Jeremia

19 Jehofa o itše: “Sepela o ye go motho yo a bopago ka letsopa gomme o reke lepotlelo leo le dirilwego ka letsopa. Ke moka o bitše ba bangwe ba banna ba bagolo ba setšhaba gotee le ba bangwe ba banna ba bagolo ba baperisita, 2 gomme le ye moeding wa morwa wa Hinomo, woo o lego mojakong wa Keiti ya Motho yo a Bopago ka Letsopa. Ge o le moo o goeletše mantšu ao ke tlago go go botšago ona. 3 O re: ‘Ekwang seo Jehofa a se bolelago, lena dikgoši tša Juda le lena badudi ba Jerusalema. Jehofa wa madira, yena Modimo wa Isiraele, o re:

“‘“Ke kgauswi le go tliša masetlapelo lefelong le gomme motho yo mongwe le yo mongwe yo a kwago ka taba yeo, ditsebe tša gagwe di tla hlohlona. 4 Ka gobane ba ntlogetše e bile ba sentše lefelo le ba dira gore ke se sa le tseba. Lefelong leo ba direla medimo e mengwe dihlabelo, e lego medimo yeo bona le borakgolokhukhu ba bona le dikgoši tša Juda ba bego ba sa e tsebe, le gona ba tladitše lefelo le ka madi a batho bao ba se nago molato. 5 Ba agile mafelo a phagamego ao ba rapelago Baali go ona, e le gore ba fiše bana ba bona e le dibego tšeo di feletšego tša go fišetšwa Baali, e lego selo seo ke sa kago ka ba botša gore ba se dire goba ka bolela ka sona e bile ga se ka ka ka nagana ka sona.”’

6 Jehofa o re: “‘“Tsebang gore go tla matšatši ao ka ona, lefelo le le ka se hlwego le sa bitšwa Thofethe, goba Moedi wa Morwa wa Hinomo, eupša le tla bitšwa Moedi wa Polao.” 7 Ke tla šitiša dilo tšeo batho ba Juda le ba Jerusalema ba nyakago go di dira lefelong le, gomme ke tla dira gore ba bolawe ka sabola pele ga manaba a bona ao a nyakago go ba bolaya. Ke tla tšea ditopo tša bona ka di nea dinonyana tša magodimong le diphoofolo tša nageng gore di di je. 8 Ke tla dira gore motse wo o tlabe batho, e bile bao ba o bonago ba tla o leletša molodi ba kgotsa. Yo mongwe le yo mongwe yoo a fetago go wona o tla o lebelela a tlabegile a ba a letša molodi e le ge a kgotsa dikotlo ka moka tšeo di o wetšego. 9 Ke tla dira gore ba je barwa ba bona le barwedi ba bona. E bile yo mongwe le yo mongwe wa bona o tla ja motho yo mongwe, ka gobane ba tla be ba tshwenyegile e bile ba gateletšwe ke manaba a bona le bao ba nyakago go ba bolaya.’”

10 “Ke moka, o pšhatle lepotlelo leo le dirilwego ka letsopa pele ga banna bao o sepelago le bona, 11 gomme o re go bona: ‘Jehofa wa madira o re: “Ke tla pšhatla batho ba le motse wo, go no swana le ge motho a pšhatla sebjana seo se dirilwego ke motho yo a bopago ka letsopa e le gore se se ke sa kgona le go lokišega. Ba tla boloka bahu kua Thofethe, go ba go fihlela go se na lefelo la go bolokela.’”

12 “Jehofa o re: ‘Lefelo le ke tla le dira ka wona mokgwa woo, lona gotee le badudi ba lona, ka dira gore motse wo o swane le Thofethe. 13 Ke moka, dintlo tša Jerusalema le dintlo tša dikgoši tša Juda di tla swana le lefelo la Thofethe ya ba tšeo di sa hlwekago, ka gobane ba ile ba direla dilo ka moka* tša legodimong dihlabelo ditlhakeng tša dintlo tša bona e bile ba tšhelela medimo e mengwe dibego tša dino gona moo.’”

14 Ge Jeremia a boa Thofethe moo Jehofa a bego a mo romile gona gore a yo porofeta, o ile a ema lapeng la ntlo ya Jehofa gomme a re go batho ka moka: 15 “Jehofa wa madira, yena Modimo wa Isiraele o re: ‘Bonang! Ke tlišetša motse wo le metsana ya wona ka moka masetlapelo ao ke boletšego ka ona, ka gobane batho ba moo ba ile ba thatafiša dihlogo tša bona gomme ba se ntheetše.’”