Jesaya
37 Ya re gateetee ge Kgoši Hesekia a ekwa ditaba tšeo, a kgeila diaparo tša gagwe, a apara masaka gomme a tsena ka ntlong ya Jehofa. 2 Ke moka a roma Eliakima yo a bego a hlokometše lapa la kgoši, Shebana yo e bego e le mongwaledi gotee le banna ba bagolo ba baperisita go moporofeta Jesaya morwa wa Amotse, banna bao ba bagolo ba be ba apere masaka. 3 Ba re go yena: “Hesekia o re: ‘Le ke letšatši la tlalelo, letšatši la go kgalemelwa le la go gobošwa, le tlo no swana le ge ngwana a le kgauswi le go belegwa, eupša mmagwe a se na matla a go belega. 4 Mohlomongwe Jehofa Modimo wa lena o tla kwa mantšu a Rabashake, yoo mong wa gagwe e lego kgoši ya Asiria a mo romilego gore a tlo kwera Modimo yo a phelago gomme Modimo o tla mo sekiša ka baka la mantšu ao yena Jehofa Modimo wa lena a a kwelego. Ka gona wena rapelela batho bao ba šetšego bao ba sa lego gona.’”
5 Ke moka bahlanka ba Kgoši Hesekia ba tla go Jesaya. 6 Jesaya a re go bona: “Le botše mong wa lena le re: ‘Jehofa o re: “O se ke wa tšhoga ka baka la mantšu ao o a kwelego, e lego mantšu ao bahlanka ba kgoši ya Asiria ba nkgobošitšego ka ona. 7 Ke tla dira gore a nagane ka tsela e itšego, gomme o tla kwa pego a boela nageng ya gabo, ke tla dira gore a bolawe ka sabola nageng ya gabo.”’”
8 Ka morago ga gore Rabashake a kwe gore kgoši ya Asiria e tlogile Lakishi o ile a boela go yona, gomme a e hwetša e elwa le Libina. 9 Bjale kgoši ya Asiria e ile ya kwa go bolelwa gore Kgoši Tirihaka wa Ethopia o tlile go lwa le yona. Ge e ekwa seo, e ile ya romela batho gape go Hesekia ya re: 10 “Sepelang le yo botša Kgoši Hesekia wa Juda le re: ‘O se ke wa lesa Modimo wa gago yo o mo tshepilego a go fora ka go go botša gore: “Jerusalema e ka se newe kgoši ya Asiria gore e e fenye.” 11 Wena ka bowena o kwele seo dikgoši tša Asiria di se dirilego dinageng ka moka, gore di di sentše kudu. Bjale na wena o nagana gore o tla phologa? 12 Na medimo ya ditšhaba tšeo borakgolokhukhu ba ka ba ilego ba di fediša e ile ya di phološa? E kae Gotsana, Harane, Retsefa gotee le batho ba Edene bao ba bego ba le Thele-asara? 13 E kae kgoši ya Hamathi, kgoši ya Arapadi, kgoši ya motse wa Sefarafaima, wa Hena le wa Ifa?’”
14 Hesekia a tšea mangwalo seatleng sa batho bao a bego a ba romile gomme a a bala. Ka morago ga moo o ile a ya ntlong ya Jehofa gomme a a phutholla pele ga Jehofa. 15 Ke moka Hesekia a rapela Jehofa, a re: 16 “Wena Jehofa wa madira, Modimo wa Isiraele, wena yo a dutšego ka godimo ga bakerubi, ke wena o nnoši o lego Modimo wa nnete mebušong ka moka ya lefase. Ke wena o dirilego magodimo le lefase. 17 Wena Jehofa, hlwaya tsebe gomme o kwe. Wena Jehofa, bula mahlo gomme o bone. Ekwa mantšu ka moka ao Sanheribe a a rometšego go kwera wena Modimo yo a phelago. 18 Wena Jehofa, ke nnete gore dikgoši tša Asiria di sentše dinaga ka moka gotee le naga ya tšona. 19 Dikgoši tšeo di ile tša lahlela medimo ya dinaga tšeo ka mollong ka gobane medimo yeo e be e se medimo ya nnete, eupša e be e dirilwe ke batho ka dikota le maswika. Ke ka baka leo dikgoši tšeo di kgonnego go e fediša. 20 Bjale wena Jehofa Modimo wa rena, re phološe go kgoši ya Asiria, e le gore mebušo ka moka ya lefase e tsebe gore wena Jehofa o Modimo o nnoši.”
21 Jesaya morwa wa Amotse a romela molaetša go Hesekia, a re: “Jehofa Modimo wa Isiraele o re: ‘Ka ge o nthapetše mabapi le Kgoši Sanheribe wa Asiria, 22 se ke seo nna Jehofa ke se boletšego mabapi le yena, ke ile ka re:
“Kgarebe yeo e lego morwedi wa Tsione e a go nyatša, e a go kwera.
Morwedi wa Jerusalema o šišinya hlogo ge a go bona.
23 Ke mang yo o mo kwerilego le yo o mo rogilego?
Ke mang yo o mo hlabetšego mašata,
Le go mo lebelela gampe?
Ke Modimo yo Mokgethwa wa Isiraele!
24 O kwerile nna Jehofa o diriša bahlanka ba gago, wa re:
‘Ke tla rotogela godimo ga dithaba,
Ka dikariki tše dintšhi tša ntwa,
Dikarolong tša kgolekgole tša Libanoni.
Ke tla rema mehlare ya yona e metelele ya metsedara le mehlare ya yona e mebotse ya mejunipere.
Ke tla fihla dintlheng tša dithaba, sethokgweng sa yona seo se bofaganego.
25 Ke tla epa didiba le go nwa meetse,
Ke tla omiša dinokana tša Egepeta ka moka ke diriša maoto a ka.’
26 Na ga se wa kwa gore se ke seo ke bego ke dutše ke nyaka go se dira go tloga mehleng ya kgale?
Se ke seo ke bego ke nyaka go se dira go tloga le mehleng e fetilego.
Bjale ke tla se phetha.
Wena o tla dira gore metse e šireleditšwego e fetoge mekgobo ya marope.
27 Badudi ba yona ba ka se kgone go itirela selo,
Ba tla tšhoga e bile ba hlabja ke dihlong.
Ba tla swana le dimela tša naga le bjang bjo botala,
Ba swana le bjang bjo bo šomišitšwego go rulela bjo bo tšhungwago ke phefo ya ka bohlabela.
28 Ke tseba gabotse ge o dula, ge o etšwa le ge o tsena,
E bile ke tseba le ge o nkgalefetše.
29 Ka gobane ke kwele gore o nkgalefetše e bile ke kwele le mokgoši wo o o hlabilego.
Ka gona ke tla tsenya huku ya ka nkong ya gago le tomo ya ka molomong wa gago,
Ka go gomišetša morago ka tsela yeo o tlilego ka yona.”
30 “‘Se e tla ba leswao go wena: Ngwageng wo le ngwageng wa bobedi le tla ja mabele ao a metšego a se a bjalwa ke motho, eupša ngwageng wa boraro le tla bjala peu gomme la buna, le gona le tla bjala mašemo a diterebe gomme la ja dienywa tša tšona. 31 Batho ba Juda bao ba phonyokgilego, e lego bao ba šetšego, ba tla swana le mohlare wo o tsemilego medu fase, woo o enywago dienywa tše dintšhi. 32 Ka gobane Jerusalema go tla tšwa batho bao ba šetšego, gomme Thabeng ya Tsione gwa tšwa bao ba phologilego. Jehofa wa madira o tlo dira se ka mafolofolo.
33 “‘Ka gona Jehofa o bolela ka kgoši ya Asiria o re:
“E ka se tsene motseng wo,
Goba ya betša mosebe go wona,
E ka se tle go wona e swere kotse
Goba ya aga leboto gore e tle e o hlasele.”’
34 Jehofa o re: “‘E tla gomela morago ka tsela yeo e tlilego ka yona,
Gomme e ka se tsene motseng wo.’
35 ‘Ke tla lwela motse wo ka ba ka o phološa ka baka la ka
Le ka baka la Dafida mohlanka wa ka.’”
36 Ke moka morongwa wa Jehofa o ile a ya a bolaya banna ba 185 000 (dikete tše lekgolo-masomeseswai-hlano) ditenteng tša Baasiria. Mesong ge batho ba tsoga ba ile ba hwetša ditopo tša banna bao ka moka. 37 Ka gona Kgoši Sanheribe wa Asiria a sepela, a boela Ninife gomme a dula moo. 38 Ya re ge a khuname ntlong ya Nisiroko modimo wa gagwe, barwa ba gagwe e lego Adirameleke le Sharetsere ba mo hlaba ka sabola, gomme ba tšhabela nageng ya Ararate. Ke moka Morwa wa gagwe Esara-hadoni a buša legatong la gagwe.