Esitere

9 Ka di-13 tša kgwedi ya bo-12, e lego kgwedi ya Adara, go be go fihlile nako ya gore molao wa kgoši le seo e se boletšego se direge. E be e le letšatši leo manaba a Bajuda a bego a nagana gore a tla ba fenya, eupša dilo di ile tša fetoga ka gobane Bajuda ke bona ba ilego ba fenya manaba a bona. 2 Bajuda ba ile ba kgobokana metseng ya bona diprofenseng ka moka tša Kgoši Ahasiwerosi gore ba lwe le bao ba bego ba nyaka go ba gobatša, gomme go be go se na motho le o tee yo a ilego a kgona go ba fenya, ka gobane ditšhaba ka moka di be di ba boifa. 3 Dintona ka moka tša diprofense, balaodi, bakgomana le batho ka moka bao ba bego ba dira mešomo ya ka mošate ba be ba thuša Bajuda, ka gobane ba be ba tšhaba Morodekai. 4 Morodekai o be a na le maemo a godimo ka mošate, gomme o ile a thoma go tuma diprofenseng ka moka, ka gobane matla ao a bego a na le ona mmušong a be a oketšega.

5 Bajuda ba ile ba hlasela manaba a bona ka moka ka sabola, ba a bolaya ba ba ba a fediša. Ba ile ba dira selo le ge e le sefe seo ba se ratago ka batho bao ba ba hloilego. 6 Kua mošate wa Shushani, Bajuda ba ile ba bolaya le go fediša banna ba 500. 7 Le gona ba ile ba bolaya le Parashanadatha, Dalifoni, Asipatha, 8 Poratha, Adalia, Aridatha, 9 Paramashita, Arisai, Aridai le Bayesatha, 10 e lego barwa ba lesome ba Hamani morwa wa Hamedatha, yo e bego e le lenaba la Bajuda. Eupša ka morago ga gore ba ba bolaye ga se ba ka ba tšea dithoto tša bona.

11 Letšatšing leo kgoši e ile ya botšwa palo ya bao ba bolailwego mošate wa Shushani.

12 Kgoši ya botša Kgošigadi Esitere ya re: “Kua mošate wa Shushani, Bajuda ba bolaile le go fediša banna ba 500 gotee le barwa ba lesome ba Hamani. Ba bolaile batho ba bakae diprofenseng tše dingwe? Bjale ke eng seo o se nyakago? Mpotše ke tla go nea sona. Le gona, ke eng seo o se kgopelago? O tla se hwetša.” 13 Esitere a re: “Ge e ba wena kgoši o bona se se lokile, gona anke gosasa Bajuda bao ba lego Shushani ba dumelelwe go itwela go swana le ge ba dirile lehono, le gona anke barwa ba lesome ba Hamani ba fegwe koteng.” 14 Kgoši e ile ya laela gore go dirwe ka tsela yeo. Ka morago ga gore kgoši e ntšhe taelo yeo Shushani, barwa ba lesome ba Hamani ba ile ba fegwa koteng.

15 Bajuda bao ba bego ba le Shushani le bona ba ile ba kgobokana gape ka di-14 tša kgwedi ya Adara, gomme ba bolaya banna ba 300 moo Shushani, eupša ba se tšee dithoto tša bona.

16 Ge e le Bajuda ka moka bao ba bego ba le diprofenseng tša kgoši le bona ba ile ba kgobokana, gomme ba lwa gore ba phološe maphelo a bona. Ba ile ba bolaya manaba a bona a 75 000, eupša ba se tšee dithoto tša ona. 17 Seo se diragetše ka di-13 tša kgwedi ya Adara, ke moka ka di-14 ba khutša, ya ba letšatši la monyanya.

18 Bajuda bao ba bego ba le Shushani ba ile ba kgobokana ka di-13 le ka di-14, ke moka ka di-15 ba khutša, ya ba letšatši la monyanya. 19 Ke ka baka leo Bajuda bao ba bego ba dula dinagamagaeng, e lego bao ba bego ba dula metsaneng ya ka ntle ga mošate, ba bego ba dira monyanya ka di-14 tša kgwedi ya Adara, ebile leo e be e le letšatši la go thaba le nako ya go fana dijo.

20 Morodekai o ile a ngwala ditiragalo tše gomme a romela mangwalo go Bajuda ka moka bao ba bego ba le diprofenseng ka moka tša Kgoši Ahasiwerosi, ba kgole le kgauswi. 21 O ile a ba laela gore ngwaga o mongwe le o mongwe ba keteke letšatši la bo-14 le la bo-15 la kgwedi ya Adara, 22 ka gobane ka matšatši ao Bajuda ba ile ba ikhutša manaba a bona, gomme kgweding yeo manyami a bona a fetoga lethabo, le sello sa bona sa fetoga lethabo. Ba be ba swanetše go a gopola e le matšatši a monyanya le a go thaba, le nako ya go fana dimpho tša dijo le go fa badiidi dimpho.

23 Bajuda ba ile ba dumela go tšwela pele ka monyanya wo ba bego ba šetše ba o thomile, gomme ba dira seo Morodekai a bego a ba ngwaletše sona. 24 Ka gobane Hamani morwa wa Hamedatha wa Moagaga, yena lenaba la Bajuda ka moka, o be a logile maanomabe a go fediša Bajuda, ebile a dirile letengwa leo le bitšwago Puri, gore a ba hlakahlakanye a be a ba fediše. 25 Eupša ge Esitere a be a tlile pele ga kgoši, kgoši e ile ya ntšha taelo ka lengwalo ya re: “Anke maanomabe ao a bego a a logetše Bajuda a wele yena,” ke moka ba ile ba fega yena le barwa ba gagwe koteng. 26 Ke ka baka leo ba ilego ba bitša matšatši ao ba re ke Purimi, ba a reela ka leina la letengwa leo le bitšwago Puri. Ka gona, ka baka la dilo ka moka tšeo di bego di ngwadilwe ka lengwalong le, le dilo tšeo ba di bonego mabapi le taba ye, gotee le dilo tšeo di ba diragaletšego, 27 Bajuda ba ile ba itlama gore ba tla keteka matšatši ao a mabedi. Seo se be se tla dirwa ke bona, ditlogolo tša bona le batho ka moka bao ba tla bago le bona ge ba keteka matšatši ao, ebile ba be ba tlo dira dilo ka moka tšeo di ngwadilwego mabapi le ona ka nako e beilwego ngwaga o mongwe le o mongwe. 28 Matšatši ao a be a swanetše go gopolwa le go ketekwa molokong o mongwe le o mongwe, lapeng le lengwe le le lengwe, profenseng e nngwe le e nngwe le motseng o mongwe le o mongwe. Le gona Bajuda le ditlogolwana tša bona, ba be ba se ba swanela go tlogela go keteka matšatši ao a Purimi.

29 Kgošigadi Esitere, e lego morwedi wa Abihaili, yena le Morodekai wa Mojuda ba ile ba diriša matla a bona go ngwala lengwalo la bobedi leo le bolelago ka Purimi, e le gore Bajuda ba hlomphe matšatši ao. 30 Ke moka Morodekai o ile a romela mangwalo go Bajuda ka moka ba diprofenseng tše 127 mmušong wa Ahasiwerosi. Mangwalo ao a be a na le molaetša wa khutšo le mantšu a nnete, 31 go tiišetša gore matšatši ao a Purimi a tla dula a gopolwa ka dinako tša ona tšeo di beilwego, fela bjalo ka ge Morodekai wa Mojuda le Kgošigadi Esitere ba be ba ba laetše gore ba dire bjalo, le go ya kamoo ba ilego ba itlama gore bona le ditlogolwana tša bona ba tla dira seo, le gore ba tla itima dijo le go kgopela Modimo gore a ba thuše. 32 Taelo ya Esitere e ile ya tiišetša ditaba tše tša mabapi le Purimi gomme ya ngwalwa ka pukung.