Genesi

42 Ge Jakobo a ekwa gore go na le mabele kua Egepeta, o ile a re go barwa ba gagwe: “Go re’ng le no lebelelana le sa dire selo? 2 Ke kwele gore go na le mabele kua Egepeta. Eyang gona gomme le yo re rekela ona, gore re se tlo hwa ka baka la tlala.” 3 Ka gona bana babo Josefa ba lesome ba ya Egepeta go yo reka mabele. 4 Eupša Jakobo a se nyake gore Benjamini, e lego ngwanabo Josefa, a sepele le bo butiagwe ka gobane o itše go bona: “Mohlomongwe a ka tla a welwa ke kotsi mo tseleng gomme a hlokofala.”

5 Ka gona barwa ba Isiraele ba sepela le batho ba bangwe go yo reka dijo, ka gobane go be go wele tlala le nageng ya Kanana. 6 Josefa ke yena a bego a laola naga ya Egepeta, e bile a rekišetša batho ba lefase ka moka mabele. Ke moka bana babo Josefa ba tla ba mo khunamela ba inamišeditše difahlego fase. 7 E rile ge Josefa a bona bana babo, a ba tseba, eupša a dira gore bona ba se mo tsebe. O ile a bolela le bona ka bogale a re: “Le tšwa kae?” Bona ba re: “Re tšwa nageng ya Kanana gomme re tlile go reka dijo.”

8 Ka gona Josefa o ile a tseba gore ke bana babo, eupša bona ba se mo tsebe. 9 Gateetee Josefa a gopola ditoro tšeo a kilego a di lora ka bona, gomme a re go bona: “Le tlo hlola naga! Le tlile go bona gore le ka hlasela naga ye kae!” 10 Ke moka bona ba re go yena: “Aowa mong wa rena, rena bahlanka ba gago re tlile go reka dijo. 11 Ka moka ga rena re bana ba motho. Re banna ba go tshepega. Rena bahlanka ba gago ga se ra tla go hlola naga.” 12 Eupša yena a re: “Ga ke le tshepe! Le tlile go bona gore le ka hlasela naga ye kae!” 13 Ke moka bona ba re: “Rena bahlanka ba gago ka moka ga rena re bana ba motho. Tatago rena o dula nageng ya Kanana gomme o be a na le barwa ba 12. Yo monyenyane o šetše le tatago rena gomme yo mongwe ga a sa le gona.”

14 Eupša Josefa a re go bona: “Ke be ke bolela nnete ge ke be ke re, ‘le tlo hlola naga!’ 15 Ke tlo le leka e le gore ke bone ge e ba le bolela nnete. Ke ikana ka Farao gore le ka se tloge mo go fihlela ge ngwanabo lena yo a etla mo. 16 Romang yo mongwe wa lena gore a yo tšea ngwanabo lena gomme lena le tlo šala le tlemilwe, gore ke bone ge e ba seo le se bolelago e le nnete. Ge e ba le bolela maaka, gona ke ikana ka Farao gore le tlo hlola naga.” 17 Ke moka a ba golega felo gotee matšatši a mararo.

18 Ka letšatši la boraro Josefa a re go bona: “Nna ke boifa Modimo wa nnete, ka gona dirang seo ke le botšago sona gore le phele. 19 Ge e ba le bolela nnete, yo mongwe wa bana babo lena a a šale a golegilwe mo, eupša lena ka moka le ka sepela la išetša ba malapa a lena mabele gore ba se tlo hwa ka baka la tlala. 20 Ke moka le tliše ngwanabo lena yo monyenyane mo, gore re tle re bone ge e ba le bolela nnete gomme le ka se hwe.” Ke moka bona ba dira sona seo.

21 Bjale ba botšana ba re: “Ruri re otlwa ka baka la seo re se dirilego ngwanabo rena, ka gobane re bone ge a be a re llela gore re mo kwele bohloko, eupša rena ra se mo theetše. Ke ka baka leo re lego mathateng a.” 22 Ke moka Rubeni a ba araba a re: “Ke le boditše ka re, ‘Le se ke la gobatša* ngwana yo,’ eupša lena la se ntheetše. Gona bjale re ikarabela ka baka la bophelo bja gagwe.”* 23 Eupša bona ba be ba sa tsebe gore Josefa o kgona go ba kwešiša, ka gobane go be go na le motho yo a ba tolokelago. 24 Ka gona o ile a tloga mo go bona a yo lla. Ke moka a boela go bona, a bolela le bona gape gomme a tšea Simeone a mo tlema mo pele ga bona ba mo lebeletše. 25 Ke moka Josefa a laela bahlanka ba gagwe gore ba tlatše mekotla ya banna bao ka mabele. Le gona o ile a ba laela gore ba bušetše tšhelete ya banna bao mekotleng ya bona le gore ba ba fe dijo tšeo ba tlago go di ja tseleng. Ka gona bahlanka bao ba dira ka wona mokgwa woo.

26 Ke moka ba nametša mabele a bona ditonking tša bona gomme ba sepela. 27 Ge ba be ba le lefelong leo go robalwago go lona tseleng, yo mongwe wa bona o ile a bula mokotla wa gagwe gore a fe tonki ya gagwe furu, gomme a makala a bona tšhelete ka moo mokotleng wa gagwe. 28 Ke moka a re go bana babo: “Ba bušitše tšhelete ya ka, še ka mo mokotleng!” Ba ile ba tšhoga kudu ba ba ba thothomela gomme ba botšišana ba re: “Ke ka baka la’ng Modimo a re otla?”

29 Ge ba fihla go tatago bona nageng ya Kanana, ba ile ba mmotša dilo ka moka tšeo di ba diragaletšego, ba re: 30 “Monna yo a hlokometšego naga ya Egepeta o boletše le rena ka bogale gomme a re latofatša ka gore re tlo hlola naga. 31 Eupša ra mmotša ra re: ‘Re banna ba go tshepega. Ga se ra tla mo go tlo hlola naga. 32 Ka moka ga rena re bana ba motho, tatago rena o be a na le bana ba 12. Yo mongwe ga a sa le gona gomme yo monyenyane o šetše le tatago rena nageng ya Kanana.’ 33 Eupša monna yo a hlokometšego naga yeo o ile a re go rena: ‘Ke tla tseba gore le a tshepega ge yo mongwe wa bana babo lena a ka šala le nna, gomme lena la sepela la išetša ba malapa a lena dijo ka baka la tlala yeo e ba wetšego. 34 Ke moka le tliše ngwanabo lena yo monyenyane mo go nna, e le gore ke bone gore ka nnete le a tshepega ga le tlo hlola naga. Ke tla le bušetša ngwanabo lena gomme la kgona go reka mo nageng ya rena.’”

35 Ge ba be ba dutše ba tšholla mabele le dilo tšeo di lego ka mekotleng ya bona, yo mongwe le yo mongwe wa bona o ile a hwetša tšhelete ka mokotleng wa gagwe. Ge bona le tatago bona ba bona tšhelete yeo, ba tšhoga kudu. 36 Ke moka tatago bona a re go bona: “Le nkamogile bana! Josefa ga a sa le gona le Simeone ga a sa le gona, gona bjale le nyaka go tšea Benjamini! Go re’ng ke diragalelwa ke dilo tše ka moka?” 37 Eupša Rubeni a re go tatagwe: “Ge e ba nka se mmuše go wena, gona o ka bolaya barwa ba ka ba babedi. Mphe yena, ke tla mo hlokomela e bile ke go tshepiša gore ke tla mmušetša go wena.” 38 Eupša yena a re: “Morwa wa ka a ka se sepele le lena, ka gobane butiagwe o hlokofetše gomme yena o šetše a nnoši. Ge e ba a ka welwa ke kotsi mo tseleng gomme a hlokofala, gona le tlo nkiša lebitleng* ke tšofetše e bile ke nyamile.”