Jobo
26 Jobo a araba a re:
2 “Ruri o thušitše yo a se nago matla,
E bile o mo phološitše!
3 Yo a se nago bohlale o mo neile keletšo e botse,
O dirile gore bohlale bja gago bjo bo holago bo tsebje ke batho!
4 O leka go bolela le mang,
Gona dilo tšeo o di bolelago o di tšere go mang?
5 Bao ba hwilego, e lego bao ba se nago matla, ba a thothomela pele ga Modimo,
Ba ka tlase go feta lewatle le dilo tšeo di dulago go lona.
6 Ga go na selo seo se lego ka Lebitleng seo Modimo a sa kgonego go se bona,
E bile o bona dilo ka moka tšeo di lego lefelong leo dilo di fedišwago go lona.
7 O otlolletše lefaufau la ka leboa mo go se nago selo,
O beile lefase gore le se ke la thekgwa ke selo.
8 O phuthela meetse ka maru a gagwe,
Gore maru a se ke a phulega ka ge a imelwa ke meetse.
9 O šira sedulo sa gagwe sa bogoši,
Ka go se apeša ka leru la gagwe.
10 O thadile mollwane gare ga sebakabaka le lewatle,
O dirile mollwane magareng ga seetša le leswiswi.
11 Diphilara tša legodimo di a šišinyega,
Di tšhošwa ke kgalemelo ya Modimo.
12 O hudua lewatle ka matla a gagwe,
Gomme ka ge a kwešiša, o robaganya sephedi se segologolo sa ka lewatleng.
13 O hlwekiša lefaufau ka mohemo wa gagwe,
O bolaile noga yeo e gagabago.
14 Bona! Tše ke dilo tše sego kae feela tšeo a di dirilego.
Seo re se kwelego ka yena, se no ba bjalo ka ge eka ke go sebaseba!
Ka gona ke mang yo a ka kwešišago kamoo a tšweletšago modumo wa matla a legadima la gagwe?”