Genesi

35 Ka morago ga moo Modimo a bolela le Jakobo a re: “Emelela o ye Bethele gomme o dule moo. Ke moka o agele Modimo wa nnete aletare, yena yo a iponagaditšego go wena ge o be o tšhaba Esau ngwaneno.”

2 Ke moka Jakobo a botša ba lapa la gagwe le batho ka moka bao ba bego ba na le yena a re: “Lahlang medimo ya maaka yeo le e swerego, le itlhwekišeng le be le apare diaparo tše dingwe, 3 gomme re emeleleng re yeng Bethele. Gona moo ke tla agela Modimo wa nnete aletare, yena yo a nkarabilego nakong ya ge ke be ke le tlalelong, le yoo a bilego le nna kae le kae moo ke bego ke eya gona.” 4 Ka gona, ba nea Jakobo medimo ka moka ya maaka yeo ba bego ba e swere le mangina ao ba bego ba a rwele. Ke moka yena a di epela ka tlase ga mohlare o mogolo woo o bego o le kgauswi le Shikeme.

5 Ge barwa ba Jakobo ba dutše ba sepela, Modimo o ile a dira gore batho ba metseng ya kgauswi le bona ba tšhoge gomme ba se ke ba ba rakediša. 6 Mafelelong Jakobo le batho ka moka bao a bego a na le bona ba fihla nageng ya Kanana kua Lutsi, e lego Bethele. 7 Ke moka a aga aletare moo gomme a reela lefelo leo leina la Ele-bethele,* ka gobane gona moo Modimo wa nnete o ile a iponagatša go yena ge a be a tšhaba ngwanabo. 8 Ka morago Debora moledi wa Rebeka a hlokofala gomme a bolokwa kgauswi le Bethele ka tlase ga mohlare o mogologolo. Ke moka Jakobo a reela mohlare woo leina a re ke Alone-bakuthe.*

9 Bjale ge Jakobo a etšwa Padana-arama Modimo a iponagatša go yena gape gomme a mo šegofatša. 10 Modimo a re go yena: “Leina la gago e ka se sa ba Jakobo, eupša e tla ba Isiraele.” Ke moka a thoma go mmitša Isiraele. 11 Modimo a tšwela pele a re go yena: “Ke nna Modimo Ramatlaohle. Eba le bana ba bantši. Go wena go tla tšwa ditšhaba le batho ba meraforafo, e bile ba bangwe ba bana ba gago e tla ba dikgoši. 12 Ge e le naga yeo ke bego ke e neile Aborahama le Isaka, ke tla e nea wena le bana ba bana ba gago.” 13 Ke moka Modimo a mo tlogela lefelong leo a bego a bolela le yena a le go lona.

14 Jakobo a napa a hloma kokwane ya leswika lefelong leo a boletšego le Modimo, gomme a tšhela sebego sa dino le makhura godimo ga yona. 15 Jakobo a tšwela pele a bitša lefelo leo Modimo a boletšego le yena a le go lona a re ke Bethele.

16 Ke moka ba tloga Bethele. Ge ba be ba sa le kgojana le go fihla Efurata, Ragele a swarwa ke lešoko gomme a kwa bohloko kudu. 17 Eupša ge a be a thatafalelwa ke go belega, mmelegiši o ile a re go yena: “O se ke wa tšhoga, ka gobane o tlo belega morwa yo mongwe.” 18 Ge Ragele a be a le kgauswi le go felela (ka ge a be a ehwa), o ile a mo reela leina la Bene-oni,* eupša tatagwe yena a mmitša Benjamini.* 19 Ka gona Ragele a hlokofala gomme a bolokwa tseleng ya go ya Efurata, e lego Betlelehema. 20 Ke moka Jakobo a hloma leswika lebitleng la gagwe. Leswika leo ke leswika la lebitla la Ragele go ba go fihla le lehono le.

21 Ka morago ga moo, Isiraele a tloga a hloma tente ya gagwe kgojana le tora yeo e bitšwago Edere. 22 Ge Isiraele a dula nageng yeo, Rubeni o ile a robala le Biliha, e lego mosadi wa serethe wa tatagwe gomme Isiraele a kwa ka taba yeo.

Jakobo o be a na le barwa ba 12. 23 Barwa ba Lea e be e le Rubeni e lego ngwana wa mathomo wa Jakobo. Gwa latela Simeone, Lefi, Juda, Isakara le Sebulone. 24 Barwa ba Ragele e be e le Josefa le Benjamini. 25 Barwa ba Biliha mohlanka wa Ragele e be e le Dani le Nafutali. 26 Barwa ba Silipa mohlanka wa Lea e be e le Gada le Ashere. Bao ke barwa ba Jakobo bao ba belegetšwego kua Padana-arama.

27 Mafelelong Jakobo a fihla go Isaka tatagwe kua Mamure tikologong ya Kiriathe-araba, e lego Heburone, moo Aborahama le Isaka ba ilego ba dula gona e le batšwantle. 28 Isaka o phetše mengwaga e 180 (lekgolo-masomeseswai). 29 Ka morago ga moo Isaka o ile a hlokofala gomme a bolokwa le batho ba gabo. Ge a hlokofala o be a tšofetše e bile a khoše bophelo. Ke moka Esau le Jakobo barwa ba gagwe ba mmoloka.