Jesaya
57 Yo a lokilego o hwile,
Eupša ga go na yo a naganišišago ka taba ye.
Batho bao ba botegelago Modimo ba tšerwe,
Mola go se na yo a lemogago gore yo a lokilego o hwile,
Gomme ga se a bona masetlapelo.
2 O ba le khutšo,
Yo mongwe le yo mongwe yo a dirago dilo tšeo di lokilego o khutša lebitleng la gagwe.*
3 “Ge e le lena, batamelang mo,
Lena bana ba mosadi wa moloi,
Lena bana ba monna wa sehlotlolo le ba mosadi yo a rekišago mmele.
4 Ke mang yo le mo kwerago?
Ke mang yo le mo ahlamišetšago molomo e bile le mo ntšhetša leleme e le gore le mo nyatše?
Na ga se lena bana ba badiradibe,
Le bana ba batho ba go bolela maaka,
5 Bao ba nago le kganyogo e matla ya thobalano gare ga mehlare e megolo,
Ka tlase ga mehlare ka moka e metala,
Bao ba bolayago bana meeding,
Gare ga maswika ao a pharogilego?
6 Le bone maswika a boreledi a moeding a le kaone,
Gomme la kgetha ona.
Le gona le tšhollela maswika ao dibego tša dino, e bile le a nea dimpho.
Na ke swanetše go kgotsofatšwa ka dilo tše?
7 O beile mpete wa gago thabeng e kgolo le e telele,
Gomme wa rotogela moo go yo dira sehlabelo.
8 O beile modimo wa seswantšho ka ntlong ya gago.*
O ntlogetše gomme wa itlhobola diaparo,
O ile wa rotoga wa ba wa dira gore mpete wa gago o be o mogolo,
Gomme wa dira kgwerano le bao o bego o ratana le bona.
O be o rata go robala le bona.
E bile o be o lebelela setho sa botona.*
9 O theogetše go Meleke o swere makhura,
Le ditlolo tše dintšhi tša go nkga bose.
O rometše batho ba gago kgole,
Moo o ilego wa feleletša o theogetše lebitleng.*
10 O lapišitšwe ke go latela ditsela tša gago tše dintšhi.
Eupša ga se wa re: ‘Ga go hole selo!’
O ile wa hwetša matla gape.
Ke ka baka leo o ilego wa se fele matla.
11 “Ke mang yo a go tšhošitšego wa ba wa thoma go boifa,
Moo o ilego wa ba wa bolela maaka?
Ga se wa ka wa nkgopola.
Ga se wa ka wa naganišiša ka selo.
Na ga se ka dula ke ikhomoletše gomme ka bipa magole a gago?
O ile wa ba wa se mpoife.
12 Nna ke tla bolela gore o itira okare o lokile,
E bile ka bolela le ka dilo tšeo o di dirago tšeo di ka se go holego ka selo.
13 Ge o llela thušo,
Medimo ya gago yeo o e kgobokeditšego e ka se go thuše ka selo,
Gomme ka moka ga yona e tla tšewa ke phefo.
E tla tšewa le ke moya wa go se re selo,
Eupša motho yo a tšhabelago go nna o tla hwetša naga e le bohwa,
E bile o tla dula nageng ya ka e kgethwa.
14 Motho o tla re: ‘Bulang tsela, e buleng! Kgorang tsela.
Tlošang selo le ge e le sefe seo se ka šitišago batho ba ka.’”
15 Modimo yo Godimodimo le yo a Phagamego,
Yena yo a phelago go ya go ile le yo leina la gagwe e lego le lekgethwa, o re:
“Ke dula lefelong leo le phagamego le le lekgethwa,
E bile ke dula le bao ba gateletšegilego le bao ba kwelego bohloko,
Gore ke kgothatše bao meoya ya bona e lego fase,
Le go tsošološa bao dipelo tša bona di gateletšegilego.
16 Nka se ba ganetše go ya go ile,
Goba ka dula ke galefile.
Ka gobane batho ba tla fokola ka baka la ka,
Gaešita le diphedi tšeo ke di bopilego le tšona di tla fokola.
17 “Ke ile ka galefišwa ke sebe sa gagwe, e lego sa go nyaka go ikhola ka go se botege,
Ka gona ke ile ka mo otla ka uta sefahlego sa ka e bile ka ba ka galefa.
Eupša o ile a no tšwela pele a hlanogetše Modimo, a itirela boithatelo.
18 Ke bone mesepelo ya gagwe,
Eupša ke tla mo alafa le go mo hlahla,
Ke tla mo homotša, ka ba ka homotša le batho ba gagwe bao ba llago.”
19 Jehofa o re: “Ke tla bea mantšu a go tumiša lelemeng la gagwe.
Ke tla fodiša yo a lego kgole le yo a lego kgauswi,
E bile ke tla dira gore ba be le khutšo ya sa ruri.”
20 “Eupša batho ba babe ba swana le lewatle leo le bilokanago,
Leo le sa kgonego go okobala, leo meetse a lona a dulelago go ntšha ditšhila le leraga.”
21 Modimo wa ka o re: “Ga go na khutšo bakeng sa batho ba babe.”