Jobo
29 Jobo a tšwela pele a re:
2 “Okare nkabe ke swana le dikgweding tša go feta,
Nakong ya ge Modimo a be a ntšhireletša.
3 Go be go le bjalo ka ge eka o dira gore lebone la gagwe le mponegele
Ge ke be ke sepela leswiswing,
4 Ge ke be ke sa le moswa e bile ke sa na le matla,
Nakong ya ge ke sa le mogwera yo mogolo wa Modimo.
5 Ge Ramatlaohle a be a sa na le nna,
Nakong ya ge bana ba ka ba be ba sa phela.
6 Go be go le bjalo ka ge eka maoto a ka a hlapišwa ka maswi,
Gomme maswika a ntšhollela makhura a mantšhi a mohlware.
7 Ge ke be ke eya kgorong ya motse,
Gomme ke dula setulong seo ke se beetšwego mmarakeng,
8 Masogana ge a be a mpona a be a ntšhutelela go bontšha gore a a ntlhompha,
Le bakgalabje le bona ba be ba emelela.
9 Bakgomana ba be ba homola,
Ba bea diatla melomong ya bona,
10 Bahlomphegi le bona ba be ba homola,
Ba sa bolele selo.
11 Motho le ge e le ofe yo a nkwelego, o be a mpolela gabotse,
Gomme bao ba mponego ba be ba nkemelela.
12 Ke be ke phološa modiidi yo a llago a nyaka thušo,
E bile ke thuša le tšhiwana le motho le ge e le mang yo a bego a se na yo a ka mo thušago.
13 Motho yo a bego a le kgauswi le go hwa o be a ntšhegofatša,
Gomme ke be ke thabiša pelo ya mohlologadi.
14 Ke be ke apara toka bjalo ka ge eka ke diaparo,
Gomme go loka ga ka go swana le seaparo le tuku.
15 Ke be ke le bjalo ka mahlo a sefofu,
E bile ke le bjalo ka dinao tša motho yo a golofetšego.
16 Ke be ke le tatago badiidi,
E bile ke be ke nyakišiša melato ya bao ke sa ba tsebego e le gore ke ba thuše.
17 Ke be ke dira gore motho yo a dirago dilo tše mpe a felelwe ke matla bjalo ka ge eka ke roba mehlagare ya phoofolo ya naga,
Gomme ka phološa bao a ba tlaišago.
18 Ke be ke fela ke re: ‘Ke tla hwela ka ntlong ya ka,
Gomme matšatši a ka e tla ba a mantšhi go swana le santa.
19 Ke tla ba bjalo ka mohlare woo medu ya wona e phatlaletšego ya fihla ka meetseng,
Gomme phoka e tla dula bošego ka moka godimo ga makala a ka.
21 Batho ba be ba ntheetša gabotse,
Ba leta ba homotše gore ba kwe seo ke tlago go ba eletša ka sona.
22 Ka morago ga gore ke bolele, ba be ba homola ba re tuu!
Ditsebe tša bona di be di tsefelwa ke mantšu a ka.
23 Ba be ba nkemela go swana le ge batho ba emetše pula,
Ba be ba swana le batho bao ba letilego ba fela pelo ya gore pula ya seruthwane e ne.
24 Ge ba be ba bona ke ba thabetše, ba be ba sa kgolwe,
Ge ba be ba bona sefahlego sa ka se se thabilego, ba be ba kgothatšega.
25 Ka ge ke le moetapele wa bona, ke be ke ba bontšha tsela yeo ba swanetšego go sepela ka yona,
Ke be ke phela bjalo ka kgoši gare ga mašole a yona,
Le bjalo ka motho yo a homotšago bao ba llago.