Psalme
Miktame* ya Dafida.
16 Ntšhireletše hle Modimo, gobane ke tšhabetše go wena.
2 Ke itše go Jehofa: “Ke wena Jehofa, dilo ka moka tše dibotse tše ke nago le tšona di tšwa go wena.
3 Bakgethwa bao ba lego mo lefaseng,
E lego batho bao ba swanelwago ke go hlomphiwa, ba dira gore ke thabe.”
4 Bao ba hlankelago medimo e mengwe ka mafolofolo, ba oketša manyami a bona.
Nka se tsoge ke file medimo e mengwe dibego tša madi,
Le molomo wa ka o ka se bitše maina a yona.
5 Jehofa o mpha dilo ka moka tšeo ke di hlokago, ke kabelo ya ka, o bjalo ka ditšhegofatšo tšeo di lego ka komiking ya ka.
Wena o šireletša bohwa bja ka.
6 Mollwane wa ka o mafelong ao a nkgahlago.
Bohwa bja ka bo a nkgotsofatša.
7 Ke tla reta Jehofa, yena yo a nkeleditšego.
Le bošego maikwelo* a ka a ka garegare a a mphošolla.
8 Ke dula ke nagana ka Jehofa.
Ka ge a le ka letsogong la ka le letona, nka se boife selo.
9 Pelo ya ka e thabile, le nna ka noši ke thabile kudu.
Le gona, ke šireletšegile.
10 Ka gobane o ka se ntlogele ka Lebitleng.*
O ka se dumelele mohlanka wa gago yo a botegago a bola ka lebitleng.
11 Wena o ntsebiša tsela ya bophelo.
Go ba kgauswi le wena go nthabiša kudu.
Go ba ka letsogong la gago le letona, go dira gore ke dule ke thabile.