Baahlodi
5 Ka letšatši leo Debora le Baraka morwa wa Abinoama ba opela koša ye:
2 “Retang Jehofa,
Ka ge Baisiraele ba bofolotše meriri ya bona,*
Ka gobane setšhaba se ithaopetše go ya ntweng.
3 Theetšang lena dikgoši! Hlwayang tsebe lena babuši.
Ke tla opelela Jehofa.
Ke tla opelela Jehofa Modimo wa Isiraele dikoša tša go mo tumiša.
4 Jehofa, ge o tloga Seire,
Ge o etšwa nageng ya Edomo,
Lefase le ile la šikinyega, gomme magodimo a neša pula,
Maru le ona a tšholla meetse.
5 Dithaba di ile tša šišinyega* pele ga Jehofa,
Thaba ya Sinai le yona e ile ya šišinyega pele ga Jehofa, Modimo wa Isiraele.
6 Mehleng ya Shamogara morwa wa Anathe,
Le mehleng ya Jaele, ditsela di be di se na basepedi.
Basepedi ba be ba dula ba sepela ka ditsela tše dinyenyane.
7 Go be go se sa na batho bao ba dulago magaeng kua Isiraele,
Ba be ba se sa le gona go fihla ge nna Debora ke fihla,
Go fihla ke eba bjalo ka mma gore ke thuše Isiraele.
8 Ba ile ba kgetha medimo ya maaka.
Ke moka gwa tsoga ntwa dikeiting tša metse.
Gwa se be le kotse le ge e le lerumo,
Go mašole a 40 000 (dikete tše masomenne) a Isiraele.
9 Pelo ya ka e thekga balaodi ba Isiraele,
Bao ba ithaopetšego go ya le setšhaba.
Retang Jehofa.
10 Lena banamedi ba ditonki,
Lena bao le dutšego mebeteng ya go tura,
Le lena bao le sepelago tseleng,
Elang hloko se!
11 Go ile gwa kwagala mantšu a batho bao ba gelelago meetse didibeng,
Ba anega dilo tše dibotse tšeo Jehofa a di dirilego,
Le dilo tše dibotse tšeo di dirilwego ke badudi ba magaeng kua Isiraele.
Ke moka batho ba Jehofa ba ya dikeiting tša motse.
12 Tsoga, emelela wena Debora!
Tsoga o opele!
Ema, wena Baraka morwa wa Abinoama, o ete pele batho bao o ba thopilego!
13 Ke moka bao ba šetšego ba ya go baetapele.
Batho ba Jehofa ba tlile go nna gore ba lwe le manaba a bona ao a nago le matla.
14 Ba be ba etšwa moeding wa kua Efuraime,
Ba go šetše morago wena Benjamini. Ba gare ga mašole a gago.
Balaodi ba tlile ba etšwa Makiri,
Go tšwa go Sebulone, go tlile bao ba bego ba swere dilo tša mongwadi.
15 Baetapele ba moloko wa Isakara ba be ba na le Debora.
Go swana le ge Isakara a be a na le Debora, le Baraka o be a na le yena.
O ile a ya moeding a sepela ka maoto.
Meloko ya Rubeni yona e be e dikadika.
16 Ke ka baka la eng o dutše gare ga merwalo ya gago e mebedi,
O theeditše badiši ba letšetša mehlape ya bona dinaka?
Ge e le meloko ya Rubeni yona e be e dikadika.
17 Badudi ba Gileada ba ile ba tšwela pele ba ituletše ka mošola wa Noka ya Jorodane.
Ke ka baka la’ng Dani a dutše dikepeng?
Ashere o ituletše moo lewatle le thomago gona,
Gomme o ituletše maemakepeng a gagwe.
18 Batho ba Sebulone ba beile maphelo a bona kotsing moo ba nyakilego ba ehwa.
Batho ba Nafutali le bona ba ile ba bea maphelo a bona kotsing dithabeng.
19 Dikgoši di ile tša tla tša lwa le rena.
Ke moka dikgoši tša Kanana tša lwa
Kua Thaanake nokeng ya Megido.
Ga se tša itšeela selo le ge e le sefe sa silifera.
21 Noka ya Kishoni e ile ya tlala gomme ya ba gogola,
Noka ya kgale, e lego noka ya Kishoni.
Wena moya wa ka, o fentše banna ba matla wa ba wa ba gatakela.
22 Gomme dipere tša Sisera di be di kiba mo fase ka ditlhako tša tšona
Ka ge di be di kitima ka lebelo di leka go tšhaba.
23 Morongwa wa Jehofa a re: ‘Anke Merotse e welwe ke madimabe,
Yona le badudi ba yona,
Ga se ba tla ba thuša Jehofa,
Ga se ba tla ba thuša Jehofa le batho ba gagwe bao ba nago le matla.’
24 Jaele mosadi wa Hebere wa Mokeni
O šegofaditšwe kudu gare ga basadi,
O šegofaditšwe kudu gare ga basadi bao ba dulago ditenteng.
25 Sisera o mo kgopetše meetse, yena a mo fa maswi.
O ile a mo fa maswi ao a kgahlilego* ka sebjana se sebotse sa tšhipi.
26 O ile a tšea phini e kopana ya tente,
A tšea hamola ka seatla sa gagwe se setona.
A kokotela phini yeo go Sisera, ya phuleletša hlogong ya gagwe,
Gomme a pharola magareng ga phatla ya gagwe le tsebe.
27 Sisera a wela maotong a Jaele, gomme a rapalala.
A wela maotong a gagwe gomme a rapalala,
O ile a hwela moo a wetšego gona.
28 Go na le mosadi yoo a lebeletšego ka lefasetere,*
E be e le mmago Sisera, o be a ipotšiša gore:
‘Go re’ng koloi ya gagwe ya ntwa e diega go tla?
Ke ka baka la’ng ke sa kwe mošito wa dipere tša gagwe?’
29 Basadi ba bohlale ba ntlong ya gagwe ba mo araba,
Le yena a dulela go ipotša gore:
30 Ba swanetše go ba ba abelana dilo tšeo ba di hweditšego ka morago ga ntwa,
Lešole le lengwe le le lengwe ba le fa ngwanenyana o tee goba ba babedi,
Sisera ba mo fa lešela le le tailwego, lešela le le tailwego,
Seaparo sa go kgabišwa, lešela le le tailwego, diaparo tše pedi tšeo di kgabišitšwego
Tša go kgabiša melala ya bao ba tšwago go thopa naga.’
31 Jehofa, anke manaba a gago ka moka a fedišwe,
Eupša bao ba go ratago ba phadime bjalo ka letšatši.”
Ke moka Baisiraele ba ile ba phela ka khutšo ka mengwaga e 40.