Hesekiele

7 Jehofa a bolela le nna gape a re: 2 “Wena morwa wa motho, Mmuši Morena Jehofa o botša naga ya Isiraele o re: ‘Bofelo bo fihlile, bo fihlile dikhoneng tše nne tša naga. 3 Bjale bofelo bo go fihletše gomme ke tla ntšhetša bogale bja ka go wena, ka go ahlola go ya ka tsela yeo o itshwerego ka yona, ka ba ka go ahlola go ya ka dilo ka moka tše di šišimišago tšeo o di dirilego. 4 Nka se go kwele bohloko,* ebile nka se go šokele, ka gobane ke tla go lefetša go ya ka tsela yeo o itshwerego ka yona, le gona ke tla go otla ka baka la dilo tše di šišimišago tšeo o di dirilego. Ke moo o tlago go tseba gore ke nna Jehofa.’

5 “Mmuši Morena Jehofa o re: ‘Masetlapelo ao go se nago ao a swanago le ona a etla. 6 Bofelo bo etla. Bofelo bo tla tla. Bo tla go tlela. Tseba gore bo etla. 7 Wena modudi wa naga ye, nako ya gore o fedišwe e fihlile. Nako yeo e a tla, le letšatši leo le kgauswi. Dithabeng go kwagala modumo wa tlhakatlhakano, e sego wa lethabo.

8 “‘Kgauswinyane ke tla tšhollela kgalefo ya ka go wena, gomme ke tla ntšhetša bogale bja ka ka moka go wena, ka go ahlola go ya ka tsela yeo o itshwerego ka yona, ka ba ka go ahlola go ya ka dilo ka moka tše di šišimišago tšeo o di dirilego. 9 Nka se be le kwelobohloko, ebile nka se be le lešoko. Ke tla go lefetša go ya ka tsela yeo o itshwerego ka yona, ka ba ka go otla ka baka la dilo tše di šišimišago tšeo o di dirilego. O tla tseba gore ke nna Jehofa yo a go otlago.

10 “‘Letšatši le tlile! Le kgauswi. Nako ya gore o fedišwe e fihlile. Kgati yeo ke tlago go e diriša go go otla e šetše e le gona, ebile boikgantšho bja lenaba bo iphile matla. 11 Bošoro bo fetogile kgati ya go otla dilo tše mpe. Batho ba ka se phologe le gatee, le mahumo a bona goba maemo a bona a godimo a ka se kgone go ba phološa. 12 Nako e tla tla, le letšatši le tla fihla. Anke motho yo a rekago a se ke a thaba, gomme yo a rekišago a se ke a lla, ka gobane ke ba galefetše ka moka. 13 Motho yo a rekišago le ge a ka phologa a ka se boele lefelong leo a le rekišitšego, ka gobane dilo tšeo di utolotšwego ponong di tla diragalela batho ka moka. Ga go na yo a tlago go boela morago, ebile ga go na yo a tlago go phološa bophelo bja gagwe ka baka la molato wa gagwe.

14 “‘Ba leditše phalafala gomme motho yo mongwe le yo mongwe o itokišitše, eupša ga go na yo a yago ntweng, ka gobane bogale bja ka bo ba tukela ka moka. 15 Batho bao ba lego ka ntle ga motse ba tla bolawa ka sabola, gomme bao ba lego ka gare ga motse ba tla hwa ka baka la tlala le leuba la bolwetši. Motho yo mongwe le yo mongwe yo a lego nageng o tla bolawa ka sabola, gomme bao ba lego motseng ba tla hwa ka baka la tlala le leuba la bolwetši. 16 Bao ba phologilego gare ga bona ba tla tšhabela dithabeng, gomme yo mongwe le yo mongwe o tla llišwa ke molato wa gagwe go swana le maeba a meeding. 17 Diatla tša bona ka moka di tla lekelela, gomme matolo a bona ka moka a rotha meetse.* 18 Ba tla be ba apere diaparo tšeo di dirilwego ka masaka gomme ba tšhogile. Ka moka ga bona ba tla lewa ke dihlong gomme dihlogo tša bona tša kotwa gore e be matwadi.

19 “‘Ba tla lahlela silifera ya bona diterateng, gomme gauta ya bona e tla thoma go ba šišimiša. Silifera ya bona goba gauta ya bona e ka se kgone go ba phološa letšatšing la ge Jehofa a tla be a galefile. Ba ka se kgotsofale ebile ba ka se khore, ka gobane mahumo a bona a fetogile tšhitišo yeo e ba dirišago molato. 20 Ba ikgantšha ka dilo tša bona tše botse tšeo ba ikgabišago ka tšona, gomme ba dirišitše gauta le silifera go dira diswantšho tšeo di šišimišago, e lego medingwana ya bona yeo e šišimišago. Ka baka leo ke tla dira gore ba bone gauta le silifera ya bona e le dilo tšeo di šišimišago. 21 Ke tla dira gore batho ba ditšhaba tše dingwe ba ba tšeele gauta le silifera yeo, ebile batho ba babe ba ba tšeele tšona gomme ba di šilafatše.

22 “‘Ke tla ba furalela. Ba tla šilafatša lefelo la ka leo le utegilego, ke moka ditsotsi di tla tsena go lona tša le šilafatša.

23 “‘Dira ketane, ka gobane madi a bao ba sego ba ahlolwa ka toka a tšhollwa nageng ka moka, gomme motseng go tletše bošoro. 24 Ke tla tliša batho ba ba šoro kudu ba ditšhaba tše dingwe, gomme ba tla tšea dintlo tša bona. Ke tla dira gore batho ba matla bao ba ikgantšhago ba se sa ikgantšha, gomme mafelo a bona a makgethwa a tla šilafatšwa. 25 Ge ba le tlalelong, ba tla nyaka khutšo eupša e ka se be gona. 26 Masetlapelo a tla tla ka go latelana, dipego tša tla di latelana, gomme batho ba tla botšiša moporofeta ge e ba a bone pono, eupša molao wo o tšwago go moperisita le keletšo yeo e tšwago go bagolo di ka se ba hole ka selo. 27 Kgoši e tla lla, ntona yona ya nyama, gomme diatla tša batho ba mo nageng di tla thothomela ka baka la ge ba tšhogile. Ke tla dirišana le bona go ya le ka dilo tšeo ba di dirilego, gomme ka ba ahlola go ya le kamoo ba ahlotšego ka gona. Ke moo ba tlago go tseba gore ke nna Jehofa.’”