Jeremia

38 Bjale Shefatia morwa wa Matane le Gedalia morwa wa Pashuri le Jukale morwa wa Shelemia le Pashuri morwa wa Malakia, ba kwa molaetša wa Jeremia wo a bego a o botša batho ka moka, a re: 2 “Jehofa o re: ‘Motho yo a tlago go šala motseng wo o tla bolawa ka sabola, tlala le bolwetši. Eupša yo a tlago go ineela go Bakaladea o tla tšwela pele a phela e bile o tla šireletša bophelo bja gagwe.’ 3 Jehofa o re: ‘Ruri motse wo o tla neelwa go mašole a kgoši ya Babilona, gomme yona e tla o thopa.’”

4 Dintona tša re go Kgoši Tsedekia: “Hle anke monna yo a bolawe, ka gobane mašole ao a šetšego mo motseng le batho ka moka o ba fetša matla ka go ba botša mantšu a. E bile monna yo ga a nyake gore batho ba ba be le khutšo, eupša o nyaka gore ba welwe ke masetlapelo.” 5 Kgoši Tsedekia a di araba a re: “Mo direng ka mokgwa wo le nyakago, ka gobane ga go na selo seo nka se dirago go le thibela.”

6 Ke moka, dintona tšeo tša lahlela Jeremia ka petseng* ya Malakia morwa wa kgoši, yeo e bego e le Lapeng la Motho wa go Leta. Tša theošetša Jeremia fase ka dithapo. Eupša ka petseng yeo go be go se na meetse, e be e fo ba leraga feela, gomme Jeremia a thoma go sobelela lerageng leo.

7 Ebede-meleke wa Moethopia, yoo e bego e le mohlanka wa ka mošate, o ile a kwa gore dintona di lahletše Jeremia ka petseng. Bjale kgoši yona e be e dutše Keiting ya Benjamini. 8 Ke moka Ebede-meleke a ya ntlong ya kgoši a bolela le yona, a re: 9 “Kgoši mong wa ka, ruri selo seo banna ba ba se dirilego moporofeta Jeremia se sehlogo. Ba mo lahletše ka petseng gomme o tla hwela moo ka baka la tlala, ka gobane ga go sa na borotho bjo bo šetšego mo motseng.”

10 Ke moka kgoši ya laela Ebede-meleke wa Moethopia ya re: “Tšea banna ba 30 mo o sepele le bona, gomme le ntšhe moporofeta Jeremia ka moo petseng pele a ehwa.” 11 Ka gona Ebede-meleke a tšea banna bao, gomme a sepela le bona a ya ntlong ya kgoši lefelong la ka tlase ga moo go bolokelwago dilo tše bohlokwa, gomme ba tšea mašela a maratha le ao a senyegilego lefelong leo, ba a theošetša tlase ka dithapo go Jeremia ka moo petseng. 12 Ke moka Ebede-meleke wa Moethopia a re go Jeremia: “Hle bea mašela ao ka mahwafeng a gago, e le gore dithapo tšeo o tlago go itatetša ka tšona di se ke tša go gobatša.” Ke moka Jeremia a dira bjalo, 13 gomme ba mo goga ka dithapo tšeo ba mo ntšha ka moo petseng. Jeremia yena o ile a dula Lapeng la Motho wa go Leta.

14 Kgoši Tsedekia a roma batho gore ba yo bitša moporofeta Jeremia gore a tle go yena mojakong wa boraro woo o lego ntlong ya Jehofa. Ke moka kgoši ya re go Jeremia: “Go na le selo seo ke nyakago go go botšiša sona, gomme o se ke wa nkutela selo.” 15 Ke moka Jeremia a re go Tsedekia: “Ge nka go botša, o tlo mpolaya. Le gona le ge nka go eletša, o ka se ntheetše.” 16 Bjale Kgoši Tsedekia a enela Jeremia ka sephiring a re: “Ke ikana ka Jehofa yo a phelago, yo a re filego bophelo gore nka se go bolaye, e bile nka se go neele go banna ba bao ba nyakago go go bolaya.”

17 Ke moka Jeremia a re go Tsedekia: “Jehofa Modimo wa madira, yena Modimo wa Isiraele, o re: ‘Ge o ka ineela go dintona tša kgoši ya Babilona, gona o tla šireletša bophelo bja gago, e bile motse wo o ka se fišwe ka mollo, gomme wena le lapa la gago le tla phologa. 18 Eupša ge e ba o ka se ineele go dintona tša kgoši ya Babilona, gona motse wo o tla neelwa go Bakaladea, gomme ba o fiša ka mollo, e bile wena o ka se tšwe diatleng tša bona.’”

Ba dirile gore o tanywe ka lerageng, gomme o palelwe le ke go šikinyega. E bile ga se gwa ba le motho yo a go thušago.

Gona bjale ba go lahlile.’

23 Le gona, basadi ba gago ka moka le barwa ba gago ba tla tlišwa go Bakaladea, gomme wena o ka se ba phonyokge. Eupša kgoši ya Babilona e tla go swara, e bile motse wo o tla fišwa ka baka la gago.

24 Ke moka Tsedekia a re go Jeremia: “O se ke wa botša motho dilo tše, e le gore o se ke wa hwa. 25 E bile ge dintona di ka kwa gore ke boletše le wena, gomme tša tla go wena tša re: ‘Hle, re botše seo o se boditšego kgoši. O se ke wa re utela selo, gomme wena re ka se go bolaye. Kgoši e rileng go wena?’ 26 Wena o di arabe o re: ‘Ke be ke ile go kgopela kgoši gore e se ke ya mpušetša ntlong ya Jehonathane gore ke yo hwela moo.’”

27 Ge nako e dutše e eya, dintona ka moka di ile tša ya go Jeremia gomme tša mmotšiša dipotšišo. Yena o ile a di botša dilo ka moka tšeo kgoši e bego e mo laetše gore a di bolele. Ka gona di ile tša tlogela go mmotšiša ka gobane go be go se na motho yo a kwelego seo Jeremia le kgoši ba se boletšego. 28 Jeremia o ile a tšwela pele a dula Lapeng la Motho wa go Leta, go fihlela letšatšing leo Jerusalema e thopilwego ka lona. O be a sa le moo le ge Jerusalema e be e thopša.