Lengwalo la Pele le le Yago go Bathesalonika

5 Bjale banabešo, ga go nyakege gore le ngwalelwe selo mabapi le dinako le mehla yeo Modimo a e kgethilego ya gore go direge dilo tše. 2 Ka gobane lena le tseba gabotse gore letšatši la Jehofa le tlo tla go swana tlwaa le lehodu ge le etla bošego. 3 Nakong ya ge batho ba re: “Go na le khutšo ebile re šireletšegile,” ba tla fedišwa ba sa letela go no swana le ge mosadi wa moimana a swarwa ke dihlabi a sa letela. Ba ka se ke ba phologa le gatee. 4 Eupša lena banabešo, ga le leswiswing. Ka gona letšatši leo le ka se tle go lena le sa itebetše, go swana le seetša sa mosegare seo se tlelago mahodu a sa itebetše, 5 ka gobane ka moka ga lena le bjalo ka batho bao ba sepelago seetšeng le bao ba sepelago mosegare. Ga re swane le batho bao ba sepelago bošego goba leswiswing.

6 Ka gona, a re se keng ra robala go swana le ge ba bangwe ka moka ba robala, eupša a re duleng re phafogile ebile re bontšha gore re nagana gabotse. 7 Ka gobane bao ba robalago ba robala bošego, gomme bao ba tagwago ba tagwa bošego. 8 Eupša ge e le rena bao ba lego seetšeng anke re duleng re nagana gabotse gomme re be le tumelo le lerato bjalo ka ge eka re apere selo sa go šireletša sefega* le gona kholofelo ya rena ya gore re tlo phološwa re e rwale go swana le kefa. 9 Modimo ga se a re kgetha gore a tle a re otle, eupša o re kgethile gore re tle re phološwe ka Morena wa rena Jesu Kriste. 10 Jesu o re hwetše, e le gore go sa šetšwe gore re a phela goba re hwile, re tle re phele le yena. 11 Ka gona, tšwelang pele le kgothatšana* ebile le matlafatšana,* fela bjalo ka ge le šetše le dira.

12  Bjale banabešo, re le kgopela gore le hlomphe bao ba šomago ka thata gare ga lena le go le etelela pele mošomong wa Morena ebile ba le eletša. 13 Le bontšhe gore le tloga le ba naganela le gore le a ba rata ka baka la mošomo wa bona. Le phedišane ka khutšo. 14  Le gona banabešo, re le kgothaletša gore le eletše bao ba se nago thulaganyo, le kgothatše bao ba gateletšegilego, le thekge bao ba fokolago, le se ke la felela motho pelo. 15 Le netefatšeng gore ga go na yo a lefetšago bobe ka bobe, eupša le dule le šoma ka thata go direlana dilo tše dibotse le go di direla batho ba bangwe ka moka.

16 Dulang le thabile. 17 Rapelang ka mehla. 18 Le lebogeng selo se sengwe le se sengwe, ka gobane se ke seo Modimo a nyakago le se dira ka ge le le balatedi ba Kriste Jesu. 19 Le se ke la šitiša moya o mokgethwa wa Modimo gore o bereke go lena. 20 Le se ke la nyatša diporofeto. 21 Kgonthišetšang gore dilo ka moka ke nnete. Dulang le dira se se lokilego. 22 Ralokelang kgole le dilo ka moka tše mpe.

23 Banabešo, eka Modimo wa khutšo a ka dira gore le be ba bakgethwa ka mo go feletšego. Eka moya wa lena le mmele wa lena le tsela yeo le dirago dilo ka yona e ka ba tše kgethwa go fihlela le nakong ya go ba gona ga Morena wa rena Jesu Kriste. 24 Yo a le bitšago o a tshepega gomme o tla dira dilo tše.

25 Banabešo, tšwelang pele le re rapelela.

26 Dumedišang banababo rena ka moka ka go ba khisa lerameng.*

27 Ke le kgopela ka leina la Morena gore lengwalo le le le balele banababo rena ka moka.

28 Eka Morena wa rena Jesu Kriste a ka le bontšha botho bjo bogolo.