Puku ya Bobedi ya Dikoronika

24 Jehoashe o be a na le mengwaga e šupago ge a eba kgoši, gomme o bušitše Jerusalema ka mengwaga e 40. Leina la mmagwe e be e le Sibia wa go tšwa Beresheba. 2 Jehoashe o ile a tšwela pele a dira dilo tše dibotse pele ga Jehofa nakong ka moka ya ge moperisita Jehoyada a be a phela. 3 Jehoyada o ile a mo nyakela basadi ba babedi, gomme a ba tatago barwa le barwedi.

4 Ka morago ga moo, Jehoashe o ile a kganyoga ka pelo ya gagwe ka moka go mpshafatša ntlo ya Jehofa. 5 Ka gona a kgoboketša baperisita le Balefi a re go bona: “Eyang metseng ya Juda le kgoboketšeng tšhelete go Baisiraele ka moka, e le gore le tle le lokiše ntlo ya Modimo wa lena ngwaga o mongwe le o mongwe. Le swanetše go dira bjalo kapelapela.” Eupša Balefi ga se ba ka ba dira kapelapela. 6 Ka gona kgoši ya bitša Jehoyada yoo e bego e le moetapele, ya re go yena: “Ke ka baka la eng o se wa laela Balefi gore ba tliše motšhelo o mokgethwa woo o tšwago Juda le Jerusalema go etša ge Moshe mohlanka wa Jehofa a laetše, e lego motšhelo o mokgethwa wa phuthego ya Isiraele, woo o kgobokeletšwago mošomo wo o dirwago tenteng ya Bohlatse? 7 Ka gobane bana ba mosadi yo mobe e lego Athalia, ba thubile ntlo ya Modimo wa nnete gomme ba tšere dilo ka moka tše kgethwa tšeo di bego di le ntlong ya Jehofa ba di dirišetša Bobaali.” 8 Ke moka kgoši ya laela gore go dirwe lepokisi la moneelo, gomme la dirwa la bewa ka ntle ga keiti ya ntlo ya Jehofa. 9 Ka morago ga moo, batho ba Juda le ba Jerusalema ka moka ba tsebišwa gore ba tlišetše Jehofa motšhelo o mokgethwa, e lego motšhelo woo Moshe mohlanka wa Modimo wa nnete a bego a laetše Baisiraele kua lešokeng gore ba o ntšhe. 10 Baetapele ka moka le setšhaba ka moka ba ile ba thaba, gomme ba dula ba tliša meneelo ba e lahlela ka lepokising leo go fihla le tlala.

11 Nako le nako ge Balefi ba bona gore lepokisi le na le tšhelete e ntšhi, ba be ba le iša go kgoši gore le bulwe pele ga yona. Mongwaledi wa kgoši le mothuši wa moperisita yo mogolo ba be ba etla gore ba tlo tšholla moneelo woo o lego ka lepokising gomme ba le bušetša moo le dulago gona. Ba be ba dira sona seo letšatši le lengwe le le lengwe gomme ba ile ba kgoboketša tšhelete e ntšhi kudu. 12 Ke moka kgoši le Jehoyada ba be ba tšea tšhelete yeo gomme ba e fa batho bao ba bego ba hlokometše mošomo woo o dirwago ntlong ya Jehofa gomme bona ba be ba hira batho ba go šoma go betla maswika le ditsebi tša mošomo wa diatla gore ba mpshafatše ntlo ya Jehofa, le batho bao ba bego ba šoma ka tšhipi le koporo gore ba lokiše ntlo ya Jehofa. 13 Batho bao ba bego ba hlokometše mošomo ba ile ba thoma go šoma gomme mošomo wa go lokiša wa tšwela pele o hlokometšwe ke bona. Ba ile ba tsošološa ntlo ya Modimo wa nnete gore e boele e be ka mokgwa wo e bego e le ka gona, ke moka ba e tiiša. 14 Ge ba se na go fetša, ba ile ba tliša tšhelete yeo e bego e šetše go kgoši le go Jehoyada gomme ba e diriša go dira dibjana tša ntlong ya Jehofa, dibjana tša go dirišetšwa go hlankela Modimo, tša go neela dibego, dikomiki le dibjana tša gauta le tša silifera. Ba be ba neela dihlabelo tša go fišwa ntlong ya Jehofa letšatši le letšatši, mehleng ka moka ya ge Jehoyada a sa phela.

15 Ge Jehoyada a be a tšofetše ebile a kgotsofetše ka bophelo, o ile a hlokofala. O hlokofetše a na le mengwaga e 130 (lekgolo-masometharo). 16 Ka gona ba mmolokela Motseng wa Dafida gotee le dikgoši, ka baka la dilo ka moka tše dibotse tšeo a di diretšego batho ba Isiraele, ntlo ya Modimo le Modimo wa nnete.

17 Ka morago ga lehu la Jehoyada, baetapele ba Juda ba ile ba tla gomme ba khunamela kgoši. Ke moka kgoši ya theetša seo ba bego ba nyaka go e botša sona. 18 Ba ile ba lahla ntlo ya Jehofa Modimo wa borakgolokhukhu ba bona gomme ba thoma go hlankela dikota tše kgethwa* le medingwana. Ka gona Modimo a galefela batho ba Juda le ba Jerusalema kudu ka baka la seo ba se dirilego. 19 Jehofa o ile a dula a romela baporofeta go bona gore ba ba bušetše go yena. Ba ile ba dula ba ba lemoša, eupša ba se ba theetše.

20 Sakaria morwa wa moperisita Jehoyada a tlelwa ke moya wa Modimo ke moka a ema pele ga setšhaba lefelong leo le lego godingwana, a re go sona: “Modimo wa nnete o re: ‘Ke ka baka la eng le tshela melao ya Jehofa? Le ka se atlege. Ka ge le lahlile Jehofa, le yena o tla le lahla.’” 21 Eupša ba mo logela maanomabe gomme ba mo kgatla ka maswika ka lapeng la ntlo ya Jehofa ba laetšwe ke kgoši. 22 Ka gona Kgoši Jehoashe ga se a ka a gopola botho* bjoo tatagwe* e lego Jehoyada a bego a mmontšhitše bjona, gomme o ile a bolaya morwa wa gagwe yoo a ilego a re ge a ehwa a re: “Anke Jehofa a go otle ka baka la seo o se dirilego.”

23 Mathomong a ngwaga, mašole a Siria a ile a tla a lwa le Jehoashe, gomme a hlasela Juda le Jerusalema. Ke moka a bolaya baetapele ka moka setšhabeng gomme a tšea dilo ka moka tšeo a ba tšeetšego tšona a di iša go kgoši ya Damaseko. 24 Le ge mašole a Basiria ao a bego a tlile go hlasela e be e se a mantšhi, Jehofa o ile a a thuša gore a fenye mašole a mantšhi kudu, ka gobane batho ba Juda ba be ba tlogetše Jehofa Modimo wa borakgolokhukhu ba bona. Ka gona Modimo o ile a diriša Basiria go ahlola Jehoashe. 25 Ge ba tloga go yena (ka ge ba be ba mo tlogetše a gobetše* kudu), bahlanka ba gagwe ba ile ba mo logela maanomabe ka gobane o be a bolaile barwa* ba moperisita Jehoyada. Ba ile ba mmolaela mpeteng wa gagwe. Ke moka ba mmolokela Motseng wa Dafida, eupša ga se ba mmolokela mabitleng a dikgoši.

26 Bao ba mo logetšego maanomabe ke ba: Sabada morwa wa Shimeathe mosadi wa Moamoni le Jehosabadi morwa wa Shimiritha mosadi wa Momoaba. 27 Ditaba ka moka tša mabapi le barwa ba gagwe le dilo tše dintšhi tšeo di tsebišitšwego mabapi le yena, gotee le go tsošološwa ga ntlo ya Modimo wa nnete, di ngwadilwe ka Pukung ya Dikgoši. Ke moka Amatsia morwa wa gagwe a ba kgoši legatong la gagwe.