Puku ya Pele ya Dikoronika
16 Ka gona ba tliša Areka ya Modimo wa nnete ba e bea ka tenteng yeo Dafida a bego a e diretše yona. Ba neela dibego tša go fišwa le dihlabelo tša go dira khutšo pele ga Modimo wa nnete. 2 Ge Dafida a feditše go neela dibego tša go fišwa le dihlabelo tša go dira khutšo le Modimo, a šegofatša batho ka moka ka leina la Jehofa. 3 Ke moka a tšea senkgwa sa nkgokolo, kuku yeo e dirilwego ka dienywa tša mohlare wa mopalema le kuku yeo e dirilwego ka diterebe tšeo di omišitšwego, a di fa monna yo mongwe le yo mongwe le mosadi yo mongwe le yo mongwe wa Moisiraele. 4 Ke moka a kgetha ba bangwe ba Balefi gore ba hlankele pele ga Areka ya Jehofa, e le gore ba hlomphe Jehofa Modimo wa Isiraele, ba mo leboge le go mo tumiša. 5 Asafa e be e le moetapele gomme a latelwa ke Sakaria, ke moka Jeiele, Shemiramothe, Jehiele, Matitia, Eliaba, Benaya, Obede-edomo le Jeiele ba be ba letša diletšo tša metato le diharepa gomme Asafa a letša disimbala. 6 Benaya le Jahasiele bao e lego baperisita, ba be ba dula ba letša diphalafala ba le pele ga areka ya kgwerano ya Modimo wa nnete.
7 Letšatši leo e be e le la mathomo Dafida a laela Asafa le banababo go opelela Jehofa koša ya go leboga yeo a e hlamilego. Ba ile ba opela ba re:
8 “Lebogang Jehofa, bitšang leina la gagwe,
Tsebišang ditšhaba ka dilo tšeo a di dirilego!
9 Mo opeleleng, mo opeleleng dikoša tša go mo reta,
Naganišišang* ka mediro ya gagwe ka moka e mebotse.
10 Ikgantšheng ka leina la gagwe le lekgethwa.
Anke dipelo tša bao ba hlankelago Jehofa di thabe.
11 Nyakang Jehofa le be le mo kgopele gore a le fe matla a gagwe.
Mo kgopeleng gore a dule a le thuša.*
12 Gopolang dilo tše di makatšago tšeo a di dirilego,
Le gopoleng le mehlolo ya gagwe le kamoo a ahlolago ka go loka,
13 Lena ditlogolo tša Isiraele mohlanka wa Modimo,
Lena barwa ba Jakobo bao a ba kgethilego.
14 Ke Jehofa Modimo wa rena.
O ahlola lefase ka moka.
15 Dulang le gopola kgwerano ya gagwe,
E lego dilo tšeo a di tshepišitšego* batho ba gagwe go ya go ile,
16 Yona kgwerano yeo a e dirilego le Aborahama,
Le keno yeo a e diretšego Isaka,
17 Gomme a e tiišetša Jakobo,
A dira gore e be kgwerano ya go ya go ile go Isiraele,
18 A re: ‘Ke tla go fa naga ya Kanana
Gore e be bohwa bja gago.’
19 O boletše dilo tše nakong ya ge le be le se ba bantšhi,
Le be le se ba bantšhi, e bile le be le se badudi ba naga yeo.
20 Ba ile ba tloga setšhabeng se sengwe ba ya go se sengwe,
Ba tloga mmušong o mongwe ba ya go o mongwe.
21 Ga se a dumelela motho le ge e le ofe gore a ba gatelele,
Eupša o ile a kgalemela dikgoši ka baka la bona,
22 A re: ‘Le se kgwathe batlotšwa ba ka,
Le se ke la dira baporofeta ba ka selo se sebe.’
23 Opelelang Jehofa, lena batho ka moka bao ba dulago lefaseng!
Letšatši le letšatši tsebišang batho kamoo a phološago batho ka gona!
24 Tsebišang ditšhaba gore o na le matla a magolo,
Le tsebiše batho ka moka ka mediro ya gagwe e makatšago.
25 Ka gobane Jehofa ke yo mogolo, e bile o swanelwa ke go tumišwa kudu.
O swanelwa ke go hlomphiwa kudu go feta medimo e mengwe ka moka.
26 Medimo ka moka ya batho ba bangwe ga e na mohola,
Eupša Jehofa ke yena a dirilego magodimo.
27 O a hlomphega e bile o na le letago.
Mo a lego gona ke moo matla le lethabo di lego gona.
28 Retang Jehofa lena malapa ka moka a mo lefaseng,
Retang Jehofa ka gobane o na le letago le matla.
29 Tumišang Jehofa ka gobane leina la gagwe le swanelwa ke go tumišwa.
Etlang le mpho gomme le eme pele ga gagwe.
Khunamelang Jehofa le apere diaparo tša lena tše dikgethwa.*
30 Anke batho ka moka ba lefaseng ba thothomele* pele ga gagwe!
Lefase le tiile, e bile le ka se ke la šuthišwa.
31 Anke magodimo a thabe, le lefase le thabe.
Botšang ditšhaba ka moka gore: ‘Jehofa bjale ke Kgoši!’
32 Anke lewatle le tšohle tšeo di lego go lona di mo rete.
Anke mašemo le tšohle tšeo di lego go ona di thabe.
33 Anke mehlare ka moka ya sethokgwa e goeletše ka lethabo pele ga Jehofa,
Ka gobane o tlela* go tlo ahlola lefase.
34 Lebogang Jehofa ka gobane o lokile,
Lerato la gagwe le le botegago le dula le le gona go ya go ile.
35 Ke moka le re: ‘Re phološe hle, wena Modimo yo a re phološago,
Re kgoboketše gomme o re phološe go ditšhaba,
E le gore re tle re rete leina la gago le lekgethwa
Gomme re go tumiše re thabile.
36 Anke Jehofa Modimo wa Isiraele a tumišwe
Go ya go ile.’”
Setšhaba ka moka sa re: “Amene,”* gomme sa tumiša Jehofa.
37 Ke moka Dafida a tlogela Asafa le banababo ba le pele ga Areka ya kgwerano ya Jehofa gore ba tšwele pele ba hlankela pele ga Areka yeo, go ya le kamoo ba bego ba tlwaetše go dira ka gona letšatši le letšatši. 38 A tlogela le Obede-edomo le banababo ba 68. Obede-edomo morwa wa Jeduthune le Hosa ba be ba leta dikeiti. 39 A bea moperisita Tsadoko le banababo bao le bona e bego e le baperisita pele ga taberenakele ya Jehofa lefelong le le phagamego leo le bego le le Gibeoni, 40 gore ba dule ba neela Jehofa dibego tša go fišwa aletareng ya dibego tša go fišwa mesong le mantšiboa le go dira dilo ka moka tšeo di lego Molaong wa Jehofa tšeo a bego a di laetše Baisiraele. 41 Ba be ba na le Hemane le Jeduthune le banna ka moka bao ba bego ba kgethilwe gore ba leboge Jehofa, ka gobane “lerato la gagwe le le botegago le dula le le gona go ya go ile.” 42 Le gona ba be ba na le Hemane le Jeduthune bao ba bego ba letša diphalafala, disimbala le diletšo tšeo di dirišwago go tumiša Modimo wa nnete, le gona barwa ba Jeduthune ba be ba le keiting. 43 Ke moka batho ka moka ba ya malapeng a bona, Dafida le yena a ya gae a šegofatša bao ba dulago lapeng la gagwe.