Genesi

34 Bjale Dina morwedi wa Lea le Jakobo, o be a tlwaetše go tšwa go yo etela basetsana ba nageng yeo. 2 Shikeme morwa wa Hamoro wa Mohefe, yo e lego moetapele wa naga, o ile a mmona gomme ka morago a mo tšea a mo kata. 3 Ka gona Shikeme o ile a kgahlwa ke Dina morwedi wa Jakobo kudu, gomme a rata mosetsana yoo a ba a mo goketša ka go mmotša mantšu a mabosana. 4 Mafelelong Shikeme a re go Hamoro tatagwe: “Eya o nkgopelele mosetsana yo gore e be mosadi wa ka.”

5 Ge Jakobo a be a ekwa gore Shikeme o katile Dina morwedi wa gagwe, barwa ba gagwe ba be ba le madišong. Ka gona Jakobo a se botše motho ka taba ye go ba go fihla ge ba boile. 6 Ka morago Hamoro tatago Shikeme a ya go Jakobo gore a bolele le yena. 7 Ge barwa ba Jakobo ba ekwa ka taba ye ba boa madišong kapelapela. Ba be ba kwele bohloko e bile ba kwatile kudu ka gobane Shikeme o be a tlontlolotše Isiraele ka go robala le morwedi wa Jakobo, e lego selo seo se sa swanelago go dirwa.

8 Hamoro a bolela le bona a re: “Shikeme morwa wa ka o rata ngwana wa lena. Hle mo neeng yena e be mosadi wa gagwe, 9 gomme le nyalelane le rena. Le re fe barwedi ba lena, ke moka lena le itšeele barwedi ba rena. 10 Le ka dula le rena, gomme la dula gohle mo le go nyakago mo nageng, la tšwela pele ka dikgwebo tša lena gomme la iketla.” 11 Ke moka Shikeme a botša tatago Dina le bobutiagwe a re: “Ke kgopela le mpontšhe botho, gomme ke tla le nea selo le ge e le sefe seo le nkgopelago sona. 12 Le ka oketša tšhelete ya magadi ya ba e ntši kudu, la oketša le mpho yeo le nyakago ke e ntšha, ke ikemišeditše go le nea selo le ge e le sefe seo le se nyakago go nna. Ke no kgopela feela le mpheng mosetsana yo e be mosadi wa ka.”

13 Ka ge Shikeme a be a katile Dina, barwa ba Jakobo ba ile ba fora Shikeme le Hamoro tatagwe, 14 gomme ba re go bona: “Go ka se kgonege gore re dire seo, re ka se nee kgaetšedi ya rena monna yo a sa bollago, ka gobane seo se tla be se bontšha lenyatšo. 15 Eupša re ka dumela feela ge monna yo mongwe le yo mongwe wa lena a ka bolla gomme la swana le rena. 16 Ke moka re tla le nea barwedi ba rena gore le ba nyale, gomme le rena ra nyala barwedi ba lena. Re tla dula le lena gomme ra ba setšhaba setee. 17 Eupša ge e ba le sa re theetše gomme la bolla, gona re tlo tšea kgaetšedi ya rena ra sepela.”

18 Seo ba se boletšego sa kgahla Hamoro le Shikeme morwa wa gagwe. 19 Shikeme a se diege go dira seo ba se kgopetšego ka gobane o be a rata morwedi wa Jakobo kudu. Le gona Shikeme e be e lesogana le le hlomphegago kudu go bohle ba ntlong ya tatagwe.

20 Ka gona Hamoro le Shikeme morwa wa gagwe ba ya kgorong ya motse gomme ba bolela le banna ba motse wa gabo bona ba re: 21 “Banna ba ba nyaka go dirišana le rena ka khutšo. Ka gona a ba dule mo nageng ye gomme ba tšwele pele ka dikgwebo tša bona, ka gobane naga ye ke e kgolo gomme e tla ba lekana. Re tla nyala barwedi ba bona gomme le bona ba tla nyala barwedi ba rena. 22 Eupša banna ba ba tla dumela go dula le rena le gore re be setšhaba setee, ge feela monna yo mongwe le yo mongwe wa rena a ka bolla go swana le bona. 23 Ke moka dilo tša bona, lehumo la bona le diruiwa tša bona ka moka e tla ba tša rena. Bjale a re dumelelaneng le bona e le gore ba dule le rena.” 24 Ka gona banna ka moka bao ba dulago motseng woo ba dumelelana le Hamoro le Shikeme morwa wa gagwe, ke moka ba batona ka moka ba motse woo ba bolla.

25 Eupša ka letšatši la boraro ge bao ba bolotšego ba be ba sa kwa bohloko, barwa ba babedi ba Jakobo e lego Simeone le Lefi, bao e lego bobuti ba Dina, ba tšea ditšhoša tša bona ba ya motseng woo go se na motho yo a belaelago gore ba ya go dira eng moo. Ge ba fihla ba bolaya motho yo mongwe le yo mongwe yo motona. 26 Ba bolaya Hamoro le Shikeme morwa wa gagwe ka tšhoša. Ke moka ba tšea Dina ka ntlong ya Shikeme ba tšwa ba sepela. 27 Barwa ba bangwe ba Jakobo ba ya motseng ba hwetša banna bao ba bego ba šetše ba gobetše kudu gomme ba ba feleletša. Ke moka ba tšea dithoto ka moka tša motseng woo, ka ge banna ba moo ba gobošitše kgaetšedi ya bona. 28 Ba tšea mehlape ya bona ya dinku, dipudi le dikgomo le ditonki tša bona, e bile ba tšea le dilo ka moka tšeo di lego motseng woo le nageng yeo. 29 Le gona ba ile ba tšea dilo tša bona ka moka, bana ba bona ba banyenyane le basadi ba bona, ba tšea le dilo ka moka tšeo di lego ka dintlong tša bona.

30 Ke moka Jakobo a re go Simeone le Lefi: “Le mpaketše mathata ka go dira gore batho ba mo nageng ye ba ntlhoye, e lego Bakanana le Baperetse. Ga se rena ba bantši, ka gona ba tla nthika gomme ba ntlhasela, ba fediša nna le ba lapa la ka ka moka.” 31 Eupša bona ba re: “Re ka se dumelele motho le ge e le ofe a swara kgaetšedi ya rena bjalo ka mogweba-ka-mmele.”