Hesekiele

36 “Wena morwa wa motho, porofeta mabapi le dithaba tša Isiraele o re: ‘Lena dithaba tša Isiraele, ekwang seo Jehofa a se bolelago. 2 Mmuši Morena Jehofa o re: “Lenaba le boletše ka wena la re: ‘O swinegile! Le mafelo a phagamego a kgale re a tšere gore e be a rena.’”’

3 “Bjale porofeta o re: ‘Mmuši Morena Jehofa o re: “Ka ge ba dirile gore o be lešope ebile ba go hlasela ka mathokong ka moka, e le gore mo go wena go tle go dule batho bao ba phologilego bao ba tšwago ditšhabeng, le gona batho ba dulele go bolela gampe ka wena, 4 ka gona lena dithaba tša Isiraele, ekwang seo Mmuši Morena Jehofa a se bolelago! Mmuši Morena Jehofa o bolela le dithaba le meboto, dinokana le meedi, mašope ao a sentšwego le metse yeo e se sa nago batho yeo batho bao ba phologilego ditšhabeng tšeo di e dikologilego ba e kwerilego ba ba ba e tšeela dilo. 5 Ka gona Mmuši Morena Jehofa o bolela le dilo tše o re: ‘Ke tla bolela ke galefile gore ke ahlole batho bao ba šetšego ditšhabeng le batho ka moka ba Edomo, bao ba ilego ba tšea naga ya ka gore e be ya bona ba thabile ebile ba bolela dikwero, ba tšea le mafelo ao diruiwa di fulago go ona ba ba ba thopa naga.’”’

6 “Ka gona porofeta mabapi le naga ya Isiraele, o botše dithaba le meboto, dinokana le meedi o re: ‘Mmuši Morena Jehofa o re: “Ke tla bolela ke galefile ebile ke befetšwe, ka gobane ditšhaba di le tlontlolotše.”’

7 “Mmuši Morena Jehofa o re: ‘Nna ke ena ke emišitše seatla sa ka gore tšona ditšhaba tše di le dikologilego, le tšona di tla tlontlollwa. 8 Eupša lena dithaba tša Isiraele, le tla ba le mehlare yeo e tlago go tšweletša makala a mantši le dienywa tše dintši bakeng sa batho ba ka ba Isiraele, ka gobane ba kgauswi le go boa. 9 Ke na le lena, ke tla le thekga, ebile mo go lena go tla lengwa gwa bjalwa peu. 10 Lena Baisiraele ka moka, ke tla dira gore le be ba bantši, gomme mo metseng go tla ba le batho bao ba dulago ebile marope a tla agwa leswa. 11 Ke tla dira gore lena le diruiwa tša lena le oketšege. Le tla ba ba bantši gomme le diruiwa tša lena di tla tswala ya ba tše dintši. Ke tla dira gore mo go lena go be le batho bao ba dulago go swana le peleng, ka ba ka dira gore dilo di le sepelele gabotse go feta mathomong. Ke moo le tlago go tseba gore ke nna Jehofa. 12 Ke tla dira gore batho ba ka ba Isiraele ba sepele mo go lena, gomme ba tla le tšea. Le tla ba bohwa bja bona, ebile le ka se sa ba tšeela bana ba bona.’”

13 “Mmuši Morena Jehofa o re: ‘Ka baka la ge ba re go lena: “Le naga yeo e fedišago batho le yeo e amogago ditšhaba bana,”’ 14 ‘ka gona le ka se sa fediša batho goba la tšeela ditšhaba bana,’ o realo Mmuši Morena Jehofa. 15 ‘Nka se sa dumelela ditšhaba di bolela ka lena ka lenyatšo goba di le goboša, ebile le ka se sa dira gore ditšhaba tša lena di welwe ke mathata,’ o realo Mmuši Morena Jehofa.”

16 Jehofa o ile a bolela le nna gape a re: 17 “Morwa wa motho, ge Baisiraele ba be ba dula nageng ya bona ba ile ba e šilafatša ka tsela yeo ba bego ba phela ka yona le ka dilo tšeo ba bego ba di dira. Tsela yeo ba bego ba phela ka yona e be e se ya hlweka go swana le ge mosadi a se a hlweka ge a bona kgwedi. 18 Ke ile ka ba galefela kudu ka gobane ba bolaile batho ba bantši mo nageng, ebile ba šilafaditše naga ka medingwana ya bona e šišimišago. 19 Ke ile ka ba gašanya gare ga ditšhaba ka ba ka ba phatlalaletša dinageng tše dingwe. Ke ile ka ba ahlola go ya ka tsela yeo ba bego ba phela ka yona le go ya ka dilo tšeo ba bego ba di dira. 20 Eupša ge ba fihla ditšhabeng tšeo, batho ba ile ba bolela gampe ka leina la ka le lekgethwa ka go bolela ka bona ba re: ‘Ba ke batho ba Jehofa, eupša ba ile ba swanelwa ke go tloga nageng ya gagwe.’ 21 Ke tla lwela leina la ka le lekgethwa leo Baisiraele ba le šilafaditšego gare ga ditšhaba tšeo ba ilego go tšona.”

22 “Ka gona botša Baisiraele o re: ‘Mmuši Morena Jehofa o re: “Lena Baisiraele, ga ke dire dilo tše ka baka la lena, eupša ke di dira ka baka la leina la ka le lekgethwa leo le le šilafaditšego gare ga ditšhaba tšeo le ilego go tšona.”’ 23 ‘Ke tla dira gore leina la ka le legolo leo le le šilafaditšego gare ga ditšhaba e be le lekgethwa, gomme ditšhaba di tla tseba gore ke nna Jehofa ge ke kgethagatšwa gare ga lena tšona di lebeletše,’ o realo Mmuši Morena Jehofa. 24 ‘Ke tla le ntšha ditšhabeng, ka le kgoboketša go tšwa dinageng ka moka gomme ka le tliša nageng ya lena. 25 Ke tla le gaša ka meetse a hlwekilego gomme la hlweka. Ke tla le hlwekiša ditšhileng tša lena ka moka ka ba ka tloša medingwana ya lena ka moka e šišimišago. 26 Ke tla le nea pelo e mpsha, ka ba ka fetoša tsela yeo le naganago ka yona. Ke tla ntšha dipelo tše di lego thata bjalo ka leswika mo go lena gomme ka le nea dipelo tše boleta. 27 Ke tla diriša moya wa ka go fetoša tsela yeo le naganago ka yona, ka dira gore le phele ka go dumelelana le ditaelo tša ka, gomme le tla dira dilo ka go dumelelana le melao ya ka. 28 Ke moka le tla dula nageng yeo ke e neilego borakgolokhukhu ba lena, le tla ba batho ba ka gomme nna ka ba Modimo wa lena.’

29 “‘Ke tla dira gore le se sa šilafala, ka dira gore mabele e be a mantši, ebile nka se le tlišetše tlala. 30 Ke tla dira gore mehlare e be le dienywa tše dintši le gore le bune dilo tše dintši mašemong, e le gore le se sa tlontlollwa ke ditšhaba ka baka la ge le bolawa ke tlala. 31 Le tla gopola tsela e mpe yeo le bego le itshwere ka yona le dilo tše di sa lokago tšeo le bego le di dira. Ke moka le tla itšhišingwa ka baka la melato ya lena le ka baka la dilo tše di šišimišago tšeo le bego le di dira. 32 Eupša tsebang gore ga ke dire dilo tše ka baka la lena,’ o realo Mmuši Morena Jehofa. ‘Bjale lena Baisiraele, hlabjang ke dihlong le be le inyatše ka baka la dilo tšeo le di dirilego.’

33 “Mmuši Morena Jehofa o re: ‘Mohlang ke le hlwekiša melatong ya lena ka moka, ke tla dira le gore go be le batho bao ba dulago mo metseng gomme marope a tla agwa leswa. 34 Naga yeo motho yo mongwe le yo mongwe yo a fetago ka tsela a bego a bona gore ke lešope, e tla lengwa. 35 Batho ba tla re: “Naga yela e bego e le lešope bjale e swana le serapa sa Edene, le gona metse yeo e bego e senyegile, e le mašope ebile e phušotšwe, bjale e šireletšegile ebile go na le batho bao ba dulago go yona.” 36 Ditšhaba tšeo di tlago go šala di go dikologile di tla tseba gore nna Jehofa ke agile mafelo ao a bego a phušotšwe, gomme ke bjetše mo e bego e le mašope. Nna Jehofa ke boletše ebile ke dirile dilo tšeo.’

37 “Mmuši Morena Jehofa o re: ‘Le gona ke tla dumelela Baisiraele gore ba nkgopele gore ke ba dire gore e be ba bantši bjalo ka mohlape. 38 Metse yeo e bego e senyegile e tla tlala ka batho go swana le lešaba la batho ba bakgethwa le go swana le mohlape wa Jerusalema dinakong tša menyanya ya yona. Ke moo batho ba tlago go tseba gore ke nna Jehofa.’”