Sakaria

14 “Bonang! Letšatši la Jehofa le a tla gomme manaba a lena a tla abagana mo pele ga lena dilo tša lena tše bohlokwa tšeo a di tšerego mo go lena. 2 Ke tla kgoboketša ditšhaba ka moka gore di lwe le Jerusalema. Motse o tla thopša, dilo tšeo di lego ka dintlong di tla tšewa, gomme basadi bona ba tla katwa. Seripa sa batho ba mo motseng se tla ya bothopša, eupša batho bao ba šetšego motseng bona ba ka se fedišwe.

3 “Jehofa o tla lwa le ditšhaba tšeo go swana le ge a ile a lwa le manaba a gagwe nakong e fetilego. 4 Letšatšing leo maoto a gagwe a tla ema thabeng ya mehlware, yeo e lebanego le Jerusalema ka bohlabela. Thaba ya mehlware e tla phatloga ka bogare go tloga ka bohlabela go ya ka bodikela. Go tla ba le moedi o mogolo kudu, gomme seripa sa thaba yeo se tla šuthela leboa gomme se sengwe sa šuthela ka borwa. 5 Lena le tla tšhabela moeding wa dithaba tša ka gore le šireletšege, ka gobane moedi wa dithaba o tla fihla Atsele. Le tla tšhaba go swana le ge le kile la tšhaba tšhišinyego ya lefase mehleng ya Kgoši Usia wa Juda. Jehofa Modimo wa ka yena o tla tla a na le bakgethwa ka moka.

6 “Letšatšing leo go ka se be le seetša, dilo di tla kgahla, tša ema tsii. 7 E tla ba letšatši leo le tsebjago e le la Jehofa. Go ka se be le bošego goba mosegare, bošego go tla ba le seetša. 8 Letšatšing leo meetse ao a neago bophelo a tla ela a etšwa Jerusalema, seripa sa wona se tla elela lewatleng la ka bohlabela, gomme se sengwe sa elela lewatleng la ka bodikela. Se se tla direga selemo le marega. 9 Jehofa e tla ba Kgoši lefaseng ka moka. Letšatšing leo batho ka moka ba tla hlankela Jehofa a nnoši. E bile ba tla tumiša leina la gagwe le nnoši.

10 “Naga ka moka e tla swana le Moedi wa Araba, go tloga ka Geba go fihla ka Rimone ka borwa bja Jerusalema. Jerusalema e tla phagamišwa lefelong la yona gomme batho ba dula go yona, go tloga Keiting ya Benjamini go fihla moo go lego Keiti ya Pele go ba go fihla Keiting ya Khoneng. Le go tloga ka maboto a magolo a go šireletša motse a Hananele, go ba go fihla mafelong a go gatela beine a kgoši. 11 Batho ba tla dula Jerusalema, gomme e ka se sa fedišwa gape. Ke moka batho ba tla dula go yona ba šireletšegile.

12 “Kotlo yeo Jehofa a tlago go otla batho ba ditšhaba ka moka bao ba lwago le Jerusalema še: Nama ya bona e tla bola ba sa eme ka maoto, mahlo a bona a tla bola a le ka mekotianeng ya ona, gomme maleme a bona a tla bola a le ka ganong ga bona.

13 “Letšatšing leo Jehofa o tla dira gore batho ba gakanege kudu. Ba tla swarana ka diatla gomme ba hlaselana. 14 Juda le yona e tla lwa e le kgauswi le Jerusalema, gomme mahumo a ditšhaba ka moka tšeo di lego kgauswi le yona, a tla kgoboketšwa ka bontšhi, e lego gauta, silifera le diaparo.

15 “Le gona kotlo ya go swana le yeo e tla wela dipere, dimeila, dikamela, ditonki le diruiwa ka moka tšeo di lego ka dikampeng tšeo.

16 “Batho ka moka bao ba šetšego ba ditšhaba tšeo di lwago le Jerusalema, ba tla ya Jerusalema ngwaga le ngwaga go yo rapela Kgoši, e lego Jehofa wa madira. E bile ba tla ya moo go yo keteka Monyanya wa Mešaša. 17 Eupša ge e ba mo ditšhabeng tša lefase go ka ba le batho bao ba ka se yego Jerusalema go yo rapela Kgoši, yena Jehofa wa madira, ba ka se nelwe ke pula. 18 Ge e ba Baegepeta ba ka se ye moo, le bona ba ka se nelwe ke pula. Jehofa o tla otla ditšhaba tšeo di sa yego go yo keteka Monyanya wa Mešaša. 19 Ye e tla ba kotlo ya Baegepeta le ditšhaba ka moka tšeo di sa yego go yo keteka Monyanya wa Mešaša.

20 “Letšatšing leo ditlolokong tša dipere go tla ngwalwa mantšu ao a rego: ‘Bokgethwa ke bja Jehofa!’ Dipitša tša go apea tšeo di lego ka ntlong ya Jehofa, di tla swana le dibjana tšeo di lego ka pele ga aletare. 21 Pitša e nngwe le e nngwe yeo e lego Jerusalema e tla ba e kgethwa, e bile e tla ba ya Jehofa wa madira, gomme batho ka moka bao ba dirago dihlabelo ba tla tšea tše dingwe ba apea ka tšona. Letšatšing leo, go ka se sa ba le Mokanana ntlong ya Jehofa wa madira.”