Puku ya Bobedi ya Samuele
6 Dafida a kgoboketša gape mašole ka moka a matla kudu a 30 000 kua Isiraele. 2 Ke moka Dafida le banna ka moka bao a bego a na le bona ba ya Baale-juda, gore ba yo tšea Areka ya Modimo wa nnete, yeo batho ba emago pele ga yona gomme ba bitša leina la Jehofa wa madira, yena yoo a dutšego godimo* ga bakerubi. 3 Ba ile ba nametša Areka ya Modimo wa nnete godimo ga kariki e mpsha gore ba e tloše ntlong ya Abinadaba yeo e bego e le mmotong. Usa le Ahio, e lego barwa ba Abinadaba, ba be ba hlahla dikgomo tšeo di bego di goga kariki yeo.
4 Ba rwala Areka ya Modimo wa nnete go tloga ntlong ya Abinadaba yeo e bego e le mmotong gomme Ahio o be a etile Areka yeo pele. 5 Dafida le Baisiraele ka moka ba be ba bina pele ga Jehofa ba letša diletšo tša mehutahuta tša kota ya mojunipere, diharepa, diletšo tše dingwe tša metato, meropa, disimbala le diletšo tše dingwe. 6 Eupša ge ba fihla seboeng* sa Nakone, Usa a otlollela seatla sa gagwe Arekeng ya Modimo wa nnete gomme a e swara, ka gobane dikgomo di nyakile di e wiša. 7 Ka baka leo Jehofa a galefela Usa kudu gomme Modimo wa nnete a mmolaya ka baka la go hloka tlhompho, ke moka a hwela moo kgauswi le Areka ya Modimo wa nnete. 8 Eupša Dafida a galefa kudu ka gobane Jehofa o ile a galefela Usa gomme a mo hlasela ke moka lefelo leo la bitšwa gore ke Peretse-usa* go ba go fihla le lehono. 9 Letšatšing leo, Dafida o ile a boifa Jehofa kudu, ke moka a re: “Areka ya Jehofa e tla fihla bjang go nna?” 10 Dafida o be a sa nyake go tliša Areka ya Jehofa moo a bego a le gona Motseng wa Dafida, go e na le moo, o ile a e iša ntlong ya Obede-edomo wa Mogathe.
11 Areka ya Jehofa e dutše ntlong ya Obede-edomo wa Mogathe dikgwedi tše tharo gomme Jehofa a tšwela pele a šegofatša Obede-edomo le ba lapa la gagwe ka moka. 12 Kgoši Dafida a botšwa gore: “Jehofa o šegofaditše ba ntlo ya Obede-edomo le dilo ka moka tšeo e lego tša gagwe ka baka la Areka ya Modimo wa nnete.” Ka gona Dafida a ya a tšea Areka ya Modimo wa nnete ntlong ya Obede-edomo gomme a e tliša Motseng wa Dafida a thabile. 13 Ge bao ba rwelego Areka ya Jehofa ba gatile dikgato tša mathomo tše tshelelago, Dafida o ile a dira sehlabelo ka namane e nonnego le ka poo.
14 Dafida o be a bina pele ga Jehofa ka matla a gagwe ka moka a apere efoda* ya lešela la linene. 15 Dafida le Baisiraele ka moka ba be ba rotoga le Areka ya Jehofa ba goeletša ka lethabo ebile ba letša naka. 16 Eupša ge Areka ya Jehofa e fihla Motseng wa Dafida, Mikala morwedi wa Saulo o ile a lebelela fase ka lefasetere gomme a bona Kgoši Dafida a tshelatshela ebile a bina pele ga Jehofa gomme yena a thoma go mo nyatša ka pelong ya gagwe. 17 Ba tliša Areka ya Jehofa ka tenteng yeo Dafida a bego a e diretše yona gomme ba e bea lefelong la yona. Ke moka Dafida a dira dibego tša go fišwa le dihlabelo tša go dira khutšo* pele ga Jehofa. 18 Ge Dafida a feditše go dira dihlabelo tša go fišwa le tša go dira khutšo le Modimo, a šegofatša batho ka moka ka leina la Jehofa wa madira. 19 Ke moka a tšea senkgwa sa nkgokolo, senkgwa seo se dirilwego ka dienywa tša mopalema le senkgwa seo se dirilwego ka diterebe tše di omišitšwego a di fa batho ka moka le lešaba ka moka la Isiraele, banna le basadi, ke moka batho ka moka ba tloga, yo mongwe le yo mongwe a boela ntlong ya gagwe.
20 Ge Dafida a boela gae gore a rapelele lapa la gagwe gore Modimo a le thuše, Mikala morwedi wa Saulo a tla go mo gahlanetša, a re: “Ruri lehono kgoši ya Isiraele e inyatšišitše kudu ka go ikapola pele ga makgoba a basetsana a bahlanka ba yona go swana le monna wa lešilo ge a ikapola pele ga batho!” 21 Ge Dafida a ekwa seo, a re go Mikala: “Ke be ke keteka pele ga Jehofa, yo a nkgethilego gore ke be moetapele wa setšhaba sa Jehofa sa Isiraele go e na le go kgetha tatago le ba lapa la gagwe. Ka gona ke tla bina pele ga Jehofa. 22 Ebile ke tla inyatšiša le go feta ka ba ka itira motho yo a sego bohlokwa. Eupša makgoba a basetsana ao o bolelago ka ona, a tlo ntlhompha kudu.” 23 Ka gona Mikala morwedi wa Saulo ga se a ka a ba le bana go ba go fihla a hlokofala.