Puku ya Pele ya Samuele
1 Go be go na le monna yo mongwe yo a bego a dula Ramathaima-tsofima yeo e bego e le dithabeng tša Efuraime. Leina la gagwe e be e le Elikana wa Moefuraime, morwa wa Jerohama, morwa wa Elihu, morwa wa Tohu, morwa wa Tsufi. 2 O be a na le basadi ba babedi, yo mongwe leina la gagwe e be e le Hanna, yo mongwe e le Penina. Penina o be a na le bana, eupša Hanna yena a se na bana. 3 Ngwaga o mongwe le o mongwe monna yo o be a tloga motseng wa gabo gomme a eya Shilo go yo rapela Jehofa wa madira le go mo direla sehlabelo. Barwa ba babedi ba Eli, e lego Hofini le Finease ba be ba le moo ba hlankela e le baperisita ba Jehofa.
4 Ka letšatši le lengwe ge Elikana a be a dira sehlabelo, o ile a solela Penina mosadi wa gagwe le barwa le barwedi ba gagwe dinama, 5 eupša Hanna a mo solela nama e botse kudu ka gobane o be a mo rata kudu eupša Jehofa o be a mo hlokišitše bana. 6 Le gona mogadikane* wa Hanna o be a dulela go mo kwera e le gore a mo kweše bohloko ka gobane Jehofa o be a mo hlokišitše bana. 7 Mogadikane wa gagwe o be a dulela go mo kwera ngwaga o mongwe le o mongwe ge Hanna a be a eya ntlong ya Jehofa. O be a mo kwera kudu moo Hanna a bego a lla e bile a sa je. 8 Eupša Elikana monna wa gagwe a re go yena: “Hanna o llela’ng, o re’ng o sa je, le gona o re’ng o nyamile? Na go wena ga ke phale barwa ba lesome?”
9 Ka morago ga ge ba jele e bile ba nwele kua Shilo, Hanna a emelela. Ka nako yeo, moperisita Eli o be a dutše setulong seo se bego se le kgauswi le lebati la tempele* ya Jehofa. 10 Hanna o be a kwele bohloko kudu gomme a thoma go rapela Jehofa e bile a lla gabohloko. 11 A ena a re: “Wena Jehofa wa madira, bona kamoo ke tlaišegago ka gona. Ge e ba o ka gopola nna mohlanka wa gago gomme wa se ntebale, wa mpha ngwana wa mošemanyana, ke tla mo nea Jehofa bophelo bja gagwe ka moka le gona moriri wa gagwe o ka se ke wa kotwa.”
12 Eli o be a lebeletše molomo wa Hanna ge a be a rapela nako e telele pele ga Jehofa. 13 Hanna o be a rapelela ka pelong. Melomo ya gagwe ke yona feela yeo e bego e šikinyega eupša go sa kwagale lentšu. Ka gona Eli o be a nagana gore o tagilwe. 14 Eli a re go yena: “O tla dula o tagilwe go fihla neng? Tlogela go nwa beine.” 15 Hanna a araba a re: “Aowa, mong wa ka! Nna ke mosadi yo a tshwenyegilego kudu. Ga se ka nwa beine goba bjala, eupša ke ntšhetša Jehofa sa mafahleng. 16 O se ke wa nagana gore nna mohlanka wa gago ke mosadi yo a sa rego selo, ka gobane ke be ke boledišwa ke matshwenyego a ka a mantši le tlaišego ya ka.” 17 Ke moka Eli a re: “Sepela ka khutšo, eka Modimo wa Isiraele a ka go nea seo o mo kgopetšego sona.” 18 Ge a re’alo Hanna a re: “Ke leboga botho bja gago.” Ka morago a sepela a yo ja, a se hlwe a bonagala a tshwenyegile.
19 Ba tsoga e sa le ka masa ba khunamela Jehofa. Ka morago ga moo, ba boela ntlong ya bona kua Rama. Elikana a robala le Hanna mosadi wa gagwe, ke moka Jehofa a araba thapelo ya Hanna. 20 Ka morago ga ngwaga,* Hanna a ima a belega ngwana wa mošemane gomme a mo reela leina a re ke Samuele,* ka gobane o be a re, “ke mo kgopetše go Jehofa.”
21 Ka morago, Elikana o ile a ya le lapa la gagwe ka moka go yo direla Jehofa sehlabelo sa ngwaga le ngwaga, a dira le sebego sa keno ya gagwe. 22 Eupša Hanna ga se a ka a ya le monna wa gagwe ka gobane o mmoditše a re: “Gateetee ge mošemane a tshwele letswele, ke tla tla le yena, a tle pele ga Jehofa gomme a dule moo go ya go ile.” 23 Ke moka Elikana monna wa gagwe a re go yena: “Dira seo o bonago se lokile. Dula ka gae go fihlela o mo tshweša letswele. Eka Jehofa a ka dira gore seo o se boletšego se phethagale.” Ke moka Hanna a dula ka gae a nyantšha morwa wa gagwe go fihlela ge a mo tshweša letswele.
24 Ge a se na go mo tshweša letswele, a tla le yena kua Shilo a na le poo ya mengwaga e meraro le flouru yeo e lekanago dikhilograma tše 11* gotee le sebjana se segolo seo se tletšego beine gomme a tsena ntlong ya Jehofa kua Shilo a tliša mošemane yoo. 25 Ke moka ba hlaba poo yeo gomme ba iša mošemane go Eli. 26 Hanna a re: “Tshwarelo hle mong wa ka! Ke ikana pele ga gago mong wa ka ke re, ke nna mosadi yola a bego a eme pele ga gago gona mo ke rapela Jehofa. 27 Ke be ke rapela Jehofa gore a mphe ngwana yo wa mošemane gomme o mphile seo ke mo kgopetšego sona. 28 Bjale le nna ke mo nea Jehofa. E tla ba wa Jehofa bophelo bja gagwe ka moka.”
Ke moka, Elikana a khunama moo pele ga Jehofa.