Jobo
13 “Mahlo a ka a bone dilo tše ka moka,
Gomme ditsebe tša ka tša di kwa ka ba ka di kwešiša.
2 Dilo tšeo le di tsebago le nna ke a di tseba,
Ga le mphale ka selo.
3 Ge e le nna yena ke tla bolela le Ramatlaohle,
Ke tla ikemelela pele ga Modimo.
4 Eupša le mphara ka maaka,
Ka moka ga lena le dingaka tša go hloka mohola.
5 Ge feela le be le ka ikhomolela,
Seo se be se tla bontšha gore le bohlale.
6 Hle ekwang ge ke leka go itlhalosa,
Gomme le ntheetšeng ge ke leka go ikemelela.
7 Na le ka bolela dilo tše mpe ka leina la Modimo,
Le gona na le ka bolela maaka ka yena?
8 Na le tla ema le yena,
Goba na le tla leka go thekga Modimo wa nnete tshekong?
9 Ge Modimo a be a ka le hlahloba, na o be a tla hwetša le sa solege?
Na le nagana gore le ka mo fora go swana le ge motho a forwa?
10 Modimo o tla le kgalemela ge le ka leka go ema le yena,
Gomme nna la se mpontšhe toka e bile la leka go uta seo.
11 Na bogolo bja gagwe ga bo le tšhoše,
Le gona na ge a ka le tšhoša le ka se tšhoge?
12 Dipolelo tša lena tše bohlale ga di na mohola go swana le molora,
Dilo tše le bego le di bolela gore le ikemelele, ga di na mohola go swana le dišireletši tšeo di dirilwego ka letsopa.
13 Homolang gore ke bolele.
Le gona anke seo se ntiragalelago se ntiragalele!
14 Go reng ke ipea kotsing,
E bile ke bapala ka bophelo bja ka?
15 Le ge a be a ka mpolaya, na ke be nka se lete?
Ke be ke tla no mmontšha mo pele ga gagwe gore ga ke na molato.
16 Le gona o be a tla mphološa,
Ka gobane ga go na motho yo mobe yo a ka tlago pele ga gagwe.
17 Ntheetšeng gabotse,
Gomme le hlwayeng tsebe gore le kwe seo ke se bolelago.
18 Hle ntheetšeng! Ke tlišitše taba yeo e nyakago go ahlolwa ka toka,
Ge e le nna ke tseba gabotse gore ga ke na molato.
19 Ke mang yo a ka bontšhago gore ke na le molato?
Ge nka homola gona ke tla hwa!
20 Go na le dilo tše pedi feela tšeo ke di kgopelago go wena hle Modimo wa ka,
Ke moka ge o mphile tšona nka se sa ikuta pele ga gago.
21 O se sa ntlaiša hle,
Le gona o se sa tšwela pele o ntšhoša.
22 Mpitše gomme nna ke tla go araba,
Goba e re nna ke bolele pele, gomme wena o nkarabe.
23 Kgane ke dirile melato efe le dibe dife?
Mpotše phošo ya ka le sebe sa ka.
24 Go reng o se sa nyaka go mpona,
Gomme o ntšea bjalo ka lenaba la gago?
25 Ke no ba letlakajana feela leo le tšewago ke phefo,
Ke no ba lehlakanyana.
Go reng o ntšhoša e bile o nkitimiša?
26 Ka gobane o tšwela pele o ngwala dilo tše bohloko tšeo o ntatofatšago ka tšona,
E bile o dira gore ke patele dibe tšeo ke di dirilego ke sa le moswa.
27 O tsentše le maoto a ka ka setokising,*
Le gona o dula o ntebeletše go bona moo ke yago gona,
O šala morago mehlala ya ka ka moka.
28 Motho o bola bjalo ka selo seo se senyegilego,
Le bjalo ka seaparo seo se jewago ke diboko.