Puku ya Pele ya Samuele
7 Banna ba Kiriathe-jearima ba tla ba tšea Areka ya Jehofa ba e iša ntlong ya Abinadaba yeo e bego e le mmotong. Ba kgetha* Eleasara morwa wa gagwe gore a lete Areka ya Jehofa.
2 Go tloga letšatšing leo Areka e dutšego Kiriathe-jearima go ile gwa feta nako e telele e lekanago mengwaga e 20, gomme Baisiraele ka moka ba thoma go nyaka Jehofa. 3 Samuele a bolela le Baisiraele ka moka a re: “Ge e ba le boela go Jehofa ka dipelo tša lena ka moka, gona tlošang medimo e šele gare ga lena le diswantšho tša Ashiterothe. Le hlankele Jehofa ka dipelo tša lena ka moka gomme le hlankele yena a nnoši ke moka yena o tla le phološa go Bafilisita.” 4 Ge Baisiraele ba ekwa seo, ba ile ba tloša diswantšho tša Bobaali le tša Ashiterothe ba hlankela Jehofa a nnoši.
5 Ke moka Samuele a re: “Kgoboketšang Baisiraele ka moka kua Mitsipa gore ke ba rapelele go Jehofa.” 6 Ke moka ba kgobokana kua Mitsipa gomme ba ga meetse ba a tšhollela pele ga Jehofa, ba ikona dijo letšatšing leo. Ge ba le moo ba re: “Re senyeditše Jehofa.” Samuele a thoma go ba moahlodi wa Baisiraele kua Mitsipa.
7 Ge Bafilisita ba ekwa gore Baisiraele ba kgobokane kua Mitsipa, dikgoši tša Bafilisita tša ya gore di yo lwa le bona. Ge Baisiraele ba ekwa seo, ba tšhoga ka baka la Bafilisita. 8 Ka gona Baisiraele ba re go Samuele: “O se ke wa kgaotša go re rapelela go Jehofa Modimo wa rena gore a re thuše, le go re phološa go Bafilisita.” 9 Ke moka Samuele a tšea kwana e amušwago a direla Jehofa sebego sa go fišwa ka yona, gomme Samuele a kgopela Jehofa gore a thuše Baisiraele, ke moka Jehofa a mo araba. 10 Ya re ge Samuele a sa dira sebego seo sa go fišwa, Bafilisita ba batamela gore ba tle go lwa le Baisiraele. Letšatšing leo Jehofa a dira gore go kwagale modumo o mogolo lefaufaung, gomme a dira gore Bafilisita ba gakanege ke moka ba fenywa ke Baisiraele. 11 Ka nako yeo, banna ba Isiraele ba tšwa Mitsipa gomme ba rakediša Bafilisita ba tšama ba ba bolaya go ba go fihla ka borwa bja Bethe-kara. 12 Ke moka Samuele a tšea leswika a le bea magareng ga Mitsipa le Jeshana gomme a le bitša gore ke Ebenetsere,* ka gobane o be a re: “Jehofa o re thušitše go ba go fihla mo nakong ye.” 13 Ka gona, Bafilisita ba fenywa, ke moka ba se sa tla nageng ya Baisiraele, gomme ge Samuele a sa phela, Jehofa ga se a ka a dumelela Bafilisita gore ba hlasele Baisiraele. 14 Le gona, metse yeo Bafilisita ba bego ba e thopile go Baisiraele ya bušetšwa go Baisiraele go tloga ka Ekirone go fihla ka Gathe gomme Baisiraele ba boela ba hwetša naga ya bona yeo e bego e tšerwe ke Bafilisita.
Gwa ba le khutšo magareng ga Baisiraele le Baamore.
15 Samuele a ahlolela Baisiraele nakong ka moka ya ge a sa phela. 16 Ngwaga o mongwe le o mongwe o be a eya Bethele, Giligala gotee le Mitsipa gomme a ahlolela Isiraele mafelong a ka moka. 17 Ka morago o be a boela Rama, gobane ntlo ya gagwe e be e le moo. Le gona moo o be a ahlolela Isiraele. O ile a agela Jehofa aletare gona moo.