Hesekiele

8 Ka letšatši la bohlano la kgwedi ya botshelela ka ngwaga wa botshelela, ge ke be ke dutše ka ntlong ya ka gomme banna ba bagolo ba Juda ba dutše ka pele ga ka, Mmuši Morena Jehofa o ile a ntshwara ka seatla sa gagwe. 2 Ya re ge ke lebelela ka bona selo seo se swanago le motho yo a bonagalago eka ke mollo, ponagalo ya matheka a gagwe go ya tlase e be e le mollo, gomme go ya godimo o be a phadima go swana le silifera yeo e tswakilwego le gauta. 3 O ile a ntšha selo seo se bonagalago eka ke seatla a ntshwara ka moriri. Ke moka moya o ile wa nkiša magareng ga lefase le magodimo gomme wa ntliša Jerusalema ka dipono tša Modimo. O ile wa nkiša keiting ya ka gare yeo e lebeletšego leboa, moo go bego go na le seswantšho seo batho ba se rapelago seo se galefišago Modimo. 4 Ka bona letago la Modimo wa Isiraele le le moo, le be le le bjalo ka selo seo se swanago le motho seo ke ilego ka se bona kua molaleng.

5 A re go nna: “Morwa wa motho, hle lebelela ka thoko ya leboa.” Ke moka ka lebelela ka leboa, gona moo ka leboa la keiti ya aletare go be go na le seswantšho seo batho ba se rapelago seo se galefišago Modimo. 6 Ke moka a re go nna: “Morwa wa motho, na o bona dilo tše di šiišago le tše di šišimišago tšeo Baisiraele ba di dirago mo, e lego tšeo di dirago gore ke be kgole le sekgethwa sa ka? O sa tlo bona dilo tše di šiišago le tše di šišimišago kudu go feta tše.”

7 Ke moka a ntliša mojakong wa lapa, ge ke lebelela ka bona lešoba lebotong. 8 Bjale a re go nna: “Morwa wa motho, hle oketša lešoba lebotong leo.” Ka oketša lešoba leo le lego lebotong leo gomme ka bona mojako o mongwe. 9 A re go nna: “Tsena o bone dilo tše mpe tše di šišimišago tšeo ba di dirago ka mo.” 10 Ke moka ka tsena, ka bona gohle moo lebotong go terowilwe mehuta ka moka ya digagabi, dibata tše di šišimišago le medingwana ka moka e šišimišago ya Baisiraele. 11 Bagolo ba 70 ba Baisiraele ba be ba eme pele ga dilo tšeo ba na le Jaasania morwa wa Shafane, yo mongwe le yo mongwe wa bona a swere sebjana ka seatla, gomme muši wa diorelo tšeo di nkgago bose o be o hlatlogela godimo. 12 A re go nna: “Morwa wa motho, na o bone tšeo bagolo ba Isiraele ba di dirago leswiswing, tšeo yo mongwe le yo mongwe wa bona a di dirago diphapošing tša ka gare moo medingwana ya gago yeo e betlilwego e lego gona? Ka gobane ba re: ‘Jehofa ga a re bone. Jehofa o tlogetše naga ye.’”

13 A tšwela pele a re go nna: “O sa tlo bona dilo tše di šiišago le tšeo di šišimišago kudu tšeo ba di dirago.” 14 Ke moka a ntliša keiting ya ka leboa ya ntlo ya Jehofa gomme gona moo ka bona basadi ba dutše fase ba llela modingwana wa bona Thamutsi.

15 A tšwela pele a re go nna: “Morwa wa motho, na o bona dilo tše? O sa tlo bona dilo tše di šiišago le tšeo di šišimišago kudu go feta tše.” 16 Ka gona a ntliša ka lapeng la ka gare la ntlo ya Jehofa. Moo mojakong wa tempele ya Jehofa magareng ga aletare le phapoši yeo go tsenwago ka yona ka tempeleng, go be go na le banna ba e ka bago ba 25 ba furaletše tempele ya Jehofa. Difahlego tša bona di be di lebeletše bohlabela, ebile ba be ba khunamela letšatši ba lebeletše ka bohlabela.

17 A re go nna: “Morwa wa motho, na o bona dilo tše? Na ga se selo sa go tshwenya ge Bajuda ba dira dilo tše di šišimišago, ba tlatša naga ye ka bošoro ebile ba dula ba nkgopiša? Gona bjale ba nkgotla ka lekala la mohlare ka nkong. 18 Ke tla ba galefela kudu. Nka se ba kwele bohloko ebile nka se ba šokele. Le ge ba ka goeletša ba hlabile lešata ka ditsebeng tša ka, nka se ba kwe.”