Esitere

7 Ke moka kgoši le Hamani ba tla ba ja le Kgošigadi Esitere. 2 Bjale kgoši ya bolela gape le Esitere letšatšing la bobedi nakong ya ge ba be ba enwa beine* ya re: “O re o kgopela eng Kgošigadi Esitere? O tla newa seo o se kgopelago. Ke eng seo o se kgopelago? Le ge o ka kgopela seripa sa mmušo wa ka, o tla se newa!” 3 Ke moka Kgošigadi Esitere a araba a re: “Ge e ba o nkamogela wena kgoši ebile o bona se se lokile, ke kgopela gore o phološe bophelo bja ka ebile o phološe le setšhaba sa gešo. 4 Ka gobane nna le setšhaba sa gešo re rekišitšwe gore re fedišwe re be re bolawe. Ge nkabe re be re rekišitšwe gore re fo ba makgoba a banna le a basadi, ke be ke tla no homola. Eupša masetlapelo a ga se a swanela go dumelelwa, ka gobane a tla dira gore le kgoši e lahlegelwe.”

5 Bjale Kgoši Ahasiwerosi a bolela le Kgošigadi Esitere a re: “Ke mang motho yo a nago le sebete sa go dira dilo tša mohuta woo, le gona o kae motho yoo?” 6 Ke moka Esitere a re: “Lenaba la rena ke monna yo yo mobe, e lego Hamani.”

Ge e le Hamani yena o ile a tšhoga kudu, a gakanega pele ga kgoši le kgošigadi. 7 Ke moka kgoši ya ema e galefile nakong ya ge go be go nwewa beine, gomme ya ya lapeng la ka mošate. Hamani yena o ile a emelela a kgopela Kgošigadi Esitere gore a mo gaugele e le gore a se tlo bolawa, ka gobane o be a bone gore kgoši e be e ka se mo tlogele e se ya mo otla. 8 Ke moka kgoši ya boela moo go bego go nwewa beine gona, gomme ya bona Hamani a itahletše sofeng yeo Esitere a bego a dutše go yona. Ka gona kgoši ya bolela e galefile ya re: “Ke eng tše, bjale o nyaka le go kata kgošigadi ka ntlong ya ka?” Gateetee ka morago ga gore kgoši e fetše go bolela, bahlanka ba kgoši ba khupetša sefahlego sa Hamani. 9 Bjale Haribona, e lego yo mongwe wa bahlanka ba ka mošate a re: “Ebile go na le kota yeo Hamani a e diretšego Morodekai yo a ilego a šireletša kgoši. Kota yeo e hlomilwe ntlong ya Hamani gomme ke ya botelele bja dimithara tše 22.”* Ge kgoši e ekwa seo ya re: “Mo fegeng go yona.” 10 Ka gona ba fega Hamani koteng yeo a bego a e diretše Morodekai, ke moka ya ba gona kgoši e išago maswafo fase.