Puku ya Pele ya Dikoronika
17 Ge Dafida a se na go dula ka ntlong ya gagwe, o ile a botša moporofeta Nathane a re: “Nna ke dutše ka ntlong* ya go dirwa ka dikota tša metsedara, mola areka ya kgwerano ya Jehofa e dutše ka tenteng.” 2 Nathane a re go Dafida: “Dira se sengwe le se sengwe seo pelo ya gago e nyakago go se dira, ka gobane Modimo wa nnete o na le wena.”
3 Bošegong bjoo Modimo a bolela le Nathane a re: 4 “Sepela o yo botša Dafida mohlanka wa ka o re: ‘Jehofa o re: “Ga se wena o tlago go nkagela ntlo yeo ke tlago go dula go yona. 5 Ka gobane ga se ka ka ka dula ka ntlong go tloga letšatšing leo ke ntšhitšego Baisiraele nageng ya Egepeta go ba go fihla le lehono, eupša ke be ke dula ke tloga tenteng e nngwe ke eya go e nngwe le go tloga taberenakeleng e nngwe ke eya go e nngwe. 6 Nako ye ka moka ge ke be ke sepela le Baisiraele ka moka, na nkile ka botša yo mongwe wa baahlodi ba Isiraele, yoo ke mo kgethilego gore a hlokomele* setšhaba sa ka ka re: ‘Ke ka baka la eng le se la ka la nkagela ntlo ya go dirwa ka dikota tša metsedara?’”’
7 “O botše Dafida mohlanka wa ka o re: ‘Jehofa wa madira o re: “Ke go tšere madišong o diša dinku gore o tle o be moetapele wa setšhaba sa ka sa Isiraele. 8 Ke tla ba le wena kae le kae mo o yago gona, ka fediša manaba a gago ka moka pele ga gago e bile ke tla go direla leina le legolo go etša leina la ba ba tumilego ba mo lefaseng. 9 Ke tla kgethela setšhaba sa ka sa Isiraele lefelo leo se tlago go dula go lona, gomme se tla dula moo sa se sa tshwenywa ke motho. Batho ba babe ba ka se sa se gatelela go etša ge ba ile ba dira bjalo peleng, 10 go tloga letšatšing leo ke kgethetšego Isiraele baahlodi. Le gona ke tla fenya manaba a gago ka moka. Go oketša moo, ke re go wena: ‘Jehofa o tla go agela ntlo.’*
11 “‘“Ge o le kgauswi le go hlokofala,* ke tla dira gore yo mongwe wa barwa* ba gago e be kgoši gomme ka tiiša mmušo wa gagwe. 12 Ke yena a tlago go nkagela ntlo gomme ke tla tiiša mmušo wa gagwe go ya go ile. 13 Nna ke tla ba tatagwe gomme yena e tla ba morwa wa ka. Nka se kgaotše go mmontšha lerato* go etša ge ke ile ka kgaotša go le bontšha kgoši yeo e bilego gona pele ga gago. 14 Ke tla mo dira gore a dule setulong sa ka sa bogoši go ya go ile. Le gona o tla dula a buša gomme leloko la gagwe la bogoši le tla dula le le gona go ya go ile.”’”
15 Nathane o ile a botša Dafida dilo ka moka tšeo Modimo a mmoditšego tšona le go mmontšha tšona.
16 Ka morago ga moo, Kgoši Dafida a tla a dula pele ga Jehofa, a re: “Wena Jehofa Modimo, ke nna mang? Le gona ntlo ya ka ke eng ge o bile o mphihlišitše kgole ka mokgwa wo? 17 Go oketša moo, wena Modimo wa ka, o bile o re ntlo ya mohlanka wa gago e tla dula e le gona ka nako e telele gomme o ntebeletše okare ke nna monna wa maemo a godimo wena Jehofa Modimo. 18 Bjale nna Dafida mohlanka wa gago nka oketša ka goreng, mola e le wena o ntsebago gabotse? 19 Wena Jehofa, o dirile dilo tše tše dikgolo ka baka la nna mohlanka wa gago le ka go dumelelana le pelo ya gago.* 20 Wena Jehofa, ga go na yo a swanago le wena, e bile ga go na Modimo yo mongwe ka ntle le wena, gomme dilo ka moka tšeo re di kwelego di tiišetša seo. 21 Ke setšhaba sefe se sengwe lefaseng seo se swanago le setšhaba sa gago sa Isiraele? Wena Modimo wa nnete o ile wa se lopolla gore e be setšhaba sa gago. O ile wa itirela leina ka go dira dilo tše dikgolo le tšeo di boifišago. Wa raka ditšhaba pele ga batho ba gago bao o ba lopolotšego Egepeta. 22 O dirile setšhaba sa Isiraele gore e be setšhaba sa gago go ya go ile, gomme wena Jehofa wa ba Modimo wa sona. 23 Bjale hle Jehofa, anke seo o se boletšego ka mohlanka wa gago le ba ntlo ya gagwe se dule se le bjalo go ya go ile gomme o dire dilo ka moka tšeo o di tshepišitšego. 24 Anke leina la gago le hlomphiwe go ya go ile, gore batho ba tle ba re: ‘Jehofa wa madira, yena Modimo wa Isiraele, ke yena Modimo yo a bušago Isiraele.’ Le gona anke pušo ya Dafida mohlanka wa gago e dule e tiile pele ga gago. 25 Ka gobane wena Modimo wa ka o utolletše nna mohlanka wa gago gore o tlo nkagela ntlo.’* Ke ka baka leo nna mohlanka wa gago ke nago le sebete sa go rapela thapelo ye. 26 Wena Jehofa, o Modimo wa nnete, gomme o boletše dilo tše tšeo di kgahlišago ka nna mohlanka wa gago. 27 Bjale anke o kgahlišwe ke go šegofatša ntlo ya mohlanka wa gago, le gona anke e dule e le gona go ya go ile ka gobane wena Jehofa o e šegofaditše, gomme e tla šegofala go ya go ile.”