Jona

4 Eupša taba yeo ya tena Jona gomme a galefa kudu. 2 Ke moka a rapela Jehofa a re: “Jehofa, ke tsebile ke sa le nageng ya gešo gore o be o tlo dira sona se. Ke ka baka leo ke ilego ka tšhabela Tarashishi, ka gobane ke tsebile gore o Modimo yo a kwelago bohloko le yo a gaugelago, yo a sa galefego ka pela le yo a nago le lerato le le botegago. Le gona, o ikemišeditše go fetola monagano gomme wa se sa otla batho ba babe. 3 Bjale Jehofa, ntlogele ke hwe, ka gobane go kaone gore ke hwe go e na le gore ke phele.”

4 Jehofa a mmotšiša a re: “Na o na le lebaka le le kwagalago la go galefa?”

5 Ke moka Jona a tšwa motseng a yo dula fase ka bohlabela bja motse. O ile a itirela moriti gomme a dula go wona gore a bone seo se tlago go diragalela motse. 6 Jehofa Modimo a dira gore mohlare* o mele o be o gole gomme o direle Jona moriti, e le gore a tlogele go ngongorega. Ka gona moriti woo o ile wa dira gore Jona a thabe.

7 Eupša ge go esa, Modimo wa nnete a romela seboko gore se je mohlare woo, ke moka wa oma. 8 Ya re ge letšatši le hlaba, Modimo a dira gore go be le phefo e fišago ya go tšwa ka bohlabela gomme letšatši la tšhuma Jona hlogo a ba a nyaka a idibala. A dulela go kgopela gore a hwe, a re: “Go kaone gore ke hwe go e na le gore ke phele.”

9 Modimo a botšiša Jona a re: “Na o na le lebaka le le kwagalago la gore o galefele mohlare wo?”

Jona a re: “Ee, ke na le lebaka le le kwagalago la gore ke galefe e bile ke nyaka le go hwa.” 10 Eupša Jehofa a re: “Wena o kwetše bohloko mohlare woo o sa kago wa o bjala e bile o sa kago wa o godiša. O gotše ka bošego bjo tee gomme wa hwa ka bošego bjo tee. 11 Bjale na nna ga se ka swanela go kwela motse o mogolo wa Ninife bohloko, woo o nago le badudi ba fetago 120 000 (dikete tše lekgolo le masome a mabedi) bao ba sa tsebego phapano magareng ga se sebotse le se sebe gotee le diruiwa tša bona tše dintšhi?”