Maleaki

2 “Lena baperisita, taelo ye e lebane lena. 2 Ge le ka se e theetše la ba la se tšeele godimo go hlompha leina la ka,” o realo Jehofa wa madira, “gona ke tla le rogaka le go fetoša ditšhegofatšo tša lena gore e be thogako. Tšhegofatšo ya lena ke šetše ke e fetošitše thogako ka ge le sa tšeele taelo ya ka godimo.”

3 “Ke tla senya peu yeo le e bjetšego ka baka la mediro ya lena. Ke tla tlotša difahlego tša lena ka maloko a diphoofolo tšeo le dirago dihlabelo ka tšona menyanyeng ya lena, gomme le tla lahlelwa godimo ga maloko ao. 4 Ke moka le tla tseba gore ke le neile taelo ye e le gore kgwerano yeo ke e dirilego le Lefi e dule e le gona,” o realo Jehofa wa madira.

5 “Kgwerano yeo ke e dirilego le yena e ile ya šireletša bophelo bja gagwe gomme ya mo fa khutšo. Ka baka la ditšhegofatšo tše o ile a ntlhompha. Ka ge a be a hlompha leina la ka o be a hloile go dira selo se sengwe le se sengwe seo se sa nkgahlego. 6 O be a ruta molao* wa nnete gomme a sa nyake go bolela dilo tše mpe. O be a sepela le nna ka khutšo le ka go tshepega gomme a thuša batho ba bantšhi go tlogela go dira dilo tše mpe. 7 Ka gobane moperisita o swanetše go ruta batho gore ba tsebe Modimo gomme batho ba swanetše go ya go yena gore ba kwe molao wa Modimo, ka gobane ke moromiwa wa Jehofa wa madira.”

8 Jehofa wa madira o re: “Ge e le lena ga le sa latela molao wa ka. E bile le dirile gore batho ba bantšhi ba se o latele. Le sentše kgwerano ya Lefi. 9 Ka ge le be le sa latele ditsela tša ka e bile le sa sware batho ka go lekana le ge le diriša molao, ke tla dira gore le nyatšwe le go se hlomphiwe ke batho ka moka.”

10 “Na ka moka ga rena ga re na tate o tee? Na ga se ra bopša ke Modimo o tee ka moka ga rena? Gona ke ka baka la’ng re radiana gomme re goboša kgwerano ya borakgolokhukhu ba rena? 11 Juda e dirile boradia gomme Isiraele le Jerusalema go dirilwe dilo tše di šišimišago. Ka gobane Juda ga se ya hlompha Jehofa yo a ratago bokgethwa* ka ge e nyetše morwedi wa modimo o šele. 12 Jehofa o tla fediša yo mongwe le yo mongwe ditenteng tša Jakobo yo a dirago dilo tše, go sa šetšwe gore ke mang, le ge a ka tlišetša Jehofa wa madira sebego.”

13 “Go na le selo se sengwe seo le se dirago, seo se feleletšago ka gore le lle le be le tšhollele megokgo ya lena aletareng ya Jehofa, gomme se dira gore a se sa amogela sebego sa lena goba go amogela selo le ge e le sefe seo se tšwago go lena. 14 Eupša lena le re: ‘Ka baka la’ng?’ Ka gobane Jehofa ke hlatse ya gore o ile wa radia mosadi yo o mo nyetšego o sa le moswa, le ge e le mosadi wa gago yo o tshepišitšego gore o tla phela le yena bophelo ka moka.* 15 Eupša go na le yoo a sa kago a dira seo ka gobane o be a sa na le moya o mokgethwa wa Modimo. Yena o be a tsoma eng? O be a tsoma ditlogolo tšeo di bego di tlo botegela Modimo. Ka gona šetšang tsela yeo le naganago ka yona gomme le se ke la radia basadi bao le ba nyetšego le sa le ba baswa. 16 Ka gobane ke hloile tlhalo,” o realo Jehofa Modimo wa Isiraele. “Ke hloile yo a ratago bošoro,”* o realo Jehofa wa madira. “Ka gona šetšang tsela yeo le naganago ka yona gomme le se ke la ba baradia.

17 “Le lapišitše Jehofa ka dipolelo tša lena, eupša le re: ‘Re mo lapišitše bjang?’ Le mo lapišitše ge le re: ‘Motho yo mongwe le yo mongwe yo a dirago dilo tše mpe o lokile go Jehofa gomme o a mo kgahla,’ goba ge le re: ‘Modimo wa toka o kae?’”