Genesi

37 Jakobo a dula nageng ya Kanana yeo tatagwe a bego a dula go yona e le motšwantle.

2 Tše ke ditaba tša mabapi le Jakobo.

Ge Josefa a be a na le mengwaga e 17, o be a diša dinku le dipudi a na le barwa ba Biliha le barwa ba Silipa, e lego basadi ba tatagwe. Ke moka Josefa a tla a botša tatago bona dilo tše mpe tšeo bana babo ba bego ba di dira. 3 Isiraele o be a rata Josefa kudu go feta barwa ba gagwe ba bangwe ka moka ka gobane o bile le yena a šetše a tšofetše. O ile a laela gore a direlwe seaparo se sebotse. 4 Ge bana babo ba bona gore tatago bona o be a mo rata go ba feta ka moka, ba thoma go mo hloya gomme ba se sa bolela le yena gabotse.

5 Ka morago Josefa o ile a lora gomme a botša bana babo toro yeo, gomme ba mo hloya le go feta. 6 O ile a re go bona: “Hle theetšang toro yeo ke e lorilego. 7 Re be re tlema dingata tša mabele gare ga tšhemo gomme ka bona ngata ya ka e ema thwii, ke moka dingata tša lena tša ema go e dikologa tša e khunamela.” 8 Bana babo ba re go yena: “O ra gore o tlo ba kgoši ya rena gomme wa re buša?” Ka gona ditoro tša gagwe le tsela yeo a bego a di hlalosa ka yona di ile tša dira gore ba hwetše lebaka le lengwe gape la go mo hloya le go feta.

9 Ka morago ga moo, a lora toro e nngwe gape gomme a e botša bana babo a re: “Ke lorile toro e nngwe gape. Ke lorile letšatši, ngwedi le dinaledi tše 11 di nkhunamela.” 10 Ke moka ge a be a e laodišetša tatagwe le bana babo, tatagwe a mo kgalema a re go yena: “Toro ye o e lorilego e ra go re’ng? Na ruri o ra gore nna le mmago le bana beno re tlo go khunamela?” 11 Bana babo ba ile ba mo jela mona, eupša tatagwe a dula a gopola seo a se boletšego.

12 Bjale bana babo ba ile ba ya go diša mehlape ya tatago bona kgauswi le Shikeme. 13 Ka morago Isiraele a re go Josefa: “Bana beno ba dišitše mehlape kua kgauswi le Shikeme, sepela o yo ba hlola.” Josefa a araba a re: “Ke tla ya tate!” 14 Ke moka a re go yena: “Sepela o yo bona ge e ba dilo di sa ba sepelela gabotse, bona le mehlape ya bona, gomme o boe o tle o mpotše.” Ka gona Josefa a tloga moeding wa Heburone moo ba bego ba dula gona a ya thoko ya Shikeme. 15 Ka morago monna yo mongwe a mo hwetša a sepela moo nageng, ke moka a mmotšiša a re: “O nyaka eng?” 16 Josefa a mo araba a re: “Ke nyaka bana bešo. Hle mpotše gore ba dišitše mehlape kae.” 17 Monna yoo a re: “Mo gona ba tlogile, ka gobane ke kwele ba re ba ya Dothane.” Ka gona Josefa a ya Dothane gomme a hwetša bana babo moo.

18 Ba mmona a sa le kgole, gomme pele a ka fihla go bona ba mo logela maanomabe a go mmolaya. 19 Ka gona ba botšana ba re: “Bonang raditoro yola šole o a tla. 20 Bjale a re tle re mmolayeng re mo lahleleng ka moleteng wa meetse, gomme re tle re re o jelwe ke sebata. Ke moka re tla bona gore go tla direga eng ka ditoro tša gagwe.” 21 Ge Rubeni a ba kwa a leka go mo namolela a re: “A re se mmolayeng.” 22 Ke moka Rubeni a tšwela pele a re: “A re mo lahleleng ka mo moleteng wa meetse wo o lego mo lešokeng gomme re se ke ra mo gobatša.” O be a nyaka go mo šireletša e le gore a tle a mmušetše go tatagwe.

23 Kapejana ge Josefa a fihla go bana babo, ba mo hlobola seaparo sa gagwe se sebotse seo a bego a se apere, 24 ke moka ba mo tšea ba mo lahlela ka moleteng woo wa meetse. Ka nako yeo go be go se na meetse ka moo moleteng.

25 Ke moka ba dula fase ba ja. Eitše ge ba lebelela ba bona sehlopha sa barekiši ba Baishimaele bao ba bego ba etšwa Gileada. Dikamela tša bona di be di rwele boreku bja go nkga bose, setlolo seo se bitšwago balesamo le dikarolwana tša mohlare tšeo di nago le boreku. Ba be ba le tseleng ya go ya Egepeta. 26 Ka gona Juda a re go bana babo: “Re tla boelwa ke eng ge re ka bolaya ngwanabo rena gomme ra uta seo re se dirilego? 27 Tlang re mo rekišetšeng Baishimaele, gomme re se ke ra mo gobatša. Se se šalago ke gore ke ngwanabo rena, ke madi a gabo rena.” Ka gona ba theetša Juda ngwanabo bona. 28 Ge barekiši ba Bamidiane ba be ba feta, bana babo Josefa ba ile ba mo ntšha ka moo moleteng wa meetse gomme ba mo rekišetša Baishimaele bao ka ditšhelete tša silifera tše 20. Barekiši bao ba ile ba iša Josefa Egepeta.

29 Ka morago ge Rubeni a boela kua moleteng wa meetse, o ile a hwetša Josefa a se gona ka moo moleteng gomme a gagola diaparo tša gagwe. 30 Ge a boetše go bana babo a re: “Joo ngwanabo rena o ile! Bjale nna ke tlo bona ke dirile’ng?”

31 Ba tšea seaparo sela sa Josefa gomme ba hlaba phooko ke moka ba ina seaparo seo ka mading a yona. 32 Ka morago ga moo ba tšea seaparo sela se sebotse ba se romela go tatago bona gomme a botšwa gore: “Re hweditše seaparo se. Hle se lebelele o bone ge e ba e le sa morwa wa gago goba e se sona.” 33 Ke moka a se lebeledišiša gomme a re: “Ke seaparo sa morwa wa ka! Ruri Josefa o swanetše go ba a bolailwe ke sebata gomme sa mo ja!” 34 Ka gona Jakobo a kgeila diaparo tša gagwe, a apara mašela go bontšha gore o nyamile gomme a fetša matšatši a mantši a llela morwa wa gagwe. 35 Barwa ba gagwe ka moka le barwedi ba gagwe ka moka ba leka go mo homotša, eupša a gana go homotšega gomme a re: “Ke tla llela morwa wa ka go fihlela ke ehwa!” Ke moka tatagwe a se tlogele go mo llela.

36 Bjale Bamidiane ba ile ba mo rekiša kua Egepeta, ba mo rekišetša Potifara yo e bego e le ntona ya ka mošate e bile e le moetapele wa mašole ao a bego a šireletša kgoši Farao.