Lefitiko

16 Jehofa o ile a bolela le Moshe ka morago ga gore barwa ba Arone ba babedi ba hwe, ka baka la go batamela pele ga Jehofa ka tsela yeo a sa e amogelego. 2 Jehofa a re go Moshe: “Botša Arone ngwaneno gore a se fo tsena nako e nngwe le e nngwe ka Sekgethwakgethweng ka morago ga gareteine, gomme a ema ka pele ga sekhurumelo sa Areka, e le gore a se ke a hwa, ka gobane ke tla iponagatša go wena moo sekhurumelong ke le lerung.

3 “Ge Arone a etla Sekgethwakgethweng, a tle le powana ya sebego sa sebe le nku e tona ya sebego sa go fišwa. 4 A apare seaparo se sekgethwa sa linene le borokgwana bja ka gare bja linene, a itleme ka lepanta la linene a be a bofe tuku ya linene hlogong. Tšeo ke diaparo tše kgethwa. O swanetše go hlapa pele a di apara.

5 “Setšhaba sa Baisiraele se mo nee diphookwana tše pedi tša sebego sa sebe le nku e tona ya sebego sa go fišwa.

6 “Arone a neele poo yeo a e tlišitšego bakeng sa dibe tša gagwe, e le gore Modimo a lebalele yena le lapa la gagwe dibe tša bona.

7 “Ke moka a tšee dipudi tšeo tše pedi a di emiše pele ga Jehofa mojakong wa taberenakele. 8 Arone a direle dipudi tšeo tše pedi matengwa.* Pudi e nngwe e be ya Jehofa, gomme e nngwe e be ya go rwala dibe tša setšhaba.* 9 Arone a neele pudi yeo e kgethilwego go ba ya Jehofa, gomme a e dire sebego sa sebe. 10 Eupša pudi yeo e kgethilwego go rwala dibe tša setšhaba, e emišwe pele ga Jehofa e phela, e le gore e rakelwe lešokeng gore Modimo a lebalele setšhaba dibe tša sona.

11 “Arone a neele poo ya sebego sa dibe tša gagwe, e le gore Modimo a lebalele yena le ba lapa la gagwe dibe tša bona. Ka morago ga moo, a hlabe poo ya sebego sa dibe tša gagwe.

12 “A tšee sebjana sa go tsenya diorelo a se tlatše ka magala ao a lego aletareng yeo e lego pele ga Jehofa. A tlatše matsogo a gagwe a mabedi ka seorelo sa go nkga bose ke moka a tliše dilo tšeo ka sekgethwakgethweng.* 13 Le gona a bee seorelo seo godimo ga magala ao a lego pele ga Jehofa, gomme muši wa sona o tla apeša sekhurumelo sa Areka e le gore a se ke a hwa.

14 “A tšee a mangwe a madi a poo a a rothetše ka monwana pele ga sekhurumelo ka thoko ya bohlabela, a be a rothetše a mangwe a madi ka monwana gašupa pele ga sekhurumelo.

15 “A hlabe pudi ya sebego bakeng sa dibe tša setšhaba, gomme a tliše madi a yona sekgethwakgethweng. A a rothetše go swana le ka mokgwa woo a rotheditšego madi ale a poo, gomme a a rothetše pele ga sekhurumelo seo.

16 “Arone a hlwekiše* sekgethwakgethwa ka baka la go se hlweke ga Baisiraele, le ka baka la dibe tša bona le melato ya bona. A hlwekiše le taberenakele yeo Modimo a e beilego gare ga Baisiraele bao ba dirago dilo tšeo di sa hlwekago.

17 “Ge Arone a tsena ka taberenakeleng go yo hlwekiša sekgethwakgethwa, le go yo neela madi a gore yena, ba lapa la gagwe gotee le setšhaba sa Baisiraele ba lebalelwe dibe tša bona, go se be le motho yo a tsenago ka moo go fihlela a etšwa.

18 “Ke moka a tšwe a tle ka aletareng yeo e lego pele ga Jehofa gomme a e hlwekiše. A tšee a mangwe a madi a poo le a mangwe a madi a pudi a a tlotše manakeng a aletare mahlakoreng a yona ka moka. 19 Le gona a rothetše a mangwe a madi godimo ga yona ka monwana gašupa, gomme a e hlwekiše a be a e dire gore e be e kgethwa ka baka la go se hlweke ga Baisiraele.

20 “Ge Arone a feditše go hlwekiša taberenakele, sekgethwakgethwa le aletare, a neele pudi e phelago pele ga Modimo. 21 Arone a bee matsogo a gagwe a mabedi godimo ga hlogo ya pudi yeo e phelago, gomme a bolele melato le dibe ka moka tša Baisiraele. Go tla ba bjalo ka ge eka o bea dibe tšeo ka moka hlogong ya pudi yeo, gomme a rome monna yo a kgethilwego gore a e rakele lešokeng. 22 Pudi yeo e rwale melato ya bona ka moka, gomme monna yoo a e rakele lešokeng.

23 “Arone a tsene ka taberenakeleng, gomme a hlobole diaparo tša gagwe tša linene tšeo a bego a di apere ge a tsena ka sekgethwakgethweng ke moka a di bee moo fase. 24 A hlape a le ka sekgethwakgethweng, gomme a apare diaparo tša gagwe tša boperisita. Ke moka a tšwe a neele sebego sa gagwe sa go fišwa le sebego sa go fišwa sa setšhaba, e le gore Modimo a mo lebalele dibe le go lebalela setšhaba dibe tša sona. 25 A beše lekhura la sebego sa sebe le thuntšhe muši aletareng.

26 “Ge e le monna yola a rakilego pudi ya go rwala dibe tša setšhaba, a hlatswe diaparo tša gagwe a be a hlape, gomme ka morago ga moo a ka tla ditenteng.

27 “Le gona dilo ka moka tšeo di šetšego go poo le pudi, tšeo di ilego tša neelwa e le dibego tša sebe, le tšeo madi a tšona a ilego a tlišwa sekgethwakgethweng go hlwekiša le gore batho ba lebalelwe dibe, di išwe ka ntle ga ditente. Ke moka matlalo a tšona, dinama tša tšona le ditšhila tša tšona tšeo di lego ka maleng, di fišwe ka mollo. 28 Motho yo a di fišitšego a hlatswe diaparo tša gagwe a be a hlape, gomme ka morago ga moo a ka tla ditenteng.

29 “Wo e be molao wa lena wa go ya go ile: Ka kgwedi ya bošupa letšatšing la lesome la kgwedi, le bontšhe gore le nyamile ka baka la dibe tša lena, gomme le se ke la dira mošomo le ge e le ofe. E ka ba lena goba batho bao e sego Baisiraele bao ba dulago mo nageng ya gabo lena. 30 Ka lona letšatši le, moperisita o tla dira gore Modimo a le lebalele dibe tša lena. Dibe tša lena di tla lebalelwa, gomme la ba bao ba hlwekilego pele ga Jehofa. 31 Ke sabatha, e lego letšatši la lena la go khutša, gomme le bontšheng gore le nyamile ka baka la dibe tša lena. Wo ke molao wa go ya go ile.

32 “Moperisita yo a tloditšwego le yoo a kgethilwego gore e be moperisita yo a Phagamego legatong la tatagwe, a dire dihlabelo gore Modimo a lebalele setšhaba dibe tša sona. Ke moka a apare diaparo tša linene, e lego diaparo tše kgethwa. 33 A hlwekiše sekgethwakgethwa, taberenakele le aletare, le gona a neele dihlabelo tša go dira gore Modimo a lebalele baperisita le setšhaba ka moka dibe tša sona. 34 Wo ke molao wa lena wa go ya go ile, wa gore le direle Baisiraele dihlabelo e le gore Modimo a ba hlwekiše dibeng tša bona ka moka gatee ka ngwaga.”

Arone a dira ka mokgwa wo Jehofa a bego a laetše Moshe.