Esitere

5 Ka letšatši la boraro Esitere o ile a apara diaparo tša ka bogošing, gomme a ema lapeng la ka gare la ka mošate go lebana le ntlo ya kgoši. Kgoši yona e be e dutše setulong sa yona sa bogoši go lebana le mojako wa ntlo. 2 Ge kgoši e bona Kgošigadi Esitere a eme ka lapeng, e ile ya thabela go mmona gomme ya mo šupa ka molamo wa gauta woo e bego e o swere. Ke moka Esitere o ile a batamela a kgwatha hlogwana ya molamo woo.

3 Kgoši e ile ya mmotšiša ya re: “Bothata ke eng Kgošigadi Esitere? O nyaka ke go fa eng? Le ge o ka kgopela seripa sa mmušo wa ka, ke tla go nea sona!”* 4 Esitere a re: “Ge e ba kgoši e bona go lokile, ke kgopela gore wena kgoši o tle le Hamani dijong tšeo ke tlago go go direla tšona lehono.” 5 Ka gona kgoši ya botša bahlanka ba yona ya re: “Botšang Hamani a tle mo ka pela, go ya le kamoo Esitere a kgopelago.” Ke moka kgoši le Hamani ba ya dijong tšeo Esitere a bego a ba diretše tšona.

6 Ka moragonyana ge ba be ba enwa beine, kgoši e ile ya botšiša Esitere ya re: “O kgopela eng? O tla newa selo seo o se kgopelago. Mpotše gore o nyaka ke go fa eng. Le ge o ka kgopela seripa sa mmušo wa ka, ke tla go nea sona!” 7 Esitere a araba a re: “Se ke se kgopelago ke se: 8 Ge e ba wena kgoši o nkamogela ebile o bona go lokile go nnea seo ke se kgopelago, gona ke kgopela o tle le Hamani dijong tšeo ke tlago go le direla tšona gosasa, gomme ke tla dira selo seo kgoši e se bolelago gosasa.”

9 Letšatšing leo Hamani o ile a sepela a thabile ebile pelo ya gagwe e le e tšhweu. Eupša ge Hamani a bona Morodekai keiting ya ka mošate, le gona a lemoga gore ga se a ema ebile ga se a tšhoga ge a mmona, Hamani o ile a galefela Morodekai kudu. 10 Eupša Hamani o ile a itshwara gomme a ya ntlong ya gagwe. Ke moka a romela molaetša gore go bitšwe bakgotse ba gagwe le Seresha mosadi wa gagwe. 11 Hamani a ba kgantšhetša ka mahumo a gagwe, kamoo a nago le barwa ba bantši, kamoo a ilego a hlatlošetšwa maemong a godimo, gotee le kamoo kgoši e mo neilego maemo ao a fetago a dintona le a bahlanka ba yona.

12 Hamani a oketša ka gore: “Ga go felele moo, Kgošigadi Esitere ga se a mema motho ge e se nna feela, gore ke tle le kgoši dijong tšeo a di dirilego. Ebile le gosasa o mmemile gape gore ke tle ke be le yena le kgoši. 13 Eupša dilo tše ka moka ga di nkgahle ge ke sa dutše ke bona Morodekai yoo wa Mojuda a dutše keiting ya ka mošate.” 14 Ka gona Seresha mosadi wa Hamani le bakgotse ba gagwe ka moka ba re go yena: “A go dirwe kota ya botelele bja dimithara tše 22.* Ke moka mesong o botše kgoši gore Morodekai a fegwe go yona. Ka morago ga moo, wena o sepele le kgoši le yo ipshina ka dijo.” Taba yeo ya kgahla Hamani kudu, ke moka a laela gore kota yeo e dirwe.