Jeremia
11 Jehofa o ile a botša Jeremia a re: 2 “Anke batho ka moka ba kwe mantšu a kgwerano ye!
“O a botše batho ba Juda le ba Jerusalema, 3 o re go bona: ‘Jehofa Modimo wa Isiraele o re: “Motho yo a sa theetšego mantšu a kgwerano ye a rogakwe, 4 e lego mantšu ao ke a boditšego borakgolokhukhu ba lena letšatšing leo ke ba ntšhitšego nageng ya Egepeta, ke ba ntšhitšego mollong woo o tukago kudu.* Ke ile ka re: ‘Ekwang lentšu la ka gomme le dire dilo ka moka tšeo ke le laelago tšona, le tla ba batho ba ka gomme nna ka ba Modimo wa lena, 5 e le gore ke phethe keno yeo ke e enetšego borakgolokhukhu ba lena, ya gore ke tla ba nea naga yeo e elago maswi le todi ya dinose. Kgwerano yeo e sa le bjalo le lehono le.’”’”
Ke moka nna ka araba ka re: “Amene, Jehofa.”
6 Jehofa a re go nna: “Bolela mantšu a ka moka metseng ya Juda le diterateng tša Jerusalema, o re: ‘Ekwang mantšu a kgwerano ye gomme le a phethe. 7 Ka gobane ke ile ka kgalema borakgolokhukhu ba lena ke tiišitše ka ganong letšatšing leo ke ba ntšhitšego nageng ya Egepeta go ba go fihla letšatšing le, ke ba kgala gantšhintšhi, ke re: “Ekwang lentšu la ka.” 8 Eupša ga se ba ka ba theetša goba ba hlwaya tsebe, go e na le moo, ka moka ga bona ba ile ba thatafiša dihlogo gomme ba latela dipelo tša bona tše mpe. Ka gona ke ile ka dira gore mantšu ka moka a kgwerano ye a ba diragalele, ka gobane ga se ba kwa seo ke ba laetšego sona.’”
9 Ke moka Jehofa a re go nna: “Batho ba Juda le ba Jerusalema ba logile maanomabe. 10 Ba boetše melatong yeo e dirilwego ke borakgolokhukhu ba bona ba kgale bao ba gannego go kwa mantšu a ka. Le bona ba latetše medimo e mengwe gomme ba e hlankela. Baisiraele le Bajuda ga se ba botegela kgwerano yeo ke e dirilego le borakgolokhukhu ba bona. 11 Ka gona Jehofa o re: ‘Bjale ke ba tlišetša masetlapelo ao ba ka se kgonego go a phologa. Ge ba nkgopela thušo, nka se ba theetše. 12 Ke moka batho ba metseng ya Juda le badudi ba Jerusalema ba tla ya go medimo yeo ba e direlago dihlabelo gomme ba kgopela thušo, eupša medimo yeo e ka se ba phološe le gatee nakong ya ge ba tla be ba wetšwe ke masetlapelo. 13 Wena Juda, medimo ya gago e lekana le metse ya gago ka bontšhi. O agile dialetare, gomme go tšona o direla Baali dihlabelo, e lego modimo yo a hlabišago dihlong. Dialetare tšeo ke tše dintšhi kudu moo e lego gore di lekana le diterata tša Jerusalema.’
14 “Ge e le wena o se ke wa rapelela batho ba, o se ke wa ba llela goba wa ba rapelela, ka gobane nka se ba theetše ge ba mpitša nakong ya ge ba wetšwe ke masetlapelo.
15 Ke ka baka la’ng batho ba ka bao ke ba ratago ba sa dutše ba le ka ntlong ya ka,
Mola ba bantšhi ba bona ba loga maanomabe?
Na ka dihlabelo tša diphoofolo ba tla dira gore masetlapelo a se ke a go wela?
Ge masetlapelo ao a go wela, na o tla thaba nakong yeo?
16 Jehofa o kile a go bitša mohlare wa mohlware o motala,
O mobotse le wo o nago le dienywa tše dibotse.
Eupša go bile le modumo o mogolo, gomme a go tšhuma ka mollo,
Ke moka ba roba makala a wona.
17 “Jehofa wa madira, yena yo a go bjetšego, o boletše gore o tla welwa ke masetlapelo ka baka la dilo tše mpe tšeo di dirilwego ke setšhaba sa Isiraele le batho ba Juda, bao ba nkgopišitšego ka go direla Baali dihlabelo.”
18 Wena Jehofa o ntsebišitše seo se bego se direga,
Ka nako yeo, o dirile gore ke bone seo batho ba bego ba se dira.
19 Nna ke be ke swana le kwana e boleta yeo e yago go hlabja.
Eupša ke be ke sa tsebe gore ba be ba ntogela maanomabe, ba re:
“A re senyeng mohlare wo le dienywa tša wona,
A re mmolayeng,
E le gore leina la gagwe le se sa gopolwa.”
20 Eupša Jehofa wa madira o ahlola ka toka,
O hlahloba pelo le dilo tšeo motho a di naganago ka garegare.*
Anke ke bone ge o ntefeletša go bona,
Ka gobane ke go neile molato wa ka.
21 Ka gona, Jehofa o bolela mabapi le batho ba Anathothe bao ba nyakago go go bolaya, o re: “O se ke wa porofeta ka leina la Jehofa, go sego bjalo re tla go bolaya ka diatla tše tša rena.” 22 Bjale Jehofa wa madira o re: “Bonang, ke tlo ba otla. Masogana a tla bolawa ka sabola, gomme barwa le barwedi ba bona ba hwa ka baka la tlala. 23 Go ka se be le o tee yo a šalago mo go bona, ka gobane ke tla tlišetša batho ba Anathothe masetlapelo ngwageng wa ge ke ba sekiša.”