Esitere

8 Letšatšing leo, Kgoši Ahasiwerosi o ile a nea Kgošigadi Esitere ntlo ya Hamani yo e bego e le lenaba la Bajuda. Morodekai yena o ile a tla pele ga kgoši ka gobane Esitere o be a boditše kgoši gore Morodekai o tswalana bjang le yena. 2 Kgoši ya tšea palamonwana ya yona yeo e bego e e amogile Hamani gomme ya e nea Morodekai, ke moka Esitere a bea Morodekai gore a hlokomele ntlo yeo ya Hamani.

3 Le gona, Esitere o ile a bolela le kgoši gape. O ile a wela fase pele ga dinao tša yona a lla, gomme a kgopela gore e thibele leano le lebe leo Hamani wa Moagaga a bego a le logetše Bajuda. 4 Kgoši ya šupa Esitere ka molamo wa gauta, ke moka Esitere a tsoga a ema pele ga kgoši. 5 Esitere a re: “Ge e ba kgoši e nkamogela, e bona se se lokile ebile e thabišwa ke se, anke go ngwalwe mangwalo ao a laelago gore go phumolwe mangwalo ao a bego a ngwadilwe leano le lebe la Hamani morwa wa Hamedatha wa Moagaga, e lego mangwalo ao a bego a laela gore go fedišwe Bajuda diprofenseng ka moka tša kgoši. 6 Ka gobane nka kgotlelela bjang go bona masetlapelo ao a tlago go wela setšhaba sa gešo, le gona nka kgotlelela bjang go bona batho ba gešo ba fedišwa?”

7 Ka gona Kgoši Ahasiwerosi a botša Kgošigadi Esitere le Morodekai wa Mojuda a re: “Tsebang gore ntlo ya Hamani ke e neile Esitere gomme Hamani yena ke laetše gore a fegwe koteng ka baka la leano la gagwe la go nyaka go bolaya Bajuda. 8 Lena ngwalang selo le ge e le sefe seo le bonago se lokile ka leina la kgoši legatong la Bajuda, gomme le se tiiše ka go se kgatla ka setempe sa palamonwana ya kgoši, ka gobane taelo le ge e le efe yeo e ngwadilwego ka leina la kgoši gomme ya kgatlwa ka setempe sa palamonwana ya kgoši, e ka se ke ya fetošwa.”

9 Ka gona ka di-23 tša kgwedi ya boraro, e lego kgwedi ya Sibane, bangwaledi ba kgoši ba ile ba bitšwa ka yona nako yeo, gomme ba ngwala dilo ka moka tšeo Morodekai a di laetšego Bajuda, balaodi, bakgomana le dintona tša diprofense tša go tloga ka India go fihla ka Ethopia, e lego diprofense tše 127. Profense e nngwe le e nngwe ya ngwalelwa ka mokgwa wa yona wa go ngwala, gomme setšhaba se sengwe le se sengwe sa ngwalelwa ka leleme la gabo sona. Bajuda le bona ba ngwalelwa ka mokgwa wa bona wa go ngwala le ka leleme la gabo bona.

10 Morodekai o ile a laela gore mangwalo ao a ngwalwe ka leina la Kgoši Ahasiwerosi a ba a a tiiša ka setempe sa palamonwana ya kgoši, ke moka a romela mangwalo ao ka batho bao ba bego ba ba roma ba go sepela ka dipere. Batho bao ba be ba sepela ka dipere tša go sepediša mangwalo tšeo di nago le lebelo tša ka bogošing. 11 Ka mangwalong ao kgoši e be e dumeletše Bajuda ba metseng ka moka gore ba kgobokane gomme ba itwele gore ba phološe maphelo a bona, ba fediše mašole ka moka a ditšhaba goba diprofense tšeo di bego di ka ba hlasela, ba a bolaye. Ba be ba bolaye le basadi le bana, ebile ba ba tšeele dithoto tša bona. 12 Ba be ba swanetše go dira seo ka moka ka letšatši letee diprofenseng ka moka tša Kgoši Ahasiwerosi, ka di-13 tša kgwedi ya bo-12, e lego kgwedi ya Adara. 13 Ditaba tša ka lengwalong leo di be di swanetše go ntšhiwa e le molao diprofenseng ka moka. Molao woo o be o swanetše go newa ditšhaba ka moka, e le gore Bajuda ba tle ba itokišeletše letšatši leo, ba itefeletše go manaba a bona. 14 Batho bao ba bego ba romilwe go sepediša mangwalo bao ba bego ba nametše dipere tša ka mošate, ba ile ba tloga ka lebelo la mmutla, gomme ba se senye nako go ya ka taelo ya kgoši. Molao woo o ile wa ntšhiwa le mošate wa Shushani.

15 Bjale Morodekai o ile a tloga pele ga kgoši a apere seaparo sa bogoši sa mmala o motalalerata le o mošweu, a rwele mphapahlogo o mogolo wa gauta, a apere le seaparo se sengwe sa lešela le lebotse la mmala o mophepolo. Ge e le motse wa Shushani wona o ile wa goelela o thabile kudu. 16 Bajuda ba be ba imologile, ba thabile kudu ebile ba ikwa ba na le seriti. 17 Bajuda ba be ba thabile wa go se lekanywe le selo diprofenseng ka moka le metseng ka moka kae le kae moo taelo le molao wa kgoši di ilego tša fihla gona, go ketekwa menyanya. Merafo e mentšhi ya nageng yeo e be e ipitša Bajuda, ka gobane e be e boifa Bajuda.