Jesaya
29 “Go madimabe Ariele, wena Ariele motse woo Dafida a bego a hlomile ditente go wona!
Tšwelang pele le dira menyanya ya lena ya ngwaga le ngwaga.
Tšwelang pele le dira seo ngwaga o mongwe le o mongwe.
2 Eupša ke tla dira gore Ariele e welwe ke mathata,
Batho ba moo ba tla nyama ba ba ba lla,
Gomme yona e tla swana le aletare ya Modimo go nna.
3 Ke tla hloma ditente mahlakoreng a gago ka moka wena Ariele gore ke lwe le wena,
Ke tla aga legora go go dikologa,
Gomme ke tla go thibela ka aga maboto go go dikologa.
4 O tla kokobetšwa wa lahlelwa fase,
Gomme wa bolela o le moo,
E bile seo o se bolelago se tla felela leroleng.
Lentšu la gago le tla tšwa fase,
Go swana le la motho yo a lekago go boledišana le bahu,
Gomme mantšu a gago a tla sebaseba a etšwa leroleng.
5 Manaba a gago a tla swana le lerole,
Gomme batho ba bantšhi bao ba go gatelelago ba tla swana le mooko wo o tšewago ke moya.
Le gona seo se tlo direga kapelapela, ka ponyo ya leihlo.
6 Jehofa wa madira o tla le phološa
A diriša legadima, tšhišinyego ya lefase, modumo o mogolo,
Phefo e kgolo, ledimo le kgabo ya mollo o tšhumago.”
7 Ke moka mašaba a ditšhaba ka moka tšeo di lwago le motse wa Ariele,
E lego batho ka moka bao ba lwago le yena,
Le maboto a wona ao a o dikaneditšego,
Le batho ka moka bao ba o tlišetšago masetlapelo,
Ba tla ba bjalo ka toro, yona pono ya bošego.
8 Go tla swana le ge motho yo a swerwego ke tlala a lora a eja,
Eupša a tsoga a sa swerwe ke tlala,
Le gona go tla swana le ge motho yo a nyorilwego a lora a enwa,
Eupša a tsoga a lapile e bile a nyorilwe.
Se se tla diragalela mašaba a ditšhaba
Ka moka tšeo di lwago le Thaba ya Tsione.
9 Gakanegang gomme le tlabege.
Iphoufatšeng gore le se ke la bona.
Ba tagilwe, eupša ga ba tagwa ke beine.
Ba a thekesela, eupša ga ba thekesedišwe ke bjala.
10 Jehofa o dirile gore le robale boroko bjo bogolo.
O tswaletše mahlo a lena, e lego lena baporofeta,
Gomme o khurumeditše dihlogo tša lena, e lego lena batho bao ba bonago dipono.
11 Mo go lena pono e nngwe le e nngwe e swana le mantšu a puku yeo e tswaletšwego. Ge ba e nea motho yo a kgonago go bala ba re go yena: “Hle anke o balele puku ye godimo,” yena o tla re: “Ga ke kgone go e bala, ka gobane e tswaletšwe.” 12 Ke moka ba tla tšea puku yeo ba e nea motho yo mongwe yo a sa kgonego go bala ba re go yena: “Hle anke o bale puku ye,” yena o tla re: “Ga ke tsebe go bala le gatee.”
13 Jehofa o re: “Batho ba ba re ba a nthapela
Le gona ba ntheta ka melomo feela,
Eupša dipelo tša bona di kgole kudu le nna,
Gomme ba ntlhompha ka baka la melao yeo ba e rutilwego ke batho.
14 Ka gona ke tla boeletša ka dira dilo tše di makatšago ka batho ba,
Ke tla dira dilo tše di makatšago ka go latelana,
Gomme bohlale bja batho ba bona bao ba hlalefilego bo tla fela,
Gomme temogo ya batho ba bona ba bohlale e tla utega.”
15 Go madimabe bao ba dirago sohle seo ba se kgonago gore ba utele Jehofa dilo tšeo ba nyakago go di dira.
Ba dira mediro ya bona ka leswiswing,
Ke moka ba re: “Ke mang yo a re bonago?
Ke mang yo a tsebago seo re se dirago?”
16 Ruri le kgopamiša dilo!
Na motho yo a bopago ka letsopa a ka swantšhwa le letsopa?
Na selo seo se dirilwego se ka bolela ka yo a se dirilego sa re:
“Ga se a ntira”?
Na selo seo se hlamilwego se ka bolela ka yo a se hlamilego sa re:
“Ga a tsebe selo?”
17 Go šetše nako e nyenyane feela gore Libanoni e fetošwe serapa sa dienywa,
Gomme serapa seo se tla swana le sethokgwa.
18 Letšatšing leo bao ba sa kgonego go kwa, ba tla kwa mantšu a puku ye,
Gomme batho bao ba foufetšego ba tla bona le ge ba le ka gare ga leswiswi le lesoleso.
19 Batho ba boleta ba tla thaba kudu ka baka la Jehofa,
Gomme badiidi ba tla thaba ka baka la Modimo yo Mokgethwa wa Isiraele.
20 Ka gobane yo a gatelelago ba bangwe a ka se sa ba gona,
Gomme yo a ikgantšhago o tla fedišwa,
Le gona batho ka moka bao ba dulago ba ikemišeditše go dira dilo tše mpe ba tla fedišwa,
21 Bao ba bolelago maaka ba dira gore ba bangwe ba bonwe molato,
Le bao ba beago molaba gore o tanye motho yo a ikemelelago kgorong ya motse,
Gotee le bao ba dirišago ditatofatšo tša maaka gore ba se ke ba ahlola moloki ka toka.
22 Ka gona se ke seo Jehofa yo a lokolotšego Aborahama a se botšago ditlogolwana tša Jakobo, o re:
“Jakobo a ka se sa hlabja ke dihlong,
Le gona sefahlego sa gagwe se ka se sa sehlefala.
23 Ge a bona bana ba gagwe,
Bao e lego modiro wa diatla tša ka, ba na le yena,
Ba tla kgethagatša leina la ka.
Ba tla kgethagatša nna Modimo yo Mokgethwa wa Jakobo,
Gomme nna Modimo wa Isiraele ba tla ntlhompha kudu.
24 Bao ba timetšego ba tla hwetša kwešišo,
Gomme bao ba ngongoregago ba tla dumela go rutwa.”