Jeremia
9 Okare nkabe hlogo ya ka e be e le meetse,
Gomme mahlo a ka e le mothopo wa megokgo!
Gona ke be ke tla lla bošego le mosegare,
Ke llela batho ba ka bao ba bolailwego ka sehlogo.
2 Ge nkabe ke be ke na le lefelo la go robala la basepedi lešokeng,
Gona ke be ke tla tlogela batho ba ka gomme ka ba šia,
Ka gobane ka moka ga bona ke dihlotlolo,
Ke sehlopha sa baradia.
3 Ba ngangile maleme a bona bjalo ka bora,
Naga e tletše ka maaka le go se tshepege.
Jehofa o re: “Bobe bja bona bo feteletše,
E bile ga ba na taba le nna.
4 Yo mongwe le yo mongwe a itlhokomele go wa gabo,
E bile a se ke a tshepa gaešita le ngwanabo.
Ka gobane motho a ka radiiwa le ke ba gabo,
E bile a ka thomeletšwa ke baagišane ka moka.
5 Yo mongwe le yo mongwe o fora wa gabo,
E bile ga go na yo a bolelago nnete.
Ba rutile maleme a bona go bolela maaka.
Ba iphetša matla ka go dira dilo tše mpe.
6 Wena o phela le batho bao ba se nago nnete.
Ka ge ba se na nnete, ba ganne go ntseba,” o realo Jehofa.
7 Ka gona Jehofa wa madira o re:
“Ke tla ba tološa gomme ka ba hlahloba,
Ka gobane ke eng se sengwe seo nka se dirago ka morwedi wa batho ba ka?
8 Leleme la bona leo le bolelago maaka ke mosebe wo o bolayago.
Motho o bolela ka khutšo le wa gabo,
Eupša ka pelong o mo laletše.”
9 Jehofa o re: “Na ga se ka swanela go ba sekiša ka baka la dilo tše?
Goba na ga se ka swanela go itefeletša setšhabeng sa mohuta wo?
10 Ke tla hlaba mokgoši ka ba ka llela dithaba,
Ka opelela mafelo ao diphoofolo di fulago go ona lešokeng koša ya sello,
Ka gobane mafelo ao a fišitšwe e le gore go se be le yo a fetago go ona,
E bile ga go kwagale le seruiwa se lla moo.
Dinonyana le dibata di tšhabile, di ile.
11 Ke tla dira gore Jerusalema e be mekgobo ya maswika, ke tla e dira melete ya diphukubje,
E bile ke tla dira gore metse ya Juda e be marope, go se be le motho yo a dulago go yona.
12 Ke mang yo a lego bohlale gore a ka kwešiša se?
Jehofa o boditše mang se gore a se botše ba bangwe?
Ke ka baka la’ng naga e fedišitšwe?
Ke ka baka la’ng e fišitšwe go swana le lešoka,
Gomme go se na yo a fetago go yona?”
13 Jehofa o ile a araba a re: “Ka gobane ba ganne molao wa ka wo ke ba neilego wona, le ka gobane ga se ba o latela, e bile ga se ba kwa lentšu la ka. 14 Eupša ba ile ba ngangabala ba latela dipelo tša bona, e bile ba rapela diswantšho tša Baali kamoo botatago bona ba ba rutilego ka gona. 15 Ka gona Jehofa wa madira, yena Modimo wa Isiraele o re: ‘Šefa ke dira gore batho ba ba je lengana,* e bile ke tla ba nweša meetse ao a nago le mpholo. 16 Ke tla ba phatlalatša ditšhabeng tšeo bona le botatago bona ba bego ba sa di tsebe, e bile ke tla romela manaba gore a ba rakediše ka sabola go fihlela a ba fediša.’
17 “Jehofa wa madira o re:
‘Dirang dilo ka kwešišo.
Bitšang basadi bao ba opelago dikoša tša sello,
Le bitšeng le basadi bao ba nago le bokgoni bja go lla gore ba tle.
18 Ba bitšeng ba tle kapejana ba tle ba re opelele koša ya sello,
E le gore mahlo a rena a rothe megokgo,
Le marama a rena a elele megokgo.
19 Go kwagetše lentšu la sello Tsione le re:
“Ruri re sentšwe!
Re hlabilwe ke dihlong kudu!
Ka gobane re tlogetše naga, e bile ba phušotše dintlo tša rena.”
20 Lena basadi, ekwang lentšu la Jehofa.
Anke ditsebe tša lena di kwe seo a se bolelago.
Rutang barwedi ba lena sello se,
E bile le rutaneng koša ye ya sello.
21 Lehu le tsene ka mafasetere a rena,
Le tsene mafelong a rena a šireleditšwego
Gore le tšee bana diterateng
Le masogana mebarakeng.’
22 Bolela o re: ‘Jehofa o re:
“Ditopo tša batho di tla rapalala mo fase go swana le manyora,
Le go swana le dingatana tša mabele tšeo di sa tšwago go robja ke motho yo a bunago,
Go se na yo a di kgoboketšago.”’”
23 Jehofa o re:
“Anke motho yo bohlale a se ke a ikgantšha ka bohlale bja gagwe,
Anke motho yo a nago le matla a se ke a ikgantšha ka matla a gagwe,
Le gona anke mohumi a se ke a ikgantšha ka mahumo a gagwe.”
24 “Eupša anke yo a ikgantšhago a ikgantšhe ka gore
O tseba nna Jehofa, e bile o nkwešiša gabotse,
Gore ke Modimo yo a bontšhago lerato,* toka le yo a dirago dilo tše di lokilego lefaseng,
Ka gobane dilo tše di a nkgahla,” o realo Jehofa.
25 Jehofa o re: “Tsebang gore go tla matšatši ao ka ona ke tlago go sekiša yo mongwe le yo mongwe yo a bolotšego eupša ge e le gabotse a se a bolla, 26 e lego Egepeta, Juda, Edomo, Baamoni, Moaba le batho ka moka bao ba kotilego dihlogo ka mo mahlakoreng bao ba dulago lešokeng, ka gobane ditšhaba ka moka ga se tša bolla gomme Baisiraele ka moka ga se ba bolla dipelong.”