Jesaya
14 Jehofa o tla gaugela Jakobo, e bile a kgetha Baisiraele gape. O tla ba bea nageng ya bona gomme batho bao e sego Baisiraele ba tla dula le ditlogolwana tša Jakobo. 2 Batho ba ditšhaba tše dingwe ba tla ba tšea ba ba iša lefelong la bona, gomme Baisiraele ba ba tšea ba ba dira bahlanka ba bona ba banna le ba basadi nageng ya Jehofa. Ba tla thopa batho bao ba bego ba ba thopile, gomme ba tla laola batho bao ba bego ba ba gapeletša go šoma.
3 Letšatšing leo Jehofa a tlago go le lokolla bokgobeng bjo thata e bile a dira gore le se sa kwa bohloko ka baka la go gatelelwa le go hlakišwa, 4 le tla hlabela kgoši ya Babilona seema la re:
“Ruri yo a bego a gapeletša ba bangwe go šoma o fedišitšwe.
Ruri ga go sa na yo a gatelelago yo mongwe.
5 Jehofa o robile kgati ya batho ba babe,
E lego wona molamo wa babuši,
6 Yena yo a otlago ditšhaba a sa kgaotše a galefile kudu,
Yena yo a fenyago ditšhaba a galefile kudu e bile a di tlaiša a sa kgaotše.
7 Lefase ka moka le hlomotšwe mootlwa, le iketlile.
Batho ba goeletša ba thabile.
8 Mehlare ya mejunipere
Gotee le ya metsedara ya Libanoni le yona e go thabetše,
E re: ‘Ga e sa le o ewa,
Ga go na motho yo a re remago.’
9 “Gaešita le Lebitla ka tlasetlase le huduegile,
E le gore le go gahlanetše ge o tsena.
Le tsošitše bao ba hwilego ka baka la gago,
E lego baetapele ka moka ba lefase bao ba gatelelago batho.
Le dira gore dikgoši ka moka tša ditšhaba di emelele ditulong tša tšona tša bogoši.
10 Ka moka ba re go wena:
‘Na le wena o thomile go fokola go swana le rena?
Na o šetše o swana le rena?
11 Boikgantšho bja gago
Le mmino wa diletšo tša gago tša metato di fedile.
Diboko di ikadile ka tlase ga gago tše ekego ke mpete,
Gomme di bjalo ka kobo ya gago.’
12 “Agaa, o wele legodimong,
Wena yo a phadimago, morwa wa mahube!
Agaa, o wišeditšwe lefaseng,
Wena yo a bego a fenya ditšhaba!
13 Wena pelong ya gago o itše: ‘Ke tla rotogela magodimong.
Ke tla kukela setulo sa ka sa bogoši ka godimo ga dinaledi tša Modimo,
Le gona ke tla dula thabeng yeo go bokanwago go yona,
Dikarolong tša kgole kudu tša ka leboa.
14 Ke tla rotogela ka godimo ga maru.
Ke tla itira gore ke swane le yo Godimodimo.’
15 “Eupša o tla išwa Lebitleng,
Kua tlasetlase moleteng.
16 Bao ba go bonago ba tla go tomolela mahlo.
Ba tla go lebeledišiša, ba re:
‘Na yo ga se motho yo a bego a šikinya lefase,
Yo a bego a dira gore mebušo e šišinyege,
17 Yo a dirilego gore naga yeo go dulago batho e swane le lešoka,
Le yo a sentšego metse ya yona,
Yo a gannego go lokolla bagolegwa ba gagwe gore ba boele gae?’
18 Dikgoši tše dingwe ka moka tša ditšhaba,
Ka moka ga tšona di bolokilwe ka tsela e hlomphegago,
E nngwe le e nngwe lebitleng la yona.
19 Eupša ge e le wena, o lahlilwe o se na moo o bolokelwago gona,
Go no swana le lekalana leo le lahlilwego.
O khupeditšwe ke ditopo tša batho bao ba hlabilwego ka lerumo,
Bao ba theogelago fase moleteng wa maswika,
Bjalo ka setopo seo se gataketšwego.
Maina a bana ba badiradibe a ka se bolelwe go ya go ile.
21 “Lokišang lefelo la go yo bolaela barwa ba gagwe,
Ka baka la molato wa borakgolokhukhu ba bona,
E le gore ba se ke ba ba le matla,
Gomme ba tšea lefase le go tlatša naga ka metse ya bona.”
22 Jehofa wa madira o re: “Ke tla lwa le bona.”
Jehofa o re: “Moo Babilona ke tla fediša leina, batho bao ba šetšego, bana le ditlogolo.”
23 Jehofa wa madira o re: “Ke tla e dira lefelo la dinoko le la mahlaka, ke tla e swiela ka leswielo ka e fediša ka mo go feletšego.”
24 Jehofa wa madira o dirile keno, a re:
“Go tla direga feela ka mokgwa wo ke nagannego ka gona
E bile seo ke ikemišeditšego go se dira se tla phethagala.
25 Ke tla fediša Baasiria nageng ya ka,
Gomme ka ba gatakela dithabeng tša ka.
Ke tla tloša joko ya bona go batho ba ka,
Le morwalo wa bona ke tla o tloša magetleng a batho ba ka.”
26 Se ke seo ke šetšego ke phethile gore ke tlo se dira lefaseng ka moka,
Gomme a ke matla a ka ao ke tlago go a diriša go otla ditšhaba ka moka.
27 Jehofa wa madira o šetše a dirile phetho,
Bjale ke mang a ka e thibelago?
O šetše a emišitše seatla sa gagwe gore a otle ditšhaba,
Bjale ke mang a ka mo thibelago?
28 Molaetša wo o ilego wa tsebišwa ngwageng woo Kgoši Ahasi a hwilego ka wona šo:
29 “Lena Bafilisita ka moka,
Le se ke la thaba feela ka gobane molamo wa yo a le otlago o robilwe.
30 Ge bana ba mathomo ba batho ba maemo a tlasana ba eja,
Gomme badiidi ba robala ba šireletšegile,
Ke tla bolaya ba leloko la gago ka tlala,
Gomme batho ba gago bao ba šetšego ba tla bolawa.
31 Llang lena batho bao ba lego dikeiting!
Hlabang mokgoši, lena badudi ba motseng!
Le tla nyama lena batho ka moka ba Filisita.
Mašole a tla tšwelela a etšwa ka leboa go swana le muši, e bile ga go na yo a tlago go ikarola go ona.”
32 Ba tla reng ge ba araba batho bao setšhaba se ba romilego?
Ba tla ba botša gore Jehofa o dirile motheo wa Tsione,
Gomme batho ba maemo a tlasana setšhabeng ba tla tšhabela gona.