Baahlodi

4 Ka morago ga ge Ehudi a hlokofetše, Baisiraele ba ile ba boela ba direla Jehofa dilo tše mpe. 2 Ka gona Jehofa a dumelela Jabini kgoši ya Kanana, yo a bego a buša Hatsora, gore a ba thope. Molaodi wa mašole a gagwe e be e le Sisera yoo a bego a dula Haroshethe yeo e bego e le ya ditšhaba tše dingwe. 3 Baisiraele ba kgopela Jehofa gore a ba thuše ka gobane Jabini o be a na le dikoloi tša ntwa tše 900 (makgolo a senyane) tšeo di hlometšwego disabole maotwaneng a tšona. O ile a gatelela Baisiraele kudu ka mengwaga e 20.

4 Ka nako yeo, Debora moporofeta wa mosadi, yo e bego e le mosadi wa Lapidothe, e be e le moahlodi kua Isiraele. 5 O be a tlwaetše go dula ka tlase ga mopalema wa gagwe magareng ga Rama le Bethele tikologong ya kua dithabeng tša Efuraime. Baisiraele ba be ba fela ba eya go yena gore a ba ahlolele. 6 A romela molaetša go Baraka morwa wa Abinoama kua Kedeshe-nafutali, a re go yena: “Jehofa Modimo wa Isiraele o go laetše gore: ‘Tšea banna ba 10 000 (dikete tše lesome) molokong wa Nafutali le wa Sebulone le ye Thabeng ya Thabora. 7 Ke tla dira gore Sisera molaodi wa madira a Jabini le dikoloi tša gagwe tša ntwa gotee le mašole a gagwe ba tle moeding wa Kishoni, gomme ke tla dira gore o ba fenye.’”

8 Ge a re’alo, Baraka a re go yena: “Ge e ba o ka ya le nna, gona ke tla ya, eupša ge e ba o sa ye le nna, gona nka se ye.” 9 Debora a re: “Ke tla ya le wena. Eupša ga se wena o tlago go retwa ntweng ye, ka gobane Jehofa o tla dira gore Sisera a fenywe ke mosadi.” Ke moka Debora a ema a ya le Baraka kua Kedeshe. 10 Baraka a bitša ba moloko wa Sebulone le wa Nafutali gore ba ye le yena Kedeshe, gomme banna ba 10 000 (dikete tše lesome) ba mo šala morago. Debora o ile a ya le yena.

11 Hebere wa Mokeni o be a ikarogantše le Bakeni, ditlogolo tša Hobaba, yoo e bego e le ratswale wa Moshe. O be a hlomile tente kgauswi le mohlare o mogolo kua Tsaananime yeo e lego Kedeshe.

12 Ke moka Sisera a tsebišwa gore Baraka morwa wa Abinoama o rotogetše Thabeng ya Thabora. 13 Sisera a napa a kgoboketša dikoloi tša gagwe ka moka tša ntwa, dikoloi tša ntwa tše 900 (makgolo a senyane) tšeo di hlometšwego disabole maotwaneng a tšona, a kgoboketša le mašole ka moka ao a bego a na le wona, ao a bego a etšwa Haroshethe ya ditšhaba tše dingwe gore ba ye moeding wa Kishoni. 14 Debora a re go Baraka: “Ema, gobane lehono Jehofa o tla go thuša gore o fenye Sisera. Jehofa ke yena a go etilego pele.” Ke moka Baraka a theoga a etšwa Thabeng ya Thabora a šetšwe morago ke banna ba 10 000 (dikete tše lesome). 15 Ke moka Jehofa a hlakahlakanya Sisera le dikoloi tša gagwe ka moka tša ntwa gotee le mašole a gagwe, a dira gore Baraka a ba fenye ka tšhoša. Mafelelong Sisera a fologa koloing ya gagwe gomme a tšhaba. 16 Baraka a rakediša dikoloi tša ntwa le mašole ka moka go fihla Haroshethe ya ditšhaba tše dingwe. Ka gona mašole ka moka a Sisera a ile a bolawa ka sabola, gwa se be le o tee yo a phologago.

17 Eupša Sisera o ile a tšhabela tenteng ya Jaele mosadi wa Hebere wa Mokeni, ka gobane Jabini kgoši ya Hatsora le ba lapa la Hebere wa Mokeni ba be ba phedišana ka khutšo. 18 Ke moka Jaele a tšwa a yo gahlanetša Sisera, a re go yena: “Etla mono mong wa ka, etla mo go nna. O se ke wa tšhoga.” Ke moka Sisera a ya ka tenteng ya Jaele gomme Jaele a mo khurumetša ka kobo. 19 Ke moka Sisera a re go yena: “Ke nyorilwe, ke kgopela o mphe meetse a manyenyane ke nwe.” Ka gona Jaele a khurumolla lepotlelo la mokgopa gomme a mo tšhelela maswi a nwa, a buša a mo khurumetša. 20 Ka morago a re go yena: “Ema mojakong wa tente, ge motho yo mongwe a ka go botšiša a re: ‘Na go na le motho ka mo?’ Wena o re: ‘Ga a gona!’”

21 Jaele mosadi wa Hebere a tšea phini e kopana ya tente le hamola a khukhunetša Sisera a sa ile ka boroko e bile a lapile, a kokotela phini yeo magareng ga phatla ya gagwe le tsebe gomme ya phuleletša fase, ke moka a hwa.

22 Baraka a tšwelela a rakediša Sisera gomme Jaele a tšwa a mo gahlanetša, a re go yena: “Etla ke go bontšhe monna yo o mo nyakago.” Baraka a tsena le yena ka tenteng gomme a hwetša Sisera a hwile, a kokotetšwe phini e kopana ya tente magareng ga phatla ya gagwe le tsebe.

23 Ka gona letšatšing leo Modimo a dira gore Baisiraele ba fenye Jabini kgoši ya Kanana. 24 Baisiraele ba ile ba hlasela Jabini kgoši ya Kanana kudu go fihlela ba mmolaya.