Genesi

47 Bjale Josefa a yo begela Farao a re: “Tate le bana bešo le mehlape ya bona ya dinku le dipudi le dikgomo, le dilo ka moka tšeo ba nago le tšona, ba tlile ba etšwa nageng ya Kanana gomme gona bjale ba kua tikologong ya Goshene.” 2 Josefa o ile a tšea bana babo ba bahlano a ba iša go Farao.

3 Ke moka Farao a botšiša bana babo Josefa a re: “Le šoma go dira’ng?” Bona ba mo araba ba re: “Rena bahlanka ba gago re badiši ba dinku, go swana le ge borakgolokhukhu ba rena e be e le badiši.” 4 Ka morago ga moo ba re go Farao: “Re tlile go dula mo nageng ye ka gobane diruiwa tša rena ga di na mo di ka fulago gona, ka ge tlala e le e šoro nageng ya Kanana. Bjale hle, re dumelele re dule tikologong ya Goshene.” 5 Ke moka Farao a re go Josefa: “Ka ge tatago le bana beno ba tlile mo go wena, 6 ba nee karolo e botsebotse ya naga ya Egepeta gore ba dule moo. A ba dule tikologong ya Goshene. Naga ka moka ya Egepeta e laolwa ke wena. Ge e ba gare ga bona go na le banna bao o ba tsebago gore ba kgona go hlokomela diruiwa, gona o ba kgethe gore ba hlokomele diruiwa tša ka.”

7 Ke moka Josefa a tliša Jakobo tatagwe go Farao gomme a mo tsebiša yena. Ka morago ga moo, Jakobo a šegofatša Farao. 8 Bjale Farao a re go Jakobo: “O na le mengwaga e mekae?” 9 Jakobo a re go Farao: “Ke na le mengwaga e 130 (lekgolo-masometharo). E bile ke feditše mengwaga e mentši ke le motšwantle dinageng tša go fapafapana. Mengwaga yeo e be e le e thata, e bile ke e sego kae ge ke e bapetša le yeo borakgolokhukhu ba ka ba e feditšego e le batšwantle.” 10 Ka morago ga moo Jakobo a šegofatša Farao gomme a sepela.

11 Ka gona, Josefa a nea tatagwe le bana babo madulo karolong e botsebotse ya naga ya Egepeta kua tikologong ya Ramasese, go etša kamoo Farao a mo laetšego ka gona. 12 Josefa a nea tatagwe, bana babo le malapa a bona ka moka dijo, go ya ka palo ya bana ba bona.

13 Bjale go be go se na dijo nageng ka moka, ka gobane tlala e be e le e šoro kudu. Batho ba nageng ya Egepeta le ya Kanana ba tlaišega ka baka la tlala yeo. 14 Josefa o ile a rekišetša badudi ba Egepeta le ba Kanana dijo. Ke moka tšhelete yeo batho ba bego ba reka ka yona, o ile a e bea ka ntlong ya Farao. 15 Mafelelong batho ka moka bao ba dulago Egepeta le Kanana ba felelwa ke tšhelete. Ke moka Baegepeta ka moka ba ya go Josefa ba re: “Tšhelete ya rena e fedile. Re fe dijo, go sego bjalo re tlo hwela mo pele ga gago!” 16 Ka gona Josefa a re: “Ge e ba tšhelete ya lena e fedile, gona nneeng diruiwa tša lena gomme nna ke tla le nea dijo.” 17 Ba tliša diruiwa tša bona go Josefa, ke moka Josefa a ba rekišetša dijo ka dipere tša bona, mehlape ya bona ya dinku, dipudi, dikgomo le ditonki. Ngwageng woo ka moka, a ba rekišetša dijo ka diruiwa tša bona ka moka.

18 Ge ngwaga woo o fedile, ngwageng o latelago ba ya go Josefa ba re: “Mong wa rena, re nyaka go go botša gore tšhelete ya rena le diruiwa tša rena di feletše go wena. Ga re sa na selo, go šetše rena feela le naga ya rena. 19 Hle o se ke wa re tlogela re hwela mo pele ga gago ka baka la tlala e bile naga ya rena e sa dulwe ke motho. Reka rena le naga ya rena gomme wena o re fe dijo. Ke moka rena re tla ba makgoba a Farao, gomme naga ya rena ya ba ya gagwe. Re fe peu gore re leme e le gore re phele gomme re se hwe e bile naga ya rena e se ke ya fetoga lešope.” 20 Ka gona Josefa a rekela Farao naga ka moka ya Baegepeta, ka gobane Moegepeta yo mongwe le yo mongwe o be a rekišitše naga ya gagwe ka ge tlala e be e le e šoro. Ke moka naga ya ba ya Farao.

21 Josefa o ile a botša batho bao ba bego ba dula nageng ka moka ya Egepeta gore ba hudugele metseng e megolo. 22 Naga ya baprista ke yona feela a sa kago a e reka, ka gobane baprista ba be ba hwetša dijo tša bona ntlong ya Farao. Ke ka baka leo ba sa kago ba rekiša naga ya bona. 23 Ke moka Josefa a botša batho a re: “Tsebang gore lehono ke le rekile gore le be ba Farao, gomme naga ya lena e be ya gagwe. Tšeang peu ye, le e bjaleng mašemong. 24 Ge le bunne, le direng mekgobo e mehlano, gomme o tee le o neeng Farao. Ke moka e mene yeo e šetšego, e tla ba peu ya mašemo a lena le dijo tša lena le bana ba lena.” 25 Ke moka bona ba re: “Re a leboga mong wa rena, o re phološitše. Hle re bontšhe botho gomme re tla ba makgoba a Farao.” 26 Ke moka Josefa a bea molao woo o sa lego gona go fihla le lehono le, wa gore batho ba swanetše go nea Farao mokgobo o tee go tšwa go mekgobo e mehlano ya dilo tšeo ba di bunnego. Naga ya baprista ke yona feela yeo e ilego ya se be ya Farao.

27 Baisiraele ba tšwela pele ba dula nageng ya Egepeta, tikologong ya Goshene. Ba aga go yona, ba ba le bana gomme ba oketšega ya ba ba bantši kudu. 28 Jakobo o ile a dula nageng ya Egepeta mengwaga e 17, gomme o phetše mengwaga e 147 (lekgolo-masomenne-šupa).

29 Ge Isiraele a le kgauswi le go hwa, o ile a bitša Josefa morwa wa gagwe a re go yena: “Hle bea seatla sa gago ka tlase ga serope sa ka, gomme o nkenele gore o tla mpontšha lerato* le go mpotegela ka go se mpoloke mo Egepeta. 30 Ge ke ehwa, o swanetše go ntloša mo Egepeta gomme o yo mpoloka mabitleng a borakgolokhukhu ba ka.” Ke moka Josefa a re: “Ke tla dira bjalo.” 31 Ka gona Isiraele a re: “Nkenele.” Josefa a mo enela. Ke moka Isiraele a napa a khunamela Modimo dihlogong tša mpete wa gagwe.