Doiteronomio

23 “Phuthegong ya Jehofa go se ke gwa tla monna yo dithaka tša peu ya gagwe ya bonna di gobetšego, goba yo a kgaotšwego setho sa gagwe sa botona.

2 “Go se be le ngwana yo batswadi ba gagwe ba sego ba nyalana yo a tlago phuthegong ya Jehofa. E bile go se be le ditlogolwana tša gagwe tšeo di tlago go tla phuthegong ya Jehofa.

3 “Go se be le Moamoni goba Momoaba yo a tlago phuthegong ya Jehofa. E bile le mo go ditlogolwana tša bona le go fihla molokong wa lesome, go se be le yo a tlago phuthegong ya Jehofa, 4 ka gobane ga se ba ka ba le thuša ka go le nea dijo le meetse ge le be le le tseleng le etšwa Egepeta, le ka gobane ba ile ba hira Bileama morwa wa Beoro yo a tšwago Phethore ya Mesopotamia e le gore a tle a le roge gore le welwe ke dilo tše mpe. 5 Eupša Jehofa Modimo wa lena o ile a gana go theetša Bileama, go e na le moo Jehofa Modimo wa lena o ile a fetoša thogako gore e be tšhegofatšo, ka ge Jehofa Modimo wa lena a be a le rata. 6 Le se ke la ba thuša gore ba be le khutšo, goba gore dilo di ba sepelele gabotse bophelo ka moka.

7 “O se ke wa hloya Moedomo ka gobane ke ngwaneno.

“O se ke wa hloya Moegepeta ka gobane o kile wa dula nageng ya gabo. 8 Bana ba bona ba molokong wa boraro, e lego ditlogolokhukhu tša bona, ke bona ba ka tlago phuthegong ya Jehofa.

9 “Ge le ka yo hloma ditente gore le lwe le manaba a lena, le itlhokomele gore le se ke la dira selo le ge le sefe se sebe. 10 Ge monna a ka šilafala ka baka la go ediša bošego, a tšwele ka ntle ga ditente, gomme a se ke a boela ditenteng. 11 Ge e eba mantšiboa a hlape, ke moka e be gona a boelago ditenteng ge letšatši le sobetše. 12 Le be le lefelo la boithomelo ka ntle ga ditente mo le tlago go ya gona. 13 O be le selo sa go epa gomme o se sware ge o eya go ithoma ka ntle ga ditente, o epe molete ka sona ka morago o khupetše mantle a gago. 14 Ka gobane Jehofa Modimo wa lena o mo ditenteng tša lena e le gore a le phološe le go dira gore le fenye manaba a lena. Ditente tša lena e be tše kgethwa e le gore a se ke a bona selo se se šišimišago mo go lena gomme a se sa sepela le lena.

15 “O se ke wa bušetša lekgoba go mong wa lona ge le tšhabile go mong wa lona la tla go wena. 16 Lekgoba leo le ka dula lefelong le ge e le lefe leo le ratago go dula go lona go o mongwe wa metse ya lena. O se ke wa le swara gampe.

17 “Go se be le mosadi le ge e le ofe wa Baisiraele yo a gwebago ka mmele tempeleng. Le gona go se be le monna le ge e le ofe wa Moisiraele yo a gwebago ka mmele tempeleng. 18 Ge e ba o phetha keno, o se ke wa tliša tšhelete yeo mogweba-ka-mmele wa mosadi goba wa monna a patetšwego ka yona ntlong ya Jehofa Modimo wa gago e le moneelo, ka gobane tšhelete yeo ya bona ka moka e šišimiša Jehofa Modimo wa gago.

19 “O se ke wa re ge o adimile ngwaneno selo wa nyaka gore a se buše se oketšegile, e ka ba e le tšhelete, dijo, goba selo le ge e le sefe. 20 Ge o adimile motho yo e sego Moisiraele selo, o ka nyaka gore a se buše se oketšegile, eupša go ngwaneno o se ke wa dira bjalo, e le gore Jehofa Modimo wa gago a šegofatše dilo ka moka tšeo o tlago go di dira nageng yeo o yago go e tšea gore e be ya gago.

21 “Ge o ka direla Jehofa Modimo wa gago keno, o se ke wa diega go e phetha ka gobane Jehofa Modimo wa gago o nyaka gore o e phethe. Ge o ka se dire bjalo, o tla ba o dirile sebe. 22 Eupša ge o ka se dire keno, o tla be o se wa dira sebe. 23 O dire seo o boletšego gore o tla se dira. Keno ya gago e swana le sebego sa go ithaopa, o swanetše go dira seo o se enetšego Jehofa Modimo wa gago.

24 “Ge o ka tsena ka serapeng sa meterebe sa motho yo mongwe, o ka ja diterebe wa ba wa khora, eupša go se ke gwa ba le tšeo o di tsenyago ka gare ga manki.

25 “Ge o ka ya tšhemong ya mabele ya motho yo mongwe, o kge feela mabele ao a budulego ka seatla sa gago, eupša o se ke wa a sega ka sekela.