Esitere
2 Ka morago ga dilo tše, ge Kgoši Ahasiwerosi a be a išitše maswafo fase, o ile a naganišiša ka seo Wasithi a se dirilego, gotee le ka phetho yeo a bego a e dirile ya gore o tlo mo otla bjang. 2 Ke moka batho bao ba bego ba hlankela kgoši ba ile ba re: “Kgoši e swanetše go nyakelwa dikgarebe tše dibotse. 3 Le gona anke kgoši e kgethe balaodi diprofenseng ka moka tšeo e di bušago, gore ba tliše dikgarebe tše dibotse mošate wa Shushani, ntlong ya basadi. Dikgarebe tšeo di hlokomelwe ke Hekai, e lego mohlanka* wa kgoši yo a bego a hlokomela basadi ba bangwe ba kgoši, gomme di newe ditlolo tša go dira gore di be botse. 4 Kgarebe yeo e tlago go thopa pelo ya kgoši, e tla ba kgošigadi legatong la Wasithi.” Taba yeo e ile ya kgahla kgoši, gomme ya dira ka wona mokgwa woo.
5 Go be go na le monna yo mongwe wa Mojuda kua mošate wa Shushani yoo leina la gagwe e bego e le Morodekai morwa wa Jairi, e lego morwa wa Shimei morwa wa Kishe wa Mobenjamini. 6 Ge Kgoši Nebukadinetsara wa Babilona a be a thopa Kgoši Jekonia wa Juda le batho ba bangwe go tšwa Jerusalema a ba iša Babilona, Morodekai le yena o be a le gare ga bona. 7 Morodekai o be a hlokometše Hadasa, e lego Esitere, morwedi wa morwarragwe,* ka gobane Esitere o be a se na batswadi. Mosetsana yo o be a bopegile gabotse ebile a le botsana, gomme ka morago ga gore batswadi ba gagwe ba hlokofale, Morodekai o ile a mo tšea ya ba morwedi wa gagwe. 8 Ge batho ba kwele seo kgoši e se boletšego le molao wa yona, dikgarebe tše dintši di ile tša kgobokeletšwa mošate wa Shushani di hlokometšwe ke Hekai yo a bego a hlokomela basadi ba bangwe ba kgoši. Esitere e be e le yo mongwe wa dikgarebe tšeo di ilego tša išwa ntlong ya kgoši.
9 Hekai o ile a kgahlwa ke Esitere a ba a mo amogela, gomme kapejana a dira gore a hwetše ditlolo tšeo di tlago go mo dira gore e be yo mobotse kudu le dijo tšeo di mo swanetšego. Ebile a kgetha dikgarebe tše šupago ntlong ya kgoši gore di mo hlokomele. Le gona, o ile a tšea Esitere le dikgarebe tšeo di bego di mo hlokometše a ba iša lefelong le lebotsebotse ntlong ya basadi. 10 Esitere ga se a ka a bolela selo ka setšhaba sa gabo goba metswalo ya gagwe, ka gobane Morodekai o be a mo laetše gore a se ke a botša motho le ge e le ofe. 11 Letšatši le lengwe le le lengwe Morodekai o be a feta pele ga lapa la ntlo ya basadi gore a kwe gore Esitere o phetše bjang le gore go diragala eng ka yena.
12 Kgarebe e nngwe le e nngwe e ile ya fiwa nako ya gore e ye go Kgoši Ahasiwerosi ka morago ga gore e fetše dikgwedi tše 12 e tlola ka ditlolo tšeo di bego di neilwe basadi, ka gobane ye e be e le tsela yeo ba bego ba swanetše go dira ka yona gore ba fetše nako yeo ka moka ba ipotsefatša. Ba be ba swanetše go fetša dikgwedi tše tshelelago ba tlola ka makhura ao a bitšwago mira, le dikgwedi tše dingwe tše tshelelago ba tlola ka makhura ao a bitšwago balesamo, gotee le ka ditlolo tše dingwe tša mehutahuta tšeo di tlago go ba dira gore e be ba babotse. 13 Ka morago ga moo, pele kgarebe e be e ka ya go kgoši e be e newa se sengwe le se sengwe seo e bego e se kgopela ge e be e sa le ntlong ya basadi. 14 Ge e eba mantšiboa e be e eya ntlong ya kgoši, gomme mesong e boela ntlong ya bobedi ya basadi yeo e bego e hlokometšwe ke Shaashakasi yoo le yena e bego e le mohlanka* wa kgoši gomme a hlokometše basadi ba bangwe ba kgoši. Kgarebe yeo e be e ka se boele gape go kgoši ka ntle le ge e be e ka kgahla kgoši gomme ya bitšwa ka leina.
15 Go ile gwa fihla nako ya gore Esitere morwedi wa Abihaili morwarrago Morodekai, a tsene moo kgoši e bego e le gona. Morodekai o be a tšere Esitere gore e be morwedi wa gagwe. Ge Esitere a fihla go kgoši, ga se a ka a kgopela selo ka ntle le seo Hekai mohlanka wa kgoši, yoo a bego a hlokomela basadi ba bangwe ba kgoši, a bego a mmoditše sona. (Nakong yeo ka moka Esitere o be a kgahla batho ka moka bao ba bego ba mmona.) 16 Ke moka Esitere a išwa go Kgoši Ahasiwerosi ntlong ya gagwe ya bogoši ka kgwedi ya lesome, e lego kgwedi ya Tebethe, ka ngwaga wa bošupa wa ge a buša. 17 Kgoši e ile ya kgahlwa ke Esitere go feta dikgarebe tše dingwe ka moka, moo e ilego ya mo rata le go mo amogela go feta dikgarebe tše dingwe ka moka. Ke moka e ile ya mo rweša tuku ya ka bogošing hlogong, gomme ya mo dira kgošigadi legatong la Wasithi. 18 Kgoši e ile ya direla Esitere monyanya o mogolo gomme ya mema dintona tša yona ka moka le bahlanka ba yona. E ile ya lokolla diprofense ka moka gomme ya ntšha dimpho go ya kamoo e bego e kgona ka gona.
19 Ge dikgarebe tšeo di be di kgoboketšwa ka lekga la bobedi, Morodekai o be a dutše keiting ya ka mošate. 20 Esitere ga se a ka a bolela selo ka meloko ya gabo le setšhaba sa gabo, go etša ge Morodekai a be a mo laetše. O ile a no tšwela pele a dira seo Morodekai a bego a mmoditše sona, fela bjalo ka ge a be a dira bjalo nakong ya ge Morodekai a be a sa mo hlokometše.
21 Mehleng yeo ge Morodekai a be a dutše keiting ya ka mošate ka ge a be a hlankela kgoši, bahlanka ba bangwe ba babedi ba kgoši e lego Bigithani le Thereshe, bao ba bego ba leta mejako, ba ile ba galefa gomme ba loga leano la go bolaya Kgoši Ahasiwerosi. 22 Eupša Morodekai o ile a kwa ka taba yeo gomme gateetee a botša Kgošigadi Esitere. Ke moka Esitere a botša kgoši taba yeo a e kwelego go Morodekai. 23 Ka gona taba yeo e ile ya nyakišišwa, gomme mafelelong gwa hwetšwa gore e be e le nnete, ke moka banna bao ba babedi ba ile ba fegwa koteng. Ka morago ga moo taba ye e ile ya ngwalwa ka pukung ya ditaba tša mehleng yeo, gomme ya ngwalwa kgoši e le gona.