Diema
22 Go itirela leina le lebotse go phala go ba le mahumo.
Go hlomphiwa* go kaone go phala go ba le silifera le gauta.
2 Mohumi le modiidi ba swana ka se:
Ka moka ga bona ba bopilwe ke Jehofa.
3 Yo bohlale o bona kotsi gomme a ikuta,
Eupša wa setlaela o sepela a lebile kotsi yeo gomme a wela mathateng.
4 Ge e ba motho a ikokobeditše e bile a boifa Jehofa,
O tla šegofatšwa,* a hlomphiwa a ba a hwetša le bophelo.
5 Tseleng ya yo mobe go na le meetlwa le melaba,
Eupša yo a hlomphago bophelo bja gagwe, o sepelela kgole le tšona.
6 Ruta mošemane tsela yeo a swanetšego go sepela ka yona,
Le ge a tšofetše, a ka se e lahle.
7 Mohumi o buša modiidi,
Gomme moadimi ke mohlanka wa moadimiši.
8 Yo a dirago dilo tše di sa lokago o tla welwa ke masetlapelo,
Gomme thupa yeo a otlago ba bangwe ka yona a galefile, e tla robja.
9 Motho yo a ratago go fa ba bangwe dilo o tla šegofatšwa,
Ka gobane o ngwathela modiidi dijo tša gagwe.
10 Raka motho yo a ratago go kwera
Gomme ngangišano e tla fela,
Ke moka diphapano le dithogako di tla fela.
11 Yo a nago le pelo e sekilego le yo a bolelago le ba bangwe ka botho,
E tla ba mogwera wa kgoši.
12 Jehofa o dula a lebeletše yo a dirago dilo ka bohlale,*
Eupša o dira gore mantšu a moradia a se atlege.
13 Sebodu se re: “Go na le tau ka ntle!
Ke tla bolaelwa mebarekeng!”
14 Molomo wa basadi bao ba hlokago boitshwaro* o swana le molete wo o išago.
Motho yo a galefetšwego ke Jehofa o tla wela ka gare ga wona.
15 Ka tlhago bana ba rata go dira dilo tša bošilo,
Eupša kgati ya tayo e tla ba thuša gore ba se ke ba dira dilo tšeo.
17 Hlwaya tsebe gomme o theetše mantšu a batho ba bohlale,
E le gore o bee dilo tše ke go rutago tšona pelong ya gago,
18 Ka gobane o tla thaba ge o ka dula o gopola mantšu a,
E le gore o dule o bolela ka ona.
19 Ke go fa tsebo lehono
E le gore o tle o tshepe Jehofa.
20 Ke šetše ke go ngwaletše
Dikeletšo tše dintšhi le ditaelo,
21 Gore ke go rute mantšu a nnete le ao a tshepegago,
E le gore o kgone go araba gabotse motho yoo a go botšišago ka ona.
22 O se ke wa swara modiidi poo ka gobane e le modiidi,
Le gona o se ke wa gatelela motho wa maemo a tlase keiting ya motse,
23 Ka gobane Jehofa o tla ba emelela,
Le gona, o tla bolaya bao ba ba radiago.
24 O se ke wa gwerana le sefelapelwana
Goba wa gwerana le motho yo a kwatago ka pela,
25 E le gore o se ke wa swana le yena
Gomme wa ipakela kotsi.
26 O se ke wa ba gare ga batho bao ba swaranago ka matsogo
E le go dira tumelelano ya gore ba tla patela dikoloto tša batho ba bangwe.
27 Ge e ba o se na seo o ka patelago ka sona,
Gona o tla tšeelwa mpete wa gago o sa robetše go wona.
28 O se ke wa šuthiša mollwane
Woo borakgolokhukhu ba gago ba o beilego kgalekgale.
29 Na o kile wa bona monna yo a kgonago mošomo wa gagwe?
Yena o tla ema pele ga dikgoši,
Eupša a ka se eme pele ga batho feela.