Baahlodi

8 Ke moka banna ba Efuraime ba re go Gideone: “Go re’ng o re dirile ka mokgwa wo? Go re’ng o se wa re bitša ge o yo lwa le Bamidiane?” Ke moka ba thoma go mo hlabela mašata. 2 Eupša a re go bona: “Na seo ke se dirilego se ka swana le seo lena le se dirilego? Lena banna ba Efuraime le dirile dilo tše dintšhi tše dikgolo ge le bapetšwa le rena banna ba Abiesere.* 3 Modimo o le thušitše go fenya baetapele ba Midiane e lego Orebe le Seebe, bjale nna ke dirile eng ge ke bapišwa le lena?” Ge ba ekwa a re’alo ba iša maswafo fase.

4 Gideone a fihla Nokeng ya Jorodane gomme a e tshela. Le ge yena le mašole a 300 (makgolo a mararo) ao a bego a na le yena ba be ba lapile, ba ile ba no tšwela pele ba kitimiša manaba a bona. 5 Ke moka a re go banna ba Sukothe: “Ke kgopela le neeng mašole ao ke nago le ona dinkgwa ka gobane a lapile gomme re rakediša Tseba le Tsalamuna, e lego dikgoši tša Midiane.” 6 Baetapele ba Sukothe ba re: “Na o šetše o fentše Tseba le Tsalamuna moo re ka neago mašole a gago senkgwa?” 7 Ke moka Gideone a re: “Ge Jehofa a re thušitše go fenya Tseba le Tsalamuna, ke tlo gagola nama ya lena ka meetlwa ya lešoka.” 8 Ge a tloga moo a rotogela Penuele, a kgopela banna ba Penuele seo a se kgopetšego banna ba Sukothe, eupša bona ba mo araba kamoo banna ba Sukothe ba mo arabilego ka gona. 9 Ke moka a botša banna ba Penuele a re: “Mohlang ke boa ke bolokegile, ke tlo phušola tora ye.”

10 Tseba le Tsalamuna ba be ba le Karakoro ba na le mašole a bona, ka moka e le banna ba 15 000 (dikete tše lesomehlano). A ke mašole ao a bego a šetše go mašole ka moka ao a tšwago ka Bohlabela, ka gobane mašole a 120 000 (dikete tše lekgolo masomepedi) a be a bolailwe ka sabola. 11 Gideone a tšwela pele ka leeto la gagwe a ya go bao ba dulago ditenteng ka bohlabela bja Noba le Jogobea gomme a ba hlasela ba sa itebetše. 12 Ge Tseba le Tsalamuna ba tšhaba, Gideone a ba rakediša gomme a thopa dikgoši tšeo tše pedi tša Bamidiane, e lego Tseba le Tsalamuna, a sabola mašole ka moka a šala a thothomela.

13 Gideone morwa wa Joashe a boa a etšwa ntweng a sepela ka tsela e tshesane yeo e rotogelago Herese. 14 Ge a le tseleng a kopana le lesogana la banna ba Sukothe gomme a le sekiša. Ke moka lesogana leo la mo ngwalela maina a baetapele ba Sukothe le banna ba gona ba bagolo. E be e le banna ba 77. 15 Ke moka a ya go banna ba Sukothe a re: “Tseba le Tsalamuna bao le nkwerilego ka bona šeba, ge le be le re: ‘Na o šetše o fentše Tseba le Tsalamuna moo re ka neago mašole a gago senkgwa?’” 16 A tšea banna ba bagolo ba motse wa Sukothe gomme a ba gagola matlalo ka meetlwa, ka go re’alo a ba laya. 17 Ke moka a phušola tora ya Penuele gomme a bolaya banna ba motse.

18 Ke moka a botšiša Tseba le Tsalamuna a re: “Le bolaile banna ba mohuta mang kua Thabora?” Bona ba re: “Ba be ba swana le wena, e be e ka ke barwa ba kgoši.” 19 Ge ba re’alo, a re go bona: “E be e le bana bešo, bana ba mma. Ke ikana ka Jehofa Modimo yo a phelago gore, ge nkabe le ile la ba tlogela ba phela, ke be nka se le bolaye.” 20 A re go leitšibulo la gagwe Jethere: “Ema o ba bolaye.” Lesogana la se ntšhe sabola ya lona ka ge le be le boifa, ka gobane e be e sa le le lenyenyane. 21 Ka gona Tseba le Tsalamuna ba re: “Ge e ba o le monnanna, gona ema o re bolaye.” Ke moka Gideone a ema a bolaya Tseba le Tsalamuna gomme a tšea dikgabiši tša sebopego sa ngwedi tšeo di bego di le melaleng ya dikamela tša bona.*

22 Ka morago banna ba Isiraele ba re go Gideone: “Re buše, wena le morwa wa gago gotee le setlogolo sa gago, ka gobane o re phološitše go Bamidiane.” 23 Eupša Gideone a re go bona: “Nka se le buše, le morwa wa ka a ka se le buše. Ke Jehofa yo a tlago go le buša.” 24 Gideone a re go bona: “E re ke le kgopeleng se: Yo mongwe le yo mongwe wa lena a a mphe lengina la nkong leo a le thopilego.” (Ka gobane manaba ao Baisiraele ba bego ba a fentše a be a na le mangina dinkong tša ona ka ge e be e le Baishimaele.) 25 Bona ba re: “Re tla go nea ona.” Ba ala lešela gomme yo mongwe le yo mongwe a tšea lengina la nkong leo a le thopilego ke moka a le lahlela godimo ga lešela leo. 26 Boima bja mangina a nkong a gauta ao Gideone a a kgopetšego e be e le dishekele* tša gauta tše 1 700 (sekete le makgolo a šupa), go sa akaretšwe dikgabiši tša sebopego sa ngwedi, mangina le diaparo tša boya tše diphepolo tšeo di bego di aperwe ke dikgoši tša Midiane gotee le dipheta tšeo di bego di le melaleng ya dikamela.

27 Gideone a dira efoda* ka gauta yeo, a e bea motseng wa gabo wa Ofura gore e bonwe. Ke moka Baisiraele ka moka ba e rapela* moo e ilego ya ba molaba go Gideone le ba lapa la gagwe.

28 Ka go re’alo Baisiraele ba fenya Bamidiane gomme Bamidiane ba se sa hlwa ba leka go lwa le bona. Ke moka nageng gwa ba le khutšo ka mengwaga e 40 ya ge Gideone a sa phela.

29 Ka gona Jerubaali* morwa wa Joashe a tloga a yo dula ntlong ya gagwe.

30 Gideone a ba le bana ba 70 ka gobane o be a na le basadi ba bantšhi. 31 Mosadi wa gagwe wa serethe yo a bego a le Shikeme, le yena o ile a mmelegela morwa gomme Gideone a mo reela leina la Abimeleke. 32 Ke moka Gideone morwa wa Joashe a hlokofala a šetše a tšofetše gomme a bolokwa mabitleng a Joashe tatagwe kua Ofura ya Baabiesere.

33 Ge Gideone a se na go hlokofala, Baisiraele ba buša ba rapela Bobaali, ba bea Baali-berithe gore e be modimo wa bona. 34 Baisiraele ba ile ba lebala Jehofa Modimo wa bona yo a ba phološitšego go manaba a bona ka moka ao a bego a ba dikologile, 35 ba se ke ba bontšha botho* go lapa la Jerubaali, e lego Gideone, e bile ba se bontšhe gore ba leboga dilo ka moka tše dibotse tšeo a di diretšego Baisiraele.