Jesaya
35 Lešoka le naga e omilego di tla thaba.
Leganata le lona le tla thaba gomme la tlala mapolomo.
2 Ka nnete leganata leo le tla thunya mapolomo.
La thaba kudu, le tla goeletša le thabile.
Le tla fiwa letago la Libanoni,
Botse bja Karamele le bja Sharona.
Batho ba tla bona letago la Jehofa, lona letago la Modimo wa rena.
3 Matlafatšang diatla tšeo di fokolago,
Gomme le tiiše matolo ao a thothomelago.
4 Botšang bao ba tshwenyegilego le re:
“Tiang matla. Le se ke la tšhoga.
Bonang! Modimo wa lena o tla tla a le lefeletša go manaba a lena,
Modimo o tla tla a a otla.
O tla tla a le phološa.”
5 Ka nako yeo mahlo a batho bao ba foufetšego a tlo buduloga,
Gomme ditsebe tša batho bao ba sa kgonego go kwa di tla thibologa.
6 Ka nako yeo motho yo a hlotšago o tlo taboga bjalo ka kgama,*
Gomme dimumu di tlo goeletša di thabile.
Lešokeng go tlo tšwa meetse,
Gomme leganateng gwa tšwa meetse a mantšhi kudu.
7 Naga yeo e omišitšwego ke phišo e tla swana le letamo leo le nago le mahlaka,
Gomme naga yeo e omilego e tla swana le didiba tša meetse.
Meleteng yeo diphukubje di khutšago go yona,
Go tlo ba le bjang bjo botala le mahlaka le dimela tša papirase.
8 Gona moo go tla ba le tsela e kgolo,
Yona tsela yeo e bitšwago Tsela e Kgethwa.
Motho wa go se hlweke a ka se sepele go yona.
Mo go yona go tla sepela feela yo a e latelago,
Go ka se be le mašilo ao a arogelago go yona.
9 Ditau di ka se be gona moo,
Le dibata tše šoro di ka se sepele go yona.
E bile di ka se hwetšagale moo.
Moo go tlo sepela feela batho bao Modimo a ba rekolotšego.
10 Batho bao Jehofa a ba lokolotšego, ba tla boa ba tla Tsione ba goeletša ba thabile,
Ba tla thaba go ya go ile.
Ba tla thaba e bile ba ipshina,
Gomme manyami le masetlapelo di ka se sa ba gona.