le baporofeta bao ba theogago ba etšwa lefelong le le phagamego. Kua pele ga bona o tla bona batho bao ba letšago seletšo sa metato, moropa, naka le harepa, ge baporofeta ba dutše ba porofeta. 6 Moya wa Jehofa o tla go nea matla wa porofeta le bona gomme gwa ba bjalo ka ge eka o fetogile motho yo mongwe. 7 Ge o bona dilo tše di direga, dira seo o ka se kgonago, ka gobane Modimo wa nnete o na le wena. 8 O nkete pele o theogele Giligala, gomme ke tla tla ke dira dihlabelo tša go fišwa le dihlabelo tša go dira khutšo le Modimo.* O ntetele matšatši a šupago go fihlela ke etla, gomme ke tla go botša gore o dire eng.”
9 Ge Saulo a se na go kgaogana le Samuele, Modimo a thoma go fetola pelo ya Saulo, gwa ba bjalo ka ge eka ke motho yo mongwe. Gomme dilo ka moka tšeo Samuele a di boletšego tša thoma go direga ka letšatši leo. 10 Ke moka Saulo le mohlanka wa gagwe ba tloga moo ba ya mmotong, gomme ba kopana le baporofeta. Gateetee moya wa Modimo wa mo nea maatla, gomme a thoma go porofeta le bona. 11 Ge batho ka moka bao ba bego ba mo tseba ba mmona a porofeta le baporofeta ba bangwe, ba ile ba botšišana ba re: “Go diragetše’ng ka morwa wa Kishe? Na Saulo le yena ke yo mongwe wa baporofeta?” 12 Monna yo mongwe a re: “Eupša baporofeta ba ba bangwe, tatago bona ke mang?” Ke ka baka leo go bilego le polelwana e rego: “Na Saulo le yena ke yo mongwe wa baporofeta?”
13 Ge a fetša go porofeta o ile a ya lefelong le le phagamego. 14 Ka morago morwarrago tatago Saulo a re go Saulo le mohlanka wa gagwe: “Le be le ile kae?” A araba a re: “Re be re ile go yo nyaka ditonki, eupša ge re sa di hwetše re ile ra ya go Samuele.” 15 Morwarrago tatago Saulo a re: “Hle mpotšeng, Samuele o itše’ng go lena?” 16 Saulo a araba a re: “O re boditše gore ditonki di hweditšwe.” Eupša a se mmotše gore Samuele o mmoditše gore e tlo ba kgoši.
17 Samuele a kgobokanya setšhaba sa Isiraele pele ga Jehofa kua Mitsipa, 18 gomme a re go sona: “Jehofa Modimo wa Isiraele o itše: ‘Ke nna ke ntšhitšego Isiraele kua Egepeta gomme ka le phološa go Baegepeta le go mebušo ka moka yeo e bego e le gatelela. 19 Eupša lehono le hlanogetše Modimo wa lena yo a le phološitšego mathateng le masetlapelong a lena, la re: “Rena re nyaka kgoši yeo e tlago go re buša.” Bjale emang pele ga Jehofa ka meloko ya lena le ipopile ka dihlopha tša ba 1 000 (sekete).’”
20 Samuele a batametša meloko ka moka ya Isiraele gomme gwa kgethwa moloko wa Benjamini. 21 Ke moka a batametša moloko wa Benjamini go ya ka malapa a wona gomme gwa kgethwa lapa la Bamatiri. Mafelelong gwa kgethwa Saulo morwa wa Kishe. Eupša ge ba mo nyaka ba se mo hwetše. 22 Ke moka ba botšiša Jehofa ba re: “Na Saulo ga se a tšwa a fihla?” Jehofa a re: “Ke yola o ikutile gare ga merwalo.” 23 Ba kitima ba yo mo tšea. Ge a ema pele ga setšhaba, o be a feta batho ka moka ka botelele, batho ba bangwe ba mo goma ka magetla. 24 Samuele a re go setšhaba ka moka: “Na le a mmona yo Jehofa a mo kgethilego, le gore ga go na yo a swanago le yena setšhabeng ka moka?” Setšhaba ka moka sa goeletša sa re: “Anke kgoši e phele go ya go ile!”
25 Samuele a botša setšhaba ka ditshwanelo tša bogoši, a di ngwala pukung gomme a e bea pele ga Jehofa. Ka morago Samuele a phatlalatša setšhaba ka moka, yo mongwe le yo mongwe a ya ntlong ya gagwe. 26 Saulo a ya legaeng la gagwe kua Gibea, a felegetšwa ke mašole ao Jehofa a ilego a tutuetša dipelo tša wona gore a sepele le yena. 27 Eupša banna ba go se re selo ba re: “Na le re motho yo o tla re phološa?” Ba mo nyatša gomme ba se mo tlišetše dimpho. Eupša Saulo yena a ikhomolela.